Maleachi 3 - O Debleskro Lab 2024 (Sinte-Manouche)

¹ O baro Devel, ko ray pral o bolepen oun i phoub penell: Denn yak, me bičrau miro bičepaskres! Yob krell glan mande o drom yaake, har mange mishto hi. Oun ko ray, kolestar t'mer penenn, te rodenn les, kova vell sik pash peskro kheer. Ko bičepaskro, kay t'mentsa pral kova rakrell, hoy t'mentsa vin krom, ap koleste t'mer t'maro tselo djiyeha dikenna, yob hi gar dour.

² Koon t'mendar nay rikrell ko dives vin, yob te vella? Oun koon t'mendar nay ačell glan leste tardo, yob te moukell pes te dikell? Yob hi har i zoreli sapouni oun har i yag, hoy rhačell i čik an o saster krik.

³ Yob krell har yek, kay krell o roup djoudjo an i yag. Yob krell i rashayen dran o kheer Levi yaake djoudjo, har sonakay oun roup djoudjo kerdo venna. An ko tsiro anenn yon o baro Debleske save firhen, hoy čačo hi glan leskre yaka.

⁴ Oun o baro Devel dikell lačes ap kova, hoy i menshe dran Youda oun dran Yerusalem leske anenna, yaake har kova his glan boud bersha.

⁵ Oun me kamau pash t'mende te vell, te vap t'maro čačepaskro ray. Oun mange nay patsenna, me rakrau o čačepen vin pral i menshende, kay hadenn man gar: kolla, kay dourkrenna, kol morsha, kay rhorhran pengri romyat, oun kol djouvya, kay rhorhran pengri romes, kolla, kay phagenn pengri sovel, oun kolla, kay djan djoungeles kolentsa trouyel, kay boudrenn lenge, oun kolla, kay rhorhenn kol djouvyen, kolengro rom meras, oun kolla, kay rhorhenn kol čaven, kolen bouder kek dad hi, oun kolla, kay rikrenn kol vi-themaryen tele, kay djivenn mashkral t'mende. Ko penell o baro Devel, ko ray pral o bolepen oun i phoub.

T'mer čorenn o Deblestar!

⁶ Me, o baro Devel, ačau har hom. Oun t'mer, o Yakobeskre čave, ačan ninna har hans:

⁷ T'mer moukan miro drom har t'mare phoure ninna kran, oun rikran t'men gar ap mire laba. Moukenn kanna t'maro čilačo drom! Oun avenn pash mande pale! Oun me kamau pash t'mende te vell. Ko penell o baro Devel, ko ray pral o bolepen oun i phoub. T'mer penenn: Hoy kram mer, hoy čilačo hi?

⁸ Me poučau t'mendar: Hi mishto i menshestar, te čorell lo o Deblestar har t'mer mandar čorenna? Koy pre penenn t'mer: Hoy kram, har čoram toutar? T'mer denn man gar o deshto halauterestar, hoy dren lan, vitar gar kova, hoy hounte dans i rashayende.

⁹ Doleske han praasedo! Halauter t'mendar čoran mandar.

¹⁰ Anenn o deshto kotar halauterestar, hoy dren lan, an miro kheer, te vell doha rhapen an miro kheer. Oun dikenn, hoy me palle t'menge krau: Me krau miri vorhni an o bolepen pre, oun dau t'men boud lačo koova, boudeder har t'men hounte vell. Ko penell o baro Devel, ko ray pral o bolepen oun i phoub.

¹¹ Oun me rikrau i stepangren dour krik t'mari phoubyatar, te rhan le gar kova pre, hoy kote baro vas. Oun t'mare drakengre rouka venn pherde drake. Ko penell o baro Devel, ko ray pral o bolepen oun i phoub.

¹² Oun i menshe an i tsele themma penenn pral t'mende: “Dikenn, har barhteles yon hi! Havo shoukar them len hi!” Ko penell o baro Devel, ko ray pral o bolepen oun i phoub.

O dives, kay o Devel vella

¹³ T'mer rakrenn djoungelo koova pral mande, penell o baro Devel. T'mer poučenn: Hoy penam pral toute?

¹⁴ T'mer penenn: Dineles hi, te das maro djipen an o Debleskro vast. Hoy anell menge kanna, te rikrah leskre laba, oun mangah men tele glan o baro Debleste, ko rayeste pral o bolepen oun i phoub?

¹⁵ Doleske sharas mer kolen, kay phourdenn pen pre pral o baro Debleste. Kol čilačenge djal mishto. Ninna te krenn le, hoy o Devel gar kamell, krell lo lenge či. Kek bibarht vell pral lende.

¹⁶ Koy rakran kolla mank pende, kay djivenn o baro Debleha. Oun o baro Devel das yak ap lengre laba oun shounas, hoy le penenn, oun moukas len an i liil dren te činell, te venn le gar bistedo. An kava liil hi kolla dren tardo, kay djivan leha, oun hadan leskro lab.

¹⁷ Oun pral lende penell o baro Devel, ko ray pral o bolepen oun i phoub: Ap ko dives, kay me vau, sikrell pes, kay hi le mire. Oun me krau miro dji lenge yaake pre, har i morsh peskro dji pre krell peskro čaveske, kay leske koy hi.

¹⁸ Palle dikenn t'mer pale, kay djal gar emliges kolenge, kay an o čačepen tardo hi oun kolenge, kay krenn o čilačepen. Djal vavarčandes koleske, kay mangell o Debles an, har koleske, kay mangell les gar an.

¹⁹ Doleske denn garda, ko dives vella, oun an ko dives rhačella har i yag an i bob. Oun i tsele čilače oun kolla, kay phourdan pen pre pral mande, yon hi har phouss, hoy i yag rhačrell. Či ačell lendar pral, halauter venn krik lino. Ko penell o baro Devel, ko ray pral o bolepen oun i phoub.

²⁰ T'menge penau kova, t'menge, kay mantsa djivenn: T'menge djal o kham pre oun anell t'menge o čačepen. Oun leskro tatepen krell t'mare douka sasto. Oun t'mer stenna i barhtyatar har terne groumya, hoy venn vin dran i stanya.

²¹ Ap ko dives, kay me vau, stakrenn t'mer kol čilačen khetne. Yon venn har čik tel t'mare pire. Kova penell o baro Devel, ko ray pral o bolepen oun i phoub.

²² Moukenn t'menge mire čačepaskre laba an o shero te vell, hoy penas t'menge o Mose, koles miro vast his. Leske penom ap i berga Horeb, hoy kamau t'mendar, i tsele Israelendar, te krenn t'mer.

²³ Denn garda, me bičrau t'menge miro rakepaskres, o Eliya, glan te vell ko baro dives, kay miri rholi pral i menshende vell.

²⁴ Yob lell o čingepen krik mank i dadende oun lengre čavende. O djiyestar rodell yek i drom pash o vavareste. Yaake hounte vap me gar, te čivap i praasepen pral o tselo them.