Markus 11 - O Debleskro Lab 2024 (Sinte-Manouche)

O Yezous djal an o foro Yerusalem

¹ Oun yon van pash i gaba Betfage oun Betani, kay hi gar dour glan o foro. Kol gaba hi čiddo pash koy djeteskri berga. Oun kote penas o Yezous ap douyende peskre malendar:

² “Djan an o gab koy vergel! Oun har t'mer dren venna, hatsenn i terni esla pandlo, ap kolate his gomme kek beshdo. Pandenn lat tele, oun anenn lat pash mande!

³ Oun te penell yek ap t'mende: Hoske krenn t'mer kova? palle penenn ap leste: Hi maro rayeske, te beshell yob ap late. Oun yob bičrell lat sik pale pale.”

⁴ Oun yon djan kote oun hatsan koy terni esla vin ap o drom pandlo ap i voudar. Oun yon pandan lat tele.

⁵ His menshe kote tardo, kolla penan ap lende: “Hoy krenn t'mer koy? Hoske pandenn t'mer koy esla tele?”

⁶ Oun yon penan kol laba ap lende, hoy o Yezous lenge penas. Oun kol vavar moukan len koy esla te lell.

⁷ Koy anan le koy esla pash o Yezouseste, oun čivan pengre koola ap late. Oun o Yezous beshas pes pral pre.

⁸ Oun boud menshe čivan pengre koola ap o drom. Vavar činan zenele kashta i roukendar tele, oun čivan len ap o drom.

⁹ Oun kolla, kay djan glan leste oun kolla, kay djan pal leste, dan gole: “Sharas o Debles! Sharedo vell kova, koles o Devel bičras.

¹⁰ Sharas o baro rayes, ko čaves maro dadestar David, kay vella an peskri zoor! Sharas o Debles an o bolepen!”

¹¹ Oun o Yezous djas dren an o foro Yerusalem, an o Debleskro baro kheer. Oun kote dikas lo pes trouyel. An i rati djas lo vin an o gab Betani peskre deesh-te-douy malentsa.

O faygetikro rouk

¹² Oun o vavar dives, har o Yezous dran o gab Betani djas, las lo bok.

¹³ Oun yob dikas dour glan peste i faygetikro rouk. Ap leste his patria. Oun yob djas kote, te hatsell lo fayge ap ko rouk. Oun har yob kote vas, hatsas lo či har i patria kokres. His gar ko tsiro, kay i fayge baro venna.

¹⁴ Oun yob penas ap ko rouk: “Kek rhal toutar bouder – an kek tsiro!” Oun leskre mala shounan kova.

An o Debleskro baro kheer

¹⁵ Oun yon van an o foro Yerusalem. Oun o Yezous djas an o Debleskro baro kheer. Oun yob tradas kolen vin, kay kote bikran oun ginan, oun vitsras i lovengre stamya kolendar trouyel, kay i menshenge love paran. Ninna i stamya kolendar, kay parne čirkle bikran, vitsras lo trouyel.

¹⁶ Oun yob moukas gar, te hidjrell yek čomone an o Debleskro baro kheer trouyel.

¹⁷ Oun yob penas lenge, hoy an o Debleskro lab činlo hi, oun penas: O Devel penella: Miro kheer te vell i kheer, kay i tsele menshe ap i phoub nay venna, te sharenn le man, oun te mangenn le man an. T'mer kran lestar i kheer, kay i menshe rhorhenna oun randenna.

¹⁸ Oun kova shounan i bare rashaya oun i biboldengre čačepangre. Oun yon dikan, har kran i tsele menshe bare yaka pral leskro rakepen. Doleske daran le lestar oun rodan, har te nay marenn le les.

¹⁹ Oun ap i rati djas lo peskre malentsa vin glan o foro.

I zoor vell dran o patsepen

²⁰ Oun har yon taysarlake pash ko faygetikro rouk van, dikan le, kay ko tselo rouk tele meras.

²¹ Oun o Petreske van o Yezouseskre laba pale an shero, oun yob penas ap leste: “Sikepaskro, dik, ko rouk, hoy tou praasal, ko meras.”

²² Oun o Yezous penas ap lende: “Patsenn ap o Debleste!

²³ Čačepah, me penau t'menge: Te penell yek ap kay berga hade tout, oun vitse tout an o baro pani, oun patsell zoreles an peskro dji, te djal kova, hoy yob penell, palle vell kova ninna.

²⁴ Doleske penau t'menge: Lauter, hoy t'mer o Deblestar mangenna, patsenn, te lan les, palle lenn t'mer kova ninna.

²⁵ Oun te han t'mer tardo oun mangenn čomone o Deblestar, bistrenn ko čilačo koova, hoy i vavar ap t'mende kras, te bistrell t'maro dad an o bolepen ninna ko čilačo koova, hoy t'mer kran.

²⁶ T'mer te bistrenn gar ko čilačo koova, hoy i vavar ap t'mende kras, palle bistrell t'maro dad an o bolepen vitar gar ko čilačo koova, hoy t'mer kran.”

O Yezouseskri zoor vell o Deblestar

²⁷ Oun yon van pale an o foro Yerusalem. Oun har yob an o Debleskro baro kheer trouyel djas, van i bare rashaya, i biboldengre čačepangre oun phoureder pash leste,

²⁸ oun poučan lestar: “Koon penas touke, te kress kova lauter? Koon bičras tout?”

²⁹ Penas o Yezous ap lende: “Me kamau t'mendar ninna čomone te poučell. T'mer te penenn les mange, palle penau me t'menge ninna, koon man bičras, te krap me kova lauter.

³⁰ Koon bičras o Yohannes, te taufras yob i menshen? Bičras o Devel les? Bičran i menshe les? Penenn les mange!”

³¹ Oun yon rakran mank pende, oun penan: “Mer te penah leske: O Devel bičras les, palle penell lo menge: Hoske patsan t'mer les gar?

³² Vitar gar nay penah mer: I menshe bičran les.” Yon trashan kol boud menshendar. Kolla patsan, te hi o Yohanni čačepah i Debleskro rakepaskro.

³³ Oun yon penan ap o Yezouseste: “Mer djinah les gar.” Koy penas yob ap lende: “Yaake penau t'menge vitar gar, koon man bičras, te krap me kova.”