Louka 19 - O Debleskro Lab 2024 (Sinte-Manouche)

O Yezous oun o Zakeo

¹ Oun o Yezous djas an o foro Yericho.

² Kote his i biboldo, ko his i pralstouno pral kolende, kay lenna i biboldendar love i Remaryenge dren. Leskro lab his Zakeo.

³ Yob kamas o Yezouses te dikell, oun nay dikas les gar. Yob his tikno, oun boud menshe his troul o Yezouseste.

⁴ Doleske nashas lo glan i menshende, oun djas ap i rouk, te dikell lo feteder.

⁵ Oun o Yezous vas koy oun dikas pre, oun penas ap leste: “Zakeo, am sik koy tele! Kava dives hounte vap me an tiro kheer.”

⁶ Oun o Zakeo vas sik o roukestar tele, oun las o Yezouses an peskro kheer dren, oun his barhtelo.

⁷ Har yon kova dikan, his yon rhoyemen oun penan: “Pash i pale-čiddo djal yob an o kheer.”

⁸ O Zakeo his koy tardo oun penas ap o Yezouseste: “Mo ray, me dau i čorvelende i paash lauterestar, hoy man hi. Oun te rhorhrom yekes, dau les kanna star kope yaake boud pale.”

⁹ Penas o Yezous ap leste: “Kava dives las o Devel i menshen an kava kheer dran o čilačepen vin. Ninna kava rom hi o Abrahameskro čavo.

¹⁰ O Mensheskro Čavo vas, te rodell lo kolen, kay nashedo hi, oun te anell lo kolen ap o Debleskro drom, kay ap o čilačo drom hi.”

I triin boudepangre

¹¹ O Yezous his gar dour o forestar Yerusalem, oun i menshe patsan, kay ko tsiro kanna kay hi, kay o Devel sikrella, te hi lo o ray pral i tseli phoub. Koy penas o Yezous lenge laba, kay i khatedo čačepen dren hi,

¹² oun penas: “I pralstouno kamas te vell lo baro ray pral peskro them. Doleske djas lo pash koleste, kay hi o vast pral boud themma, te krell kova les baro ray. Oun pal kova kamas lo an peskro them pale te djal.

¹³ Oun yob das deesh peskre boudepangren gole, das hakeneste i sheel roupene beme, oun penas: Boudrenn kol loventsa yaake rah har me gar kay hom. Oun yob djas peske.

¹⁴ I menshe an peskro them his rhoyedo ap leste oun bičran morshen leske palla, te penenn le leske: Mer kamah gar, te vess tou baro ray pral mende!

¹⁵ Ko morsh vas baro ray, oun vas an peskro them pale. Koy das lo kol boudepangren gole, kolen yob kol love das. Oun yob kamas dikell, hoy yon kol loventsa kran.

¹⁶ I boudepaskro vas pash leste oun penas: Mo ray, me boudrom kol loventsa, hoy tou man dal. Oun kanna hi man deesh kope yaake boud.

¹⁷ Penas lo ap koleste: Kova kral tou mishto. Tou hal o lačo boudepaskro. Me čivom i tikno koova an tire vasta, oun tou kral i bari boudi koleha. Doleske kamau, te vess tou o pralstouno pral deesh forya.

¹⁸ Ko douyto vas pash ko rayeste, oun penas: Mo ray, me boudrom kol loventsa, hoy tou man dal. Oun kanna hi man panč kope yaake boud.

¹⁹ Ap koleste penas lo ninna: Tou veh o pralstouno pral panč forya.

²⁰ Ko triinto vas oun penas: Mo ray, ake, tire sheel roupene beme. Me khatrom len an i diklo.

²¹ Me darom toutar. Tout hi i dji dran bar. Tou leh, kay dal či. Oun hoy i vavar ap i kotar phoub čivas, leh tou lestar krik, te vas kova bares.

²² Ap koleste penas o ray: Tou moleh či. Tou hal i čilačo boudepaskro. Tou djinal, kay hi man i dji dran bar, oun kay lau, kay dom či, oun hoy me gar an i phoub čivom, te vell kova baro.

²³ Hoske anal tou mire love gar pash kolende, kay i love vin patsenna? Oun te voms me pale, loms boudeder love pale, har tou len dal.

²⁴ Oun yob penas ap kolende, kay koy pashel tardo hi: Lenn kol sheel roupene beme lestar krik, oun denn kol love koleste, kay hi les deesh kope boudeder!

