Markus 1 - O Debleskro Lab 2024 (Sinte-Manouche)

¹ Kova hi o lačo lab o Yezous Kristestar. Yob hi o Debleskro čavo.

O Yohanni vella pash o pani Yordan

² Kova vas yaake har o Debleskro rakepaskro, o Yesaya, glan i rah tsiro an peskro liil činas. O Devel penas ap peskro čaveste: Shoun, me, o Devel, bičrau i morshes glan toute ap o drom, te krell lo touke i drom, te nay vess pash i menshende.

³ Koy hi yek an o moulo them, kay dell gole: Krenn maro Debleske o drom, te nay vell lo pash i menshende! Lenn halauter krik, hoy o Debleske an o drom čiddo hi!

⁴ Kova his o Yohanni, kova, kay taufras i menshen. Yob his an o moulo them, oun penas i menshenge: “Moukenn t'maro čilačo drom! Djan ap o Debleskro drom! Oun moukenn t'men te taufrell! Oun o Devel lell t'mari doosh t'mendar krik!”

⁵ Oun boud menshe djan pash leste. Yon van dran o tselo them Youdea oun dran o foro Yerusalem. Oun yon penan o čilačo koova, hoy yon kran. Oun o Yohanni taufras len an o pani Yordan.

⁶ O Yohanneskri plaashka his dran firhengre balla. Oun i ledertikri dori his troul leste. Oun leskro rhapen his gvin oun stepangre.

⁷ Oun yob penas i menshenge: “Koy vella i morsh pal mande, kova hi zorleder har me. Me hom gar moldo, te čivap man glan leste tele, te krap leskre kirrha pre.

⁸ Me čivom t'men an o pani, te vell diklo, kay moukan t'maro phouro djipen. Kova, kay vell pal mande, čivell o Debleskro Dourho ap t'mende.”

O Yezous vella pash o pani Yordan

⁹ His an kol divessa, kay vas o Yezous dran o foro Nazaret, hoy an o them Galilea čiddo hi, oun moukas pes o Yohannestar an o pani Yordan te taufrell.

¹⁰ Oun har o Yezous pes dran o pani hadas, dikas lo, kay djas o bolepen pre, oun o Debleskro Dourho vas har i parno čirklo ap leste tele.

¹¹ Oun i rakepen dran o bolepen penas: “Tou hal miro čavo, koles me kamau. Pral toute hom barhtelo.”

¹² Oun sik pal kova anas les o Debleskro Dourho an o moulo them.

¹³ Oun kote ačas lo star-deesh divessa. Oun o beng kamas les o Debleskro dromestar tele te anell. Kote his ninna divye firhe. Oun i bolepangre van oun his leske koy.

¹⁴ Har o Yohanni stildo vas, djas o Yezous an o them Galilea, oun sikras i menshende o Debleskro drom.

¹⁵ Oun yob penas: “O tsiro vas, kay lell o Devel i menshen dran o čilačepen vin. Moukenn t'maro phouro djipen! Oun djan ap o Debleskro drom! Oun patsenn ap kava lačo lab!”

O Yezous rodell peskre malen vin

¹⁶ Har o Yezous pash o baro pani an o them Galilea djas, dikas lo o Simones oun leskro phrales, o Andreas. Kolla his mačepangre, oun vitsran pengre mačengre gone an o pani, te taprenn le mačen.

¹⁷ Oun o Yezous penas ap lende: “Avenn mantsa! Me krau t'mendar menshen, kay anenn vavaren pash mande.”

¹⁸ Koy pre moukan le pengre mačengre gone oun djan leha.

¹⁹ Oun o Yezous djas doureder, oun dikas o Yakobes oun leskro phrales, o Yohanni. Lengro dad hi o Zebedeo. Yon his an o bero beshdo oun kran i mačengre gone tseles.

²⁰ Har yob len dikas, das lo len gole. Oun yon moukan pengro dades, o Zebedeo, an o bero, khetne kolentsa, kay boudran leske, oun djan o Yezouseha.

²¹ Oun yon djan an o foro Kapernaum. Ap o Debleskro dives djas o Yezous an i biboldengri kangri oun sikras i menshende o Debleskro drom.

