Louka 23 - O Debleskro Lab 2024 (Sinte-Manouche)

O Yezous vella glan o Pilateste anlo

¹ Oun lauter stan pre, oun anan o Yezouses pash o Pilateste.

² Oun yon anan boud koova ap leste pre, oun penan: “Kava morsh kras mare menshen divyo. Yob penas, te das mer o baro rayeste an o foro Rom bouder kek love. Oun yob penas ninna, kay hi lo o Kristo, ko baro ray, kolestar o Devel penas, te vell yob.”

³ Koy poučas o Pilato lestar: “Hal tou o baro ray pral i biboldende?” Penas lo: “Ava, hi yaake har tou penal.”

⁴ Koy penas o Pilato ap kol bare rashayende oun ap kol vavar menshende, kay kote tardo hi: “Me hatsom kek doosh ap leste.”

⁵ Yon moukan gar tele, te anenn le čilačo koova ap o Yezouseste, oun penan: “Yob kras i menshen divyo an o them Galilea, oun an o tselo them Youdea, oun an o foro Yerusalem ninna.”

O Yezous vella glan o Herodeste anlo

⁶ Har o Pilato kova shounas, poučas yob: “Hi kava morsh dran o them Galilea?”

⁷ Oun har yob shounas, kay o Yezous dran o them Galilea hi, kay o Herodes o baro ray hi, moukas lo o Yezouses pash koleste te anell. O Herodes his an ko tsiro ninna an o foro Yerusalem.

⁸ Oun o Herodes his barhtelo, har yob o Yezouses dikas. Yob shounas lestar oun kamas les i rah tsiro te dikell. Yob kamas, te krell o Yezous leske i baro koova, hoy kek vavar nay krella.

⁹ Kanna, har o Yezous glan leste tardo hi, poučas yob o Yezousestar boud koova. O Yezous penas či pale.

¹⁰ I bare rashaya oun i biboldengre čačepangre his koy pashel tardo, oun anan boud čilačo koova ap o Yezouseste.

¹¹ Oun o Herodes oun leskre lourde san pral leste, rivan leske i rayeskri plaashka an, oun moukan les pale pash o Pilateste te anell.

¹² Oun ap ko dives van o Herodes oun o Pilato mala. Glan ko dives his yon rhoyedo yek ap i vavareste.

I menshe kamenn, te vell o Yezous maredo

¹³ O Pilato das i bare rashayen, i pralstoune bibolden, oun i tsele menshen khetne gole,

¹⁴ oun penas ap lende: “T'mer anan kava morshes pash mande, oun penan mange, te krell lo i menshen divyo. Me kamom lestar te shounell, hoy yob koy pre penella, oun hatsom kek doosh ap leste, hoy t'mer ap leste pre anan.

¹⁵ Oun o Herodes hatsas vitar kek doosh ap leste. Doleske bičras yob les pale pash mende. Oun kanna shounenn, hoy me t'menge penau: Kava morsh kras či, te hounte vell lo maredo.

^16-17 Me moukau les dava te dell, oun moukau les te djal.”

¹⁸ Koy dan i tsele menshe gole: “Mare les, oun de men o Barabes!”

¹⁹ O Barabas his i stildo. Yob kras an o foro Yerusalem i baro čingepen, oun das i morshes temerl.

²⁰ O Pilato kamas o Yezouses te djal moukell. Oun yob das gole, te kamell lo o Yezouses te djal moukell.

²¹ I menshe dan pale gole: “De les ap o troushel! Ap o troushel leha!”

²² Oun o Pilato poučas lendar o triinto kopo: “Havo čilačo koova kras yob? Yaake har me kova dikau, kras yob či, te hounte vell yob maredo. Me dau les dava, oun moukau les te djal.”

²³ Yon dan zorleder gole, te vell lo ap o troushel dino. Oun har yon gar tele moukan, shounas o Pilato ap lende oun penas:

²⁴ “Me krau, hoy t'mer kamenna.” Oun yob penas i lourdenge, te denn le les ap o troushel, te merell lo kote.

²⁵ Oun o Pilato moukas koles dran o stilepen vin te djal, kay kras i baro čingepen an o foro oun maras yekes. O Yezouses das yob an lengre vasta.

O Yezous vell glan o foro anlo

²⁶ Oun har yon o Yezouses krik anan, te vell yob ap o troushel dino, tapran le i morshes ap o drom. Kova boudras vin ap i kotar phoub oun his kanna ap o drom khere. Leskro lab hi Simon, oun yob his dran ko foro Kirene. Ap koleste čivan yon o troushel, te hidjrell lo kova o Yezouseske palla.

²⁷ Oun boud morsha oun djouvya djan o Yezouseske palla ap o drom. Kolla dan bari gole oun rovan.

²⁸ Oun o Yezous rissras pes trouyel oun penas ap lende: “Djuvyale dran o foro Yerusalem, rovenn gar pral mande! Rovenn pral t'mende oun pral t'mare čavende!