²⁵ Oun yon penan ap o rayeste: Ray, koles hi deesh kope yaake boud!

²⁶ Koy penas o ray: Kones boud hi, kova lell boudeder. Oun kova, kay hi les gar boud, kolestar vell kova ninna krik lino.

²⁷ Oun yob penas doureder: Anenn kolen glan mande, kay hi rhoyedo ap mande, oun kay kaman gar, te vap baro ray pral lende, oun denn len glan mire yaka temerl!”

O Yezous vella pash o foro Yerusalem

²⁸ Har o Yezous kova penas, djas lo glan lende ap o drom, kay djal an o foro Yerusalem.

²⁹ Oun yob vas pash kol gaba Betfage oun Betani. Kal gaba his ap koy berga čiddo, hoy kharella djeteskri berga. Oun yob bičras douy peskre malendar glan-vi oun penas lenge:

³⁰ “Djan an o gab koy vergel. Kote hatsenn t'mer i terni esla pandlo, ap koleste his gomme kek beshdo. Pandenn lat tele, oun anenn lat pash mande!

³¹ Oun te poučell yek t'mendar: Hoske pandenn lat tele? penenn leske: Hi maro rayeske, te beshell yob ap late.”

³² Oun kol douy djan an ko gab, oun lauter his yaake, har o Yezous lenge penas.

³³ Har yon koya terni esla tele pandan, poučas lendar ko morsh, koleske koy esla his: “Hoske pandenn t'mer koy terni esla tele?”

³⁴ Oun yon penan leske: “Hi maro rayeske, te beshell yob ap late.”

³⁵ Koy anan yon koy esla pash o Yezouseste, oun čivan pengre koola ap late. Oun o Yezous beshas pes pral pre.

³⁶ Ap o drom, har yob an o foro Yerusalem klissas, čivan i menshe pengre koola ap o drom, te nashte klissas yob pral vergel.

³⁷ Har yon kote van, kay djal o drom o djeteskri berga tele, dan leskre mala bari gole i barhtyatar, oun sharan o Debles pral ko baro koova, hoy yob mashkral lende kras.

³⁸ Oun yon penan: “Sharas ko baro rayes, koles o Devel bičras. O Debleskri barht vell pash mende! Baro hi o Debleskro raylepen an o bolepen!”

³⁹ Koy his ninna Farisarya mashkral i menshende ap o drom. Kolla penan: “Ray, pen ap tire malende, te moukenn le tele!”

⁴⁰ Penas o Yezous ap lende: “Me penau t'menge: Yon te rikrenn pengre mouya, palle denn i barra gole.”

O Yezous rovella pral i menshende an o foro Yerusalem

⁴¹ Oun har o Yezous pash o foro Yerusalem vas, rovas lo pral i menshende an kava foro,

⁴² oun penas: “Barhtelo vans t'mer, te djinans t'mer kava dives, koon anell t'menge o Debleskri barht! T'mer han korelo. T'mer dikenn les gar.

⁴³ Ko bibarhtelo dives vella, kay lourde venna dran i vavar themma. Yon čivenn bare barra troul t'maro foro, te venn t'mer bouder gar vin.

⁴⁴ Oun yon marenn t'mare menshen, oun denn t'mare čaven an ko foro moulo. Mo Devel kamas t'men peskro lačepen te sikrell. Oun t'mer kaman gar te krenn t'maro dji leske pre. Doleske ačell kek bar ap ko vavar an kava foro.”

O Yezous hi an o Debleskro baro kheer

⁴⁵ Oun o Yezous djas an o Debleskro baro kheer oun tradas kol bikepangren vin,

⁴⁶ oun penas lenge: “An o Debleskro lab hi činlo: O Devel penella: Miro kheer te vell i kheer, kay sharenn man i menshe oun mangenn man an. T'mer kran lestar i kheer, kay i menshe rhorhenna oun randenna.”

⁴⁷ Hako dives djas o Yezous an o Debleskro baro kheer oun sikras i menshende o Debleskro drom. I bare rashaya, i biboldengre čačepangre oun i vavar pralstoune rodan i drom, te marenn le les.

⁴⁸ Yon djinan gar, har nay tapran le les. Boud menshe his troul leste, oun kaman hako lab te shounell, hoy yob penas.