Louka 16 - O Debleskro Lab 2024 (Sinte-Manouche)

O rhorheno boudepaskro

¹ O Yezous penas ninna ap peskre malende: “His i bravelo morsh. Koles his i boudepaskro, kay rhorhras les oun das leskro bravlepen vin. Har ko bravelo kova shounas,

² moukas lo les gole te dell, oun penas ap leste: Hoy shounom me pral toute? Sike mande kol lila, hoy dren činlo hi, har boud love tou dren lal! Tou nay deh bouder gar ap miro bravlepen garda!

³ Oun ko boudepaskro penas ap peste: Te nay boudrau me bouder gar miro rayeske, hoy te krap me kanna? Me nay boudrau gar vin ap i kotar phoub. Oun te hounte mangap, ladjau man.

⁴ Me djinau kanna, hoy te krap, te lenn yon man pash pende pre ap ko dives, kay hi man bouder kek boudi.

⁵ Oun yob das kolen pash peste gole, kay hi siyaan pash peskro rayeste. Oun yek pal o vavareste vas pash leste. Oun yob poučas hakenestar: Har boud siyaan hi tout pash miro rayeste?

⁶ Oun te penas yek: Sheel khoro djet, palle penas lo ap leste: Le ko liil, kay tiro siyaan dren tardo hi. Čin kanna: paash-sheel!

⁷ Oun te poučas lo i vavarestar: Har boud siyaan hi tout? Oun kova penas: Sheel gone djob. Palle penas lo ap koleste: Le ko liil, kay tiro siyaan dren tardo hi, oun čin kanna: orhta-deesh!

⁸ Oun ko ray sharas ko rhorheno boudepaskres doleske, kay his lo gosevo.” “Oun kova hi čačo”, penas o Yezous, “kol menshe, kay prindjrenn o Debles gar, djan gosveder trouyel i vavar menshentsa har kolla, kay djan ap o Debleskro drom.

⁹ Me penau t'menge: T'mare love ačenna gar. Denn len i čorvelende, te venn le t'mare mala! Te hi kol love boudeder či moldo, palle lenn le t'men kote an i khera dren, kay t'mer hako tsiro nay ačenna.”

O mensho oun leskre love

¹⁰ “Koon an i tikno koova lauter mishto krella, kova krell ninna an i baro koova lauter mishto. Koon i tikno koova gar mishto krella, kova krell ninna i baro koova gar mishto.

¹¹ Te djan t'mer gar mishto trouyel kol loventsa, hoy gar ačenna, koon dell t'men nay ko bravlepen an o vast, hoy ačella?

¹² Te djan t'mer vavar menshengro bravlepen gar mishto trouyel, har nay dell t'men o Devel kova an t'mare vasta, hoy kamell lo t'men te dell?

¹³ Kek boudepaskro boudrell nay douy rayenge. Te vals kova yaake, boudrals lo ko yekeske mishto, oun ko vavareske gar mishto. Ko yekes kamals yob gar, ko vavares kamals yob o djiyestar. Tou nay boudreh gar o Debleske oun leh tiro bravlepen khetne!”

¹⁴ Kol Farisarya shounan kova lauter. Yon his pal i love, oun yon san pral o Yezouseste.

¹⁵ Koy penas o Yezous ap lende: “Glan i menshengre yaka kamenn t'mer lačo te vell. O Devel prindjrell t'maro dji. Hoy pash i menshende boud molella, hi či moldo an o Debleskre yaka.

¹⁶ An o phouro tsiro rikran pen i menshe ap kova, hoy o Mose oun i Debleskre rakepangre penan. Har vas o Yohanni, vas o Debleskro nevo tsiro. Kanna vell i menshenge o lačo lab penlo, te dell o Devel i menshen pash peste gole, te djivenn le leha khetne an yek harmenatsyona. Oun hakeno kamell zoryah yaake dren te vell, har yob kamella.

¹⁷ O bolepen oun i phoub ačenna gar. Kova, hoy o Mose oun kol Debleskre rakepangre penan, ačella. Ninna o tikneder lab vell gar krik lino.

¹⁸ Koon peskri romyat moukella, oun romedinerell i vavar djouvyat, kova rhorhell peskri ersti romyat oun anell doosh ap peste. Oun kova, kay romedinerell i moukli djouvyat, kova anell doosh ap peste, te las lo i vavareskri romyat.”

O bravelo morsh oun o čorvelo Lazaro

¹⁹ Oun o Yezous penas pale: Koy his i bravelo morsh. Kova his hako tsiro shoukar oun rayles rido, oun djivas i shoukar djipen.

²⁰ Glan leskro voudar his i čorvelo čiddo, kay his nasselo ap peskro mass. Leskro lab hi Lazaro.

²¹ Kova mangas o bravelestar ko rhapen, hoy peras tele ap i phoub, te rhal lo kova. Oun i djoukle van pash leste, oun čaran leskro nasselo mass tele.

²² O dives vas, kay ko čorvelo meras. Oun i bolepangre anan les an o bolepen, te beshas lo pes pash o Abraham. I tsiro koy pre meras ninna ko bravelo, oun las i shoukar paskepen.

²³ Har yob kanna an o moulengro them his, van bare douka ap leste. Oun yob dikas pre, oun dikas o Abrahames doural, oun o Lazaro his pash leste beshdo.

²⁴ Koy das ko bravelo gole: Tata Abraham, kre tiro dji mange pre, oun biče o Lazares pash mande! Yob hounte čivell peskro goushto an o pani, oun čivell kova ap miri čip, te doukrell man kay yag gar!

²⁵ Koy penas o Abraham: Čava, touke djas hako tsiro an tiro djipen mishto. O Lazares his kek shoukar djipen. Kanna hi yob barhtelo oun leske djal mishto. Oun tout hi kanna bare douka.

²⁶ Ninna hi mashkral mende i baro telstunepen, te nay vell kek mendar pash t'mende, oun kek t'mendar nay vell pash mende.

²⁷ Koy penas o bravelo: Me mangau tout, tata Abraham, biče les an miro dadeskro kheer!

²⁸ Man hi panč phrala. Kolenge hounte penell yob, har mange djala, te venn yon gar koy, kay me hom, oun bare douka lom.

²⁹ Koy penas o Abraham: Len hi o Moseskre laba oun kolla lila, hoy o Debleskre rakepangre činan. Ap kolende hounte shounenn yon!

³⁰ Penas o bravelo: Na-a! Te vals yek i moulendar pash lende, palle moukans le pengro čilačo drom.

³¹ Penas o Abraham: Te shounenn le gar ap o Mose oun ap kol Debleskre rakepangre, shounenn le vitar gar ap yekeste, kay stas i moulendar pre.