²⁹ Ko tsiro vella, kay i menshe penenna: Barhtele hi kol djouvya, kay lan kek ternepen.

³⁰ Ap ko tsiro penenn le ap i berge: Perenn pral mende!

³¹ Te krenn yon kava i zenelo kashteha, hoy krenn yon palle i phouro kashteha?”

O Yezous merella ap o troushel

³² Ninna douy čilače morsha van o Yezouseha glan o foro anlo, te venn le kote ap o troushel dino.

³³ Har yon lauter ap ko kotar them van, hoy kharella Mouleskro Shero, dan yon o Yezouses ap o troushel, oun kol douy čilače morshen ninna. Ko yekeskro troushel his čačes lestar, ko vavareskro troushel his serves lestar.

³⁴ Koy penas o Yezous: “Miro dad, le i doosh kolendar krik, kay man ap o troushel dan! Yon djinenn gar, hoy yon kran.” Oun i lourde khelan pral leskre koola, te dikenn le, hoy hakeno lella.

³⁵ Oun i menshe, kay koy pashel tardo his, dikan kova lauter, hoy o Yezouseha djas. Kol pralstoune bibolde, kay kote tardo hi, san pral leste, oun penan: “Vavaren las yob dran o merepen vin. Te hi lo čačepah o Kristo, ko baro ray, kones o Devel vin rodas, te vell lo pash mende, palle nay djals yob o troushelestar tele.”

³⁶ Oun ninna kol lourde san pral leste, oun dan les shoutli mool te piyell.

³⁷ Oun yon penan ap leste: “Tou te hal o baro ray pral i biboldende, ab o troushelestar tele!”

³⁸ Oun pral leste ap i kasht his činlo: Kova hi i o baro ray pral i biboldende.

³⁹ Yek kol čilače morshendar, kay ap o troushel dino his, praasas o Yezouses, oun penas: “Te hal tou ko Kristo, ab o troushelestar tele, oun le men ninna tele!”

⁴⁰ Ko vavar čingras ap leste oun penas: “Mouk tele! Dareh tou gar o Deblestar, kanna kay hal ap o troushel?

⁴¹ Kava hi mari phagi koleske, hoy kram. Mer anah čačepah doosh ap mende. Kava morsh kras kek čilačepen.”

⁴² Oun yob penas ap o Yezouseste: “Yezous, ma biste man, te hal tou kote, kay tou o baro ray hal!”

⁴³ Oun o Yezous penas ap leste: “Čačepah, me penau touke: Kava dives hal tou mantsa an o Debleskri shoukar baar.”

⁴⁴ His nay deesh-te-douyenge, koy vas o dives kalo har i rati an o tselo them. Oun kova ačas yaake bis trinenge.

⁴⁵ Oun o voudar an o Debleskro baro kheer, kay his kerdo dran kouč pesso than, koya djas an douy kotya mashkral paash.

⁴⁶ Oun o Yezous das bari gole: “Miro dad, an tire vasta čivau me miro djipen!” Oun palle meras lo.

⁴⁷ Har ko pralstouno lourdo dikas, hoy koy djas, sharas lo o Debles oun penas: “Čačepah, kava his i lačo morsh.”

⁴⁸ Kol menshenge, kay kote van oun lauter dikan, djas kova yaake phares an o dji, te dan pen yon ap o beč, oun djan penge le.

⁴⁹ Oun o Yezouseskre mala oun kol djouvya, kay van leha dran o them Galilea, kolla his i kotar krik tardo oun dikan kova lauter.

O Yezous vella paskedo

⁵⁰ Koy vas i morsh, ko kharella Yosef. Kova his čačo oun lačo. Yob his yek kol pralstoune biboldendar,

⁵¹ oun kamas gar, te vell o Yezous ap o troushel dino. Yob his dran i biboldengro foro Arimatia. Oun yob dikas ap o Debleste, te vell ko tsiro, kay hakeno dikell, kay o Devel o baro ray hi.

⁵² Yob djas pash o Pilateste oun mangas lestar, te denn le les o moulo Yezouses.

⁵³ Oun o Yosef las o Yezouses o troushelestar tele, oun čivas les an i layntikro kotar, oun čivas les an i moulengro kheer, kova his an i baro bar dino. Kote his gomme kek mensho dren čiddo.

⁵⁴ Kova his glan o Debleskro dives, har o kham tele djas.

⁵⁵ Kol djouvya, kay van o Yezouseha dran o them Galilea, kolla djan o Yosefeske palla, oun dikan, har čivas lo o moulo Yezouses an i moulengro kheer.

⁵⁶ Oun yon djan an o foro pale, oun kran kouč djet, hoy mishto soungella, te makenn le les dren. Ap o Debleskro dives kran le kek boudi, yaake har kova pash i biboldende hi.