O Yezous sikrell peskri zoor

²² Oun yon kran bare yaka pral kova, hoy yob lenge penas. Yob rakras bari zoryah oun gar yaake har i biboldengre čačepangre rakrenna.

²³ An koy kangri his ninna i morsh, kay his an leste i beng. Oun kova das gole:

²⁴ “Hoy kameh tou mendar, Yezous dran Nazaret? Val tou, te maress men? Me djinau, koon tou hal: Tou veh o Deblestar.”

²⁵ Oun o Yezous das les trad oun penas ap leste: “Ma rake oun dja dran leste vin!”

²⁶ Oun ko beng, kay an ko morsheste his, tserdas kava morshes kate oun kote, das zoreles gole, oun djas dran leste vin.

²⁷ Oun lenge ačas o rakepen krik. Oun yon poučan mank pende: “Hoy hi kova? I nevo drom sikrell lo men i bari zoryah. Les hi ninna penepaske pral i benga. Oun yon shounenn ap leste, oun venn dran i menshende vin.”

²⁸ Oun an i tikno tsiro shounas hakeno lestar an kava tselo them Galilea.

O Yezous krell boud nasselen sasto

²⁹ Har yon dran i biboldengri kangri vin van, djan le an ko kheer, kay o Simon oun o Andreas djivenn. Ninna o Yakobo oun o Yohanni djan lentsa.

³⁰ Oun i day o Simoneskri romyatar his čiddo ap o čiben, oun lakro shero his tato. Oun yon penan o Yezouseske latar.

³¹ Oun yob vas pash late, tapras lat pash o vast oun kras, te stell li pale pre. Oun o nasslepen djas latar. Oun yoy anas lenge i rhapen.

³² Ap i rati, har o kham tele djas, anan yon pash leste i tsele nasselen oun kolen, kay his benga an lende.

³³ Oun i tsele menshe dran o foro van khetne glan o voudar.

³⁴ Oun yob kras boud nasselen sasto, oun las boud nasslepen lendar. Ninna boud bengen tradas lo vin oun moukas len gar rakrell. Yon djinan, koon yob hi. Doleske moukas o Yezous len gar te rakrell.

An o them Galilea

³⁵ Oun taysarlake, glan o dives, stas lo pre, oun djas kote, kay lo kokres hi. Oun kote rakras lo o Debleha.

³⁶ Oun o Simon oun kolla, kay pash leste his, nashan leske sik palla.

³⁷ Oun har hatsan le les, penan le leske: “Hakeno rodell tout.”

³⁸ Penas lo ap lende: “Mer djas ninna an i vavar forya, te penap kote i menshenge o Debleskro lab. Doleske vom kay, te penap kova lenge.”

³⁹ Oun yob djas an o tselo them Galilea trouyel, oun rakras an i biboldengre kangria, oun tradas i bengen dran i menshende vin.

O Yezous krell yekes sasto, koleskro mass tele merella

⁴⁰ I morsh vas pash o Yezouseste. Koles his i djoungelo nasslepen, kay leskro mass tele merella. Yob peras glan leste tele, oun mangas lestar: “Te kameh tou, nay kreh man sasto.”

⁴¹ Oun o Yezouses khaytas kova, oun yob čivas peskro vast ap leste, oun penas ap leste: “Me kamau, te vess sasto.”

⁴² Oun har yob kova penas, djas ko nasslepen lestar, oun yob vas sasto.

⁴³ Oun o Yezous bičras les pestar oun penas zoreles ap leste:

⁴⁴ “Shoun, pen kekeske, hoy me krom touke! Dja pash o rashayeste oun sike leste, kay tou sasto val! Oun an kova glan o Debleste, hoy o Mose penas, te vess erligo kerdo. Kre kova, te djinenn i menshe, kay tou sasto val.”

⁴⁵ Oun ko morsh djas peske, oun rakras boud pral kova, hoy o Yezous leske kras. Oun boud shounan kova, yaake, te nay djas o Yezous bouder gar an i forya dren, har yob kamas. Oun yob his vin, kote, kay kek menshe djivan. Oun kote van le pash leste dran i tsele gaba oun forya.