Louka 15 - O Debleskro Lab 2024 (Sinte-Manouche)

O nashedo bakro

¹ His i dives, kay van boud bibolde pash o Yezouseste, kay lenn i biboldendar love i Remaryenge dren, oun boud vavar, kay čilačo koova kran oun doleske pale-čidde hi. Yon lauter kaman te shounenn le les.

² Kol Farisarya oun i biboldengre čačepangre his rhoyemen pral o Yezouseste oun penan: “Kava morsh lell i pale-čidde pash peste pre, oun rhal lentsa.”

³ Koy penas o Yezous lenge laba, kay i khatedo čačepen dren hi, oun penas:

⁴ “Te hi yekes t'mendar sheel bakre, oun yek lendar djal nashedo, palle moukell lo kol vavaren tardo, oun rodell ko yekes yaake rah, te hatsell lo les.

⁵ Oun te hatsell lo koles, lell lo les ap i phik, oun hi barhtelo.

⁶ Oun te vell lo khere, penell lo peskre malenge oun kol vavarenge, kay troul leste djivenna: Avenn barhteles mantsa! Me hatsom ko bakres pale, kay his nashedo.”

⁷ Palle penas o Yezous lenge: “Me penau t'menge: Pral ko yek čilačo, kay moukas peskro čilačo drom oun djal ap o Debleskro drom, pral koleste hi bareder barht an o bolepen, har pral kol vavarende, kay patsenna, te nay ačenn le ap pengro drom.”

I nashedi roupeni bema

⁸ Te hi i djouvyat deesh roupene beme, oun nashrell yek, krell li i momeli an, oun rodell koy bema an o tselo kheer yaake rah, bis te hatsell li lat.

⁹ Oun te hatsell li koy roupeni bema, dell li peskre malen gole oun kol vavaren, kay pash late djivenna, oun penella: Avenn barhtelo mantsa! Me hatsom miri roupeni bema, kay nashrom.

¹⁰ Me penau t'menge ninna: O Debleskre bolepangre hi barhtelo pral yekeste, kay moukell peskro čilačo drom oun djal ap o Debleskro drom.

O nashedo čavo

¹¹ Oun o Yezous penas: I morshes his douy čave.

¹² Ko terneder penas ap peskro dadeste: De man kanna kova, hoy me lau pal tiro merepen! Oun o dad das hakenes peskro kotar.

¹³ Pal i tikno tsiro las o terneder čavo peskro tselo bravlepen, oun djas an i vavar them, djivas i shoukar djipen, oun das peskro tselo bravlepen vin.

¹⁴ Har les his bouder či, vas i bari bok pral o them oun les his bouder či te rhal.

¹⁵ Koy djas lo pash i harho oun rodas i boudi. Kova bičras les pash i balende, te dell yob garda ap lende.

¹⁶ Les his bari bok oun kamas ninna kova te rhal, hoy i bale rhana. Kokres kova kamas les kek te dell.

¹⁷ Oun yob penas ap peste: Miro dades hi boud boudepangre. Kolen hi boud te rhal, oun me merau kate i bokatar.

¹⁸ Me kamau pash miro dadeste te djal, te penap: Tata, me krom i čilačo koova, kay me djom toutar oun o Deblestar krik.

¹⁹ Me hom gar moldo, te ačap tiro čavo. Le man pash toute pre, te vap tiro boudepaskro!

²⁰ Oun yob stas pre, oun djas pash peskro dadeste pale. Har leskro dad les doural dikas, khaytas o čavo les. Oun o dad nashas pash leste, tapras les trouyel, oun čoumras les.

²¹ Koy penas o čavo ap leste: Tata, me krom i čilačo koova, kay me djom toutar oun o Deblestar krik. Oun me hom gar moldo, te ačap tiro čavo.

²² Koy penas o dad ap peskre boudepangre: Anenn sik o feteder ripen, oun rivenn kova leske an! Denn les i goustri oun denn les kirrha!

²³ Anenn i terni thoulli groumni! Marenn lat, te rhas oun vas barhtelo!

²⁴ Čačepah, miro čavo his moulo, oun vas djido. Yob his nashedo oun vas pale. Oun yon van lauter barhtelo.

²⁵ Ko phoureder čavo boudras vin ap i kotar phoub. Har yob khere djas oun pash o kheer vas, shounas lo bashepen oun khelepen.

²⁶ Oun yob das i boudepaskres gole, oun poučas lestar, hoy kote djas.

²⁷ Kova penas: Tiro phraal vas sasto pale. Doleske maras tiro dad i terni thoulli groumyat leske.

²⁸ Kote vas yob rhoyedo, oun kamas gar an o kheer te djal. Oun leskro dad djas vin, oun mangas les, te vell lo an o kheer dren.

²⁹ Oun ko čavo penas ap peskro dadeste: Tou djineh, kay me boud bersha touke boudrom, oun krom lauter, hoy tou mange penal. Mange maral tou kek bakro, te rhap les mire malentsa, oun te vap barhtelo.

³⁰ Tiro čavo, kay vas kanna pale khere, kova, kay das tire love vin i loubyentsa, koleske maral i terni thoulli groumni.

³¹ Koy penas o dad ap leste: Miro čavo, tou hal hako tsiro pash mande, oun hoy miro hi, kova hi ninna tiro.

³² Mer hounte vas barhtelo. Tiro phraal his moulo oun vas djido. Yob his nashedo oun hatsas pale khere.