Maleachi 1 - O Debleskro Lab 2024 (Sinte-Manouche)

O Debleskro lačepen i Israelenge

¹ Kava hi o lab, hoy penas o baro Devel ap peskro rakepaskro, o Malachie, te penell yob kova doureder ap i Israelitarya.

² “Me kamau t'men o djiyestar”, penell o baro Devel. T'mer penenn mange koy pre pale: “Har dikah mer kova, kay tou kameh men?” “Hi gar o Esau oun o Yakob phrala?” penell o baro Devel. “Oun me kamau o Yakobes,

³ o Esaes kamau me gar. Oun krom, te vas leskro them, kay boud berge hi, har i moulo them, kay i divye djoukle djivenn.

⁴ Te penenn ninna leskre čave, kol Edomarya: Ninna te van mare forya paash dino, mer čivah len neves pre, palle penau me, o baro Devel, ko ray pral o bolepen oun i phoub: Ninna te čivenn le kol forya pale pre, me dau halauter pale paash. Oun vavar menshe penenn pral lende čilačo them oun kalla hi menshe, pral kolende o baro Devel pes rhoyrella an hako tsiro.

⁵ Ko tsiro vella sik, kay dikenn kova t'mare yakentsa, oun palle penenn t'mer: O baro Devel hi zorelo pral o them Israel oun doureder vin.”

O Devel dikell gar lačes ap kova, hoy i rashaya krenn

⁶ O baro Devel, ko ray pral o bolepen oun i phoub, penell: I čavo hounte hadell peskro dades, oun i boudepaskro hounte dikell pre ap peskro rayeste. Me hom t'maro dad – hoske hadenn man gar? Me hom t'maro ray – hoske dikenn gar pre ap mande? T'mer rashaya, t'mer dikenn tele ap mande. Oun t'mer poučenn: Hoy kram, kay peneh tumer dikan tele ap mande?

⁷ Koy pre penau me: T'mer anan ap o Debleskri rhačepaskri pale-čiddo mass, oun poučenn: Hoy anam touke, hoy pale-čiddo his? T'mer krenn har te vals miri rhačepaskri či moldo.

⁸ Oun anenn mange i firho, hoy korelo, bango oder nasselo hi, oun penenn t'menge: Kova hi kek djoungelo koova. Me penau t'menge: Anenn sau firho t'maro themeskro rayeske, oun dikenn, hoy lo krell! Patsenn t'mer, te dikell lo lačes ap t'mende? Ko penell o baro Devel, ko ray pral o bolepen oun i phoub.

⁹ Kanna nay mangenn lestar, t'mer rashaya, – yaake boud har kamenn, te vell lo menge lačes! Hoy djal an t'maro shero glan? Sau koova kran, oun t'mer patsenn, te vell lo t'menge lačes! Na-a, penell o baro Devel, ko ray pral o bolepen oun i phoub.

¹⁰ Kamaus, te vals yek t'mendar koy, kay krals o voudya an miro kheer pandles, te krenn t'mer gar čičeske i yag ap miri rhačepaskri! Man hi doha t'mendar, penell o baro Devel, ko ray pral o bolepen oun i phoub. Oun kol marede firhe, hoy mange anenn, hi mange gar mishto.

¹¹ O baro Devel, ko ray pral o bolepen oun i phoub, penell: Foun kotar, kay o kham pre djala, bis kote kay o kham tele djal, vell miro lab sharedo pash kolende an i vavar themma. An boud gaba oun forya rhačrenn le mange soungepaskro koova oun firhen, hoy hi lačo an mire yaka. Kolla lauter sharenn miro lab.

¹² T'menge hom či moldo, te penenn t'mer: Koy rhačepaskri o baro Deblestar hi či moldo. Anas leske čomone, hoy ninna či moldo hi!

¹³ Oun t'mer penenn: Dikenn, havi boudi hi men koleha! Ko vell menge dran o nak vin. T'mer anenn mange firhen, kay hi čoredo, bango oun nasselo. Penap me koy pre: Kova hi shoukar, hoy t'mer mange krenn, penell o baro Devel.

¹⁴ Praasedo te vell hakeno, kay pes sovel das, te dell lo man i lačo morsh firho. Oun palle rhorhell lo man oun anell mange i nasselo firhes. Me hom o pralstouno ray, oun i menshe dran vavar themma sharenn man, penell o baro Devel, ko ray pral o bolepen oun i phoub.