Louka 14 - O Debleskro Lab 2024 (Sinte-Manouche)

O Yezous krell i morshes sasto ap o Debleskro dives

¹ His i Debleskro dives, koy djas o Yezous pash i pralstouno Farisari an o kheer te rhal. Oun kol menshe kote lan les an o yak.

² Kote his i morsh, koles his pani an i herya oun an i moussya.

³ Oun o Yezous penas ap i čačepangre oun ap i Farisarya: “Nay krau menshen sasto ap o Debleskro dives pal o biboldengro čačepen?”

⁴ Yon penan či koy pre. Koy čivas o Yezous peskro vast ap ko morsheste, kras les sasto, oun moukas les te djal.

⁵ Palle penas lo ap kolende, kay kote beshdo hi: “Te hi yekes t'mendar i čavo oun kova perell an o pani dren, tserdenn les t'mer gar vin, ninna ap o Debleskro dives? Te hi yekes t'mendar i groumni oun koya perell an o pani dren, tserdenn lat t'mer gar vin, ninna ap o Debleskro dives?”

⁶ Oun yon nay penan či koy pre.

O Devel krell koles baro, kay krell pes gar baro

⁷ Oun o Yezous dikas, har kolla, kay an o kheer dren van, penge i feteder beshepangre vin rodan. Doleske penas lo lenge laba, kay i khatedo čačepen dren hi, oun penas:

⁸ “Te penell yek ap toute: Am ap i biyab! palle besh tout gar ap o feteder beshepaskro kote! Nay vell yek morsh, kay hi bareder har tou.

⁹ Oun palle vell kova pash toute, kay penas, te vess ap i biyab, oun penell ap toute: Mouk koles kate te beshell, oun besh tout kote tele! Oun tou hounte leh ko telstouno beshepaskro, oun tout hi i bari ladj.

¹⁰ Tou te djah ap i biyab, palle besh tout ap o telstouno beshepaskro! Oun kova, kay kamas, te djah tou ap peskri biyab, vella pash toute oun penella: Miro maal, besh tout ap i feteder beshepaskro! Oun lauter, kay kote ap i biyab hi, dikenn, kay tou i an-diklo morsh hal.

¹¹ Koon pes baro krella, koles sharell o Devel gar. Koon pes gar baro krella, oun penella: Me molau či, koles krell o Devel baro.”

¹² Oun o Yezous penas ap koleste, kay kamas, te rhal lo leha: “Te kreh tou i baro rhapen, palle ma khare tire malen oun phralen pash toute, vitar gar bravele menshen, kay an tiro drom djivenna! Kolla len tout ninna pash pende pre, oun yaake denn le tout pale, hoy tou lenge kral.

¹³ Te kameh tou i baro rhapen te krell, palle le kol čorvelen pash toute pre, ninna kolen, kay bango hi, kolen, kay nashenn nay gar, oun kolen, kay korelo hi, oun de len te rhal!

¹⁴ Te kreh tou kova, hal tou barhtelo! Kol menshe nay denn tout či pale. Te krell o Devel kol moulen djido, kay kran, hoy yob kamas, palle dell lo tout kova lauter pale, hoy tou lenge kral.”

I bari biyab

¹⁵ Pash i rhapaskri his i morsh beshdo. Har kova shounas, hoy o Yezous rakras, penas lo ap o Yezouseste: “Barhtelo hi kova, kay rhal o maro pash o Debleste an o bolepen.”

¹⁶ Koy penas o Yezous leske: “I morsh kras i baro rhapen, oun moukas boud menshen te penell, te venn le pash o rhapen.

¹⁷ Oun ap ko tsiro, kay yob kamas pes tele te beshell, bičras lo i boudepaskres pash lende, te penell lo: Avenn! Rhapen oun pipen hi lauter koy.

¹⁸ Yek pal o vavar penan, te nay van le gar. Ko yek penas: Me ginom i kotar phoub, oun me djap koy oun dikap, har kova vi-dikella. Me nay vau gar.

¹⁹ Ko douyto penas: Me ginom deesh groumya, oun djau kanna kote, te dikap, har yon vi-dikenna. Me nay vau gar.

²⁰ Ko triinto penas: Me romedinerom. Doleske nay vau gar.

²¹ Ko boudepaskro vas pale, oun penas lauter peskro rayeske. Koy vas ko ray an i bari rholi, oun penas ap koleste: Dja ap i tsele dromma an o foro! An kol čorvelen, kol bangen, kol korelen oun kolen, kay nay nashenn gar, pash mande!

²² Oun pal i tsiro vas o boudepaskro pale oun penas: Me krom, hoy tou penal. O kheer hi gar pherdo.

²³ Oun ko ray penas ap koleste: Dja vin ap i dromma glan o foro oun pash i bourra ap o them, kay menshe beshdo hi, oun pen lenge, te venn le pash mande. Rake lenge an o dji, te venn yaake boud menshe har djala an miro kheer!

²⁴ Me penau t'menge: Kolenge, kay moukom glan i tsiro te penell, te venn le pash miro rhapen, oun kay kaman gar pash mande te vell, kolendar moukau kekes an miro kheer dren te vell, te rhal lo mantsa.”

O Yezouseskro drom

²⁵ Har o Yezous ap o drom djas, his boud menshe troul leste. Oun yob dikas ap lende oun penas:

²⁶ “Koon pash mande vella, oun kamell peskro dades, peskri dat, peskri romyat, peskre čaven, peskre phralen, peskre phenyen, oun peskro djipen boudeder har man, kova nay vell gar miro maal.

²⁷ Koon lell gar peskro troushel ap peste oun djal mantsa, nay vell gar miro maal.

²⁸ Te kamell yek t'mendar i baro kheer te krell, hounte dikell lo, te hi les doha love.

²⁹ Te čivell lo nay kokres i telstoune barra, palle san i tsele menshe pral leste.

³⁰ Oun yon penenn: Ko morsh kamas i kheer te krell. Oun kanna nay krell lo les gar doureder.

³¹ Te kamell i baro ray an o kourepen te djal i vavar baro rayeha, hounte poučell lo pestar: Hom me zorelo doha mire deesh zerya lourdentsa, te kourap man ko vavar baro rayeha, kay biish zerya lourde pash leste hi?

³² Te hi lo gar zorelo doha, bičrell lo morshen pash o vavar baro rayeste yaake rah, har kova gomme dour lestar hi, oun mangell les, te djal kek kourepen.

³³ Doleske penau t'menge: Kek t'mendar nay vell miro maal, te dell yob gar lauter pre, hoy les hi.”

O čačo loon

³⁴ “O loon hi mishto. Te nashras o loon peskri zoor, hi lo bouder gar mishto. Oun tou nay kreh bouder či, te vell lo pale londo.

³⁵ Ko loon molell či bouder. Tou nay vitsreh les krik. Lenn kova ap t'maro dji, hoy me t'menge penaua!”