Louka 24 - O Debleskro Lab 2024 (Sinte-Manouche)

O Devel krell o Yezouses i moulendar djides

¹ Sik taysarlake, pal o Debleskro dives, lan le kouč djet, hoy yon kokres kran, oun djan pash ko moulengro kheer.

² Kote dikan le, kay ko baro bar bouder gar glan o moulengro kheer čiddo hi.

³ Oun yon djan dren, oun hatsan gar o moulo troupo o rayestar Yezous.

⁴ Har yon koy tardo his, oun djinan gar, hoy te krenn le, his kote ap yek kopo douy morsha tardo. Oun lengre ripya his rayles biyalo.

⁵ Oun i traash vas ap i djouvyende. Oun daryatar dikan le ap i phoub. Kol douy morsha penan ap lende: “Hoske rodenn t'mer kol djides pash i moulende?

⁶ Yob hi gar kay. O Devel kras les i moulendar djido. Bistran t'mer kova, hoy yob t'menge penas, har yob an o them Galilea his?

⁷ Yob penas t'menge: O Mensheskro Čavo hounte vell an i čilače vasta dino, oun ap o troushel dino. Oun pal triin divessa stell lo i moulendar pre.”

⁸ Oun kol laba van pale an lengro shero.

⁹ Koy djan yon krik dran ko moulengro kheer, oun djan pale an o foro, oun penan kova lauter o Yezouseskre deesh-te-yek malenge, oun ninna kol tsele vavarenge, kay pash lende hi.

¹⁰ Kol djouvya his i Maria Magdalena, i Yoanna oun i Maria, ko Yakobeskri day oun vavar.

¹¹ Oun kova, hoy i djouvya penan, his i morshenge dinelo rakepen. Oun yon patsan kol djouvyen gar.

¹² O Petro stas pre, oun djas pash ko moulengro kheer, dikas dren, hatsas kol layntikre kotya ap i rig čiddo, oun djas peske. Yob djinas gar, hoy te penell lo.

Ap o drom an o foro Emmaus

¹³ Ap kava dives djan douy o Yezouseskre malendar an ko gab Emmaus. Kova his deesh-te-douy kilometarya glan o foro Yerusalem.

¹⁴ Ap o drom rakran le pral lauter, hoy an o foro Yerusalem djas.

¹⁵ Har yon yaake rakran, vas o Yezous pash lende, oun djas lentsa.

¹⁶ Yon prindjran les gar, har te vans lengre yaka pandlo.

¹⁷ Koy poučas lo lendar: “Pral havo koova rakrenn t'mer?” Koy vas lenge ropaske, oun yon ačan tardo.

¹⁸ Oun ko yek, kay kharella Kleopas, penas ap leste: “Djineh tou gar, hoy an kal divessa an o foro Yerusalem lauter djas? Halauter djinenn kova. Hal tou i vi-themari oun djineh kova gar?”

¹⁹ Oun o Yezous penas: “Hoy djas?” Oun yon penan: “Kova, hoy kran le o Yezouseha dran Nazaret. Yob his o Debleskro rakepaskro, ap koleste o Debleskri zoor his. O Devel bičras les. Kova dikas hakeno ap kova, hoy yob penas oun kras.

²⁰ Mare bare rashaya oun pralstoune rakran i phagi pral leste vin, te vell lo ap o troushel dino. Oun yon dan les ap o troushel.

²¹ Mer patsam, kay o Devel bičras les, te lell yob i Israeleskre menshen dran i Remaryengre vasta vin. Kova djas lauter glan triin divessa.

²² Oun kava dives penan menge i djouvya čomone, kay ačas menge o rakepen krik. Kol djouvya his taysarlake pash o moulengro kheer,

²³ oun hatsan o moulo Yezouses gar. Yon van pale pash mende, oun penan: Mer dikam bolepangren, oun kolla penan: O Yezous djivella!

²⁴ Morsha mendar djan pash ko moulengro kheer, oun lauter his yaake, har kolla djouvya kova penan. Les dikan yon gar.”

²⁵ Koy penas o Yezous ap lende: “T'mer hayvan či. An t'maro dji djal či dren. Hoske patsenn t'mer kova gar, hoy o Debleskre rakepangre glan i rah tsiro penan?

