Maleachi 2 - O Debleskro Lab 2024 (Sinte-Manouche)

I rashaya lenn i phagi

^1-2 O baro Devel, ko ray pral o bolepen oun i phoub, penell ap i rashayende: Oun kanna, t'mer rashaya, kava lab hi t'menge: Hadenn man oun krenn, hoy t'mendar kamau. Te kamenn gar te shounell, hoy t'menge penau, palle čivau i praasepen ap t'mende oun bičrau t'menge bibarht. Oun koy barht, hoy ap t'mende čiddo hi, vell i bibarht. Čačepah, o praasepen hi ap t'mende čiddo doleske, kay lan gar ap t'mare djia, hoy t'menge penom.

³ Dikenn, hoy me kamau te krell: Kolla, kay t'mendar venna, kolen phagau. Oun o foul kol firhendar, hoy t'mer mange anenn, vitsrau me an t'mare mouya. Oun t'mer venn vin vitsedo khetne o fouleha.

⁴ Palle hayvenn, kay kova, hoy pral t'mende vas, mandar vas, yaake har me t'menge penom. Kova, hoy vin krom kolentsa dran o kheer Levi, hounte ačell tardo, penell o baro Devel, ko ray pral o bolepen oun i phoub.

⁵ Lentsa krom vin, te dap len djipen oun lačepen, oun yon hadan man. An kol divessa shounan le ap mande, oun len his traash mandar.

⁶ Yon anan i menshenge kova pashel, hoy čačo hi. Oun kek čilačo lab his an lengre mouya. Yon djivan glan mande an o lačepen oun an o čačepen, oun rikran boud menshen o čilačepastar pale.

⁷ Kova hi i rashayengri boudi: Yon hounte penenn o Debleskro lab an o čačepen, te nay djan i menshe pash lende, te kamenn le te djinell, hoy o baro Devel lendar kamella. I rashaya hi i bičepangre o baro Deblestar, ko rayestar pral o bolepen oun i phoub.

⁸ T'mer rashaya nashan miro dromestar ap i vavar drom. Oun boud menshe peran t'mentsa miro dromestar tele. T'mer sikran lende bouder gar o čačo drom, oun phagan ko lab, hoy me i Levitarentsa vin krom. Doleske penau me, o baro Devel, ko ray pral o bolepen oun i phoub:

⁹ T'mer rikran t'men gar ap miro drom, oun dikan ap o mensheste, har an-diklo yob hi, har penan leske, hoy te krell lo. Doleske krom t'men pale-čiddo, oun čivom ladj ap t'mende glan i tsele menshende an Israel.

Have djouvyen hounte romedinerenn t'mer gar

¹⁰ Men halauteren hi yek dad! O emligo Devel kras men halauter! Hoske phoukrell ko yek ap o vavareste, oun rikrell pes gar ap kova, hoy o baro Devel mare phourentsa vin kras?

¹¹ I menshe dran Youda phagan pengri sovel, hoy dan le pengro Debleste. Oun an o them Israel oun an o foro Yerusalem djal djoungelo koova, hoy i menshen pale-čiddo krell. I morsha an Youda romedineran djouvyen, kay vavar deblen an-mangenna. Oun yaake kran le o kheer pale-čiddo, kay o baro Devel djivell, oun hoy lo kamell.

¹² Mou čivell o baro Devel hako morshes pale, kay sau koova kras, te djivell yob bouder gar mank peskre menshende Israel, yob gar oun leskri familya vitar gar, ninna te anell lo čomone an o kheer o baro Deblestar, ko rayestar pral o bolepen oun i phoub.

¹³ Koy hi gomme i vavar koova, hoy t'mer kran: Te venn t'mer glan o baro Debleste, oun o baro Devel dikell gar lačes ap kova, hoy leske anenna, oun kamell či dran t'mare vasta te lell, palle rovenn t'mer oun denn gole, oun t'mare sva čakrenn leskri rhačepaskri.

¹⁴ Oun t'mer poučenn: Hoske lell lo či mendar? Djiness! O baro Devel his pashel, har tou romedineral tiri romni har terno hals. Oun tou lal touke i vavar oun rhorhral tiri romyat, ninna te his li koya, kay touha djivas. Oun tou phagal tiro lab, hoy lake dal glan o Debleste.

¹⁵ Kek krals sau koova, te vals i tikno kotar foun miro dourho an leste. Yob kamals čave te lell, kay o Debleske koy hi. Doleske denn yak an t'mare djia, te rhorhell oun moukell kek t'mendar peskri romyat!

¹⁶ Kova kay rhoyrell pes pral peskri romni, oun tradell lat krik, krell i baro djoungelo koova, penell o baro Devel, ko ray pral o bolepen oun i phoub. Doleske denn yak an t'mare djia: Ma phagenn ko lab, hoy lake dan, har penan: Me moukau tout gar.

O Devel krell o čačepen vin

¹⁷ T'mer rhoyrenn o baro Debles t'maro rakepah! T'mer penenna: Har rhoyram mer les? T'maro rakepen hi: An o baro Debleskre yaka hi i čilače lačo. Yob kamell len. T'mer penenn ninna: Kay hi o Devel, kay men i phagi della?