Louka 17 - O Debleskro Lab 2024 (Sinte-Manouche)

Ma moukenn t'men o Debleskro dromestar tele te anell!

¹ Oun o Yezous penas ap peskre malende: “Čačepah, menshe venna, kay kamenn t'men o Debleskro dromestar tele te anell. Bibarht ap koleste, kay kova krella!

² Koleske vals feteder, te vell leske i pharo bar troul i meen pandlo, oun te vell lo an o baro pani vitsedo, te nay anell lo bouder gar yekes kal tiknendar ap o čilačo drom.

³ Denn yak ap t'mende! Te krell tiro phraal čilačo koova ap toute, pen leske, kay kova gar mishto hi, hoy yob kras! Te khaytell les ko čilačo koova, hoy yob ap toute kras, yaake ab bouder gar rhoyedo ap leste!

⁴ Te krell lo efta kope ap o dives čilačo koova ap toute, oun te vell lo efta kope pash toute oun penella, kay les kova khaytella, yaake ab bouder gar rhoyedo ap leste!”

O zorelo patsepen

⁵ Oun kol deesh-te-douy bičepangre penan ap o Yezouseste: “Kre maro patsepen zoreles!”

⁶ Koy penas o ray Yezous ap lende: “Te vals t'maro patsepen ninna tikno har i senftikro djob, nay penans t'mer ap ko baro rouk: Vitse tout an o pani! Oun ko rouk shounals ap t'mende.”

Har te boudras mer o Debleske

⁷ “Shounenn, hoy me t'menge penaua: Kek t'mendar penella ap peskro boudepaskro, kay pal peskri boudi ap o kotar them khere vella: Am, besh tout kate tele, rha oun pi!

⁸ Ko krenn t'mer gar. T'mer penenn leske: Rib tout trouyel oun kre mange rhapaske! An ko rhapen pash mande! Palle nay rhah oun piyeh tou ninna.

⁹ Parkrenn t'men pash leste koleske, hoy yob kras? Na-a, ko krenn t'mer gar.

¹⁰ Yaake hi kova ninna t'mentsa. Te kran t'mer lauter, hoy o Devel t'menge penas, palle penenn: Mer ham tire boudepangre. Mer kram, hoy hounte kram.”

O Yezous krell deesh morshen sasto

¹¹ Har o Yezous ap o drom an o foro Yerusalem his, djas lo mank i themma Samaria oun Galilea.

¹² Oun yob djas an i gab. Oun kote van deesh nassele morsha pash leste. Kolen his i djoungelo nasslepen, kay lengro mass tele merella. Yon his lestar doha dour krik tardo,

¹³ oun dan gole: “Yezous, lačo ray, kre tiro dji menge pre!”

¹⁴ Oun o Yezous dikas len, oun penas ap lende: “Djan pash o rashayeste, oun sikrenn t'men glan leste!” Oun har yon djan, van yon ap o drom sasto.

¹⁵ Yek lendar, har yob dikas, te hi lo sasto, djas lo pash o Yezouseste pale pale, oun sharas o Debles o tselo djiyeha.

¹⁶ Yob vitsras pes glan o Yezouseskre pire tele, oun parkras pes. Kova his i Samaritari.

¹⁷ Koy penas o Yezous: “Deesh van sasto. Kay hi kol vavar enya?

¹⁸ Hi kek vavar koy, kay vas pale pale, te sharell lo o Debles har kava Samaritari?”

¹⁹ Oun yob penas ap kol morsheste: “Ste pre, oun dja khere! Tiro patsepen kras tout sasto.”

Kaana vell o Debleskro tsiro?

²⁰ Oun i Farisarya poučan o Yezousestar: “Kaana vell ko tsiro, kay dikah, kay o Devel o ray hi pral i tseli phoub?” Koy penas lo: “Ko tsiro vell gar yaake, te nay dikenn kova.

²¹ Ninna nay penell yek gar: Kanna hi ko tsiro kay.” Oun o Yezous penas doureder: “Kote, kay i mensho kamell, te vell o Devel leskro ray, kote vas ko tsiro.”

²² Oun yob penas ap peskre malende: “I tsiro vella, kay t'maro dji kamell o Menshengro Čaves yek dives te dikell. Oun t'mer dikenn les gar.

²³ Oun yon penenn ap t'mende: Dikenn, kote hi lo! Dikenn, kate hi lo! Me penau t'menge: Djan gar kote! Patsenn gar, hoy kol menshe penenna!

²⁴ Yaake har i Debleskri yag an o bolepen diklo hi, hoy djal yek rigyatar ap i vavar rig an o bolepen, yaake vell o Mensheskro Čavo ap peskro dives diklo.

²⁵ Glan ko tsiro hounte lell lo boud douka ap peste. Oun i menshe, kay kava dives djivenna, čivenn les ap i rig.

²⁶ Ap ko tsiro, kay o Mensheskro Čavo pale vella, djivenn i menshe yaake har an ko tsiro, kay o Noah djivas.

²⁷ Kol menshe rhan, piyan, oun romedineran, bis ap ko dives, kay o Noah an o panyeskro kheer djas, oun o baro pani vas, oun lauter tassan le.

²⁸ O tsiro, kay o Mensheskro Čavo pale vella, hi ninna har o tsiro, kay o Lot djivas. Yon rhan, piyan, yon ginan, bikran, yon boudran ap pengro kotar phoub, oun kran penge khera.

²⁹ Ap ko dives, kay o Lot dran o foro Sodom djas, vas yag dran o bolepen, oun lauter van rhačedo.

³⁰ Yaake djal kova ninna ap ko dives, kay o Mensheskro Čavo diklo vella.

³¹ Koon ap ko dives ap o kheer hi, oun kones peskro koova an o kheer hi, kova hounte djal gar tele, te lell lo kova. Oun koon ap peskro kotar phoub boudrella, hounte djal gar bouder khere.

³² Ma bistrenn o Loteskri romyat!

³³ Koon kamell peskro djipen te rikrell, kova nashrell les. Koon peskro djipen nashrella, kova lell les pale.

³⁴ Me penau t'menge: Te hi an koy rati douy menshe an o čiben čiddo, vell ko yek krik lino, ko vavar ačell koy.

³⁵ Douy djouvya krenn dran djob yarro. Koy yek vell krik lino, koy vavar ačell koy.

³⁶ Douy boudrenn ap i kotar phoub. Ko yek vell krik lino, ko vavar ačell koy.”

³⁷ Leskre mala poučan lestar: “Ray, kay vell kova?” Penas lo: “Kote, kay i moulo mass čiddo hi, kote venn i bare divye čirkle khetne te rhan le.”