²⁶ Kolla penan: O Kristo, ko baro ray, kones o Devel bičras, hounte las douka ap peste, te djas lo an peskro raylepen.”

²⁷ Palle penas o Yezous lenge, hoy o Mose oun i tsele Debleskre rakepangre pral leste činan.

²⁸ Oun yaake van le pash o gab Emmaus, oun o Yezous kras yaake, har te kamell lo doureder te djal.

²⁹ Yon rikran les pale, oun penan ap leste: “Ač pash mende! I rati vella, oun vell tamlo.” Koy djas yob lentsa an o kheer,

³⁰ oun beshas pes te rhal lo lentsa, las o maro, parkras pes pash o Debleste, phagas ko maro an kotya, oun das kova lende.

³¹ Koy hayvan le, kova hi o Yezous. Oun ap yek kopo dikan le les bouder gar.

³² Oun yon penan mashkral pende: “Djas kova gar an maro dji, har yob ap o drom mentsa rakras, oun menge penas, hoy an o Debleskro lab pral leste činlo hi?”

³³ Oun yon stan pre, oun yaake sik har djala, djan le pale an o foro Yerusalem. Kote his kol deesh-te-yek oun kol vavar o Yezouseskre malendar khetne.

³⁴ Oun kolla, kay kote khetne hi, penan lenge: “O Devel kras čačepah o Yezouses djido, oun o Simon dikas les.”

³⁵ Koy ginan kol douy lenge dren, hoy lenge ap o drom djas, oun har yon les prindjran, har yob o maro phagas.

O Yezous sikrell pes peskre malende

³⁶ Har yon kova penan, his ap yek kopo o Yezous mashkral lende tardo, oun penas ap lende: “O Debleskri barht t'menge!”

³⁷ Yon patsan, kay dikenn le i moules. Oun i daar vas ap lende.

³⁸ Koy penas lo ap lende: “Hoy dikenn t'mer yaake darenes? Hoske poučenn t'men an t'maro shero, koon me hom?

³⁹ Dikenn mire vasta oun mire herya! Me hom les. Taprenn man an, oun hayvenn: Kek moules hi mass oun kokale ap peste, har t'mer les pash mande dikenna!”

⁴⁰ Oun har yob kova penas, sikras yob lende peskre vasta oun pire.

⁴¹ Yon nashte patsan gar, kay hi o Yezous glan lende tardo, yaake barhtelo his le. Har djinan le gar, hoy te penenn le, poučas lo lendar: “Hi t'men čomone te rhal?”

⁴² Koy dan le les i kotar peklo mačo.

⁴³ Yob las kova oun rhas les glan lende.

⁴⁴ Oun yob penas: “Har me pash t'mende homs, penom me ap t'mende: Halauter hounte vell čačo, hoy o Mose činas, oun hoy o Debleskre rakepangre pral mande penan, oun hoy an o Debleskre gilya činlo hi.”

⁴⁵ Oun palle das lo len gosvepen, te hayvenn le o Debleskro lab,

⁴⁶ oun penas ap lende: “Yaake hi činlo an o Debleskro lab: O Kristo, ko baro ray, kolestar o Devel penas, te vell yob, kova hounte lell douka ap peste, oun pal triin divessa stell lo i moulendar pre.

⁴⁷ Oun an peskro lab hounte vell i menshenge an hake themma penlo, te moukenn le pengro čilačo drom, oun djan ap o Debleskro drom, yaake kay lell o Devel lengri doosh lendar krik. Penenn kova i menshenge an o foro Yerusalem, oun palle an i vavar themma!

⁴⁸ T'mer dikan kova lauter, oun hounte penenn kova i menshenge doureder!

⁴⁹ Oun me bičrau t'menge koles, kolestar miro dad penas, te vell yob pash t'mende. Ačenn an o foro Yerusalem yaake rah, bis te lan i zoor dran o bolepen!”

⁵⁰ Oun yob djas pash o gab Betani peskre malentsa. Koy hadas lo peskre vasta oun penas: “O Devel ačell t'mentsa!”

⁵¹ Oun har yob yaake rakras, djas lo lendar oun vas pral an o bolepen hadedo.

⁵² Oun yon sharan les, oun djan barhteles pale an o foro Yerusalem.

⁵³ Oun hako tsiro djan le an o Debleskro baro kheer, oun sharan o Debles.