Kolossarja 4 - O Debleskro Lab 2024 (Sinte-Manouche)

¹ T'mer kay han raya, ap t'mende penau: Avenn čačes ap t'mare boudepangre oun djan lentsa mishto trouyel! Ma bistrenn, kay hi t'men ninna i ray an o bolepen!

Ma moukenn tele, te mangenn o Debles!

² Ma moukenn tele, te mangenn o Debles! Parkrenn t'men hako tsiro pash leste!

³ Mangenn o Debles ninna menge, te krell lo menge i drom pre, te penas nay leskro lab i menshenge, te sikras lende, te hi o Yezous Kristo ko drom, kay anell men pash o Debleste. Kova djinan i menshe i rah tsiro gar. Har me kova i menshenge penom, vom doleske an o stilepen.

⁴ Mangenn o Deblestar, te rakrap kova yaake, har o Devel kamella!

⁵ Djivenn t'maro djipen yaake, te dikenn i vavar, kay t'mer patsle han! Rodenn i drom, te rakrenn lentsa pral o Debleste!

⁶ Rakrenn lentsa kamles, oun trashenn gar, te penenn o čačepen! Yek te poučell t'mendar čomone pral t'maro patsepen, palle rakrenn leha yaake, har kova koleske mishto hi.

Ačenn o Debleha!

^7-8 Me bičrau miro lačo phrales, o Tichiko, pash t'mende, te penell lo t'menge lauter, hoy mantsa djal. Yob boudrell mantsa o Yezouseske, maro rayeske, oun krell peskri boudi mishto. Koles bičrau pash t'mende, te djinenn t'mer, har menge djala, te venn t'mer zoreles an o dji.

⁹ Leha khetne bičrau miro lačo phrales, o Onesimo, kay rikrell zoreles ap o patsepen. Kova hi yek t'mendar. Kol douy penenn t'menge lauter, hoy kate djala.

^10-11 O Aristarko, kay mantsa an o stilepen hi, penell t'menge “Ačenn o Debleha!” Ninna o Marko oun ko Yosua, kay ninna Yusto kharella, penenn t'menge “Ačenn o Debleha!” O Marko hi o kakeskro čavo o Barnabestar. Te vell lo pash t'mende, lenn les kamles pre, har penom t'menge glan i tsiro! Kolla triin morsha hi bibolde, kay ap o Yezous Kristeste patsenna. I tsele biboldendar, kay kate hi, krenna kol triin kokres mantsa khetne o Debleskri boudi. Yon dan man zoor an miro dji.

¹² Ninna o Epafras penell t'menge: “Ačenn o Debleha!” Kova hi yek t'mendar, oun boudrell o Yezous Kristeske. Yob mangell o Debles hako tsiro t'menge, te venn t'mer zoreles an o patsepen, te djinenn lauter, hoy o Devel t'mendar kamella oun te krenn kova ninna.

¹³ Me nay penau, har boud yob o Deblestar mangas t'menge oun kol patslenge an i forya Laodicea oun Hierapolis.

¹⁴ Ninna o Louka oun o Demas penenn t'menge: “Ačenn o Debleha!” O Louka hi ko dramaskro, koles mer lauter o djiyestar kamah.

¹⁵ Penenn i patslenge an o foro Laodicea mendar: “Ačenn o Debleha!” Penenn kova ninna i Nimfa, oun kol tsele patslenge, kay venn khetne an lakro kheer!

¹⁶ T'mer te draveran kava liil, palle denn les ninna i patslende, kay venn khetne an o foro Laodicea. Oun draverenn ninna ko liil, hoy činom kolenge!

¹⁷ Penenn ap o Arkippo: Kre koy boudi, hoy o ray Yezous tout das! Mouk gar tele!

¹⁸ Me, o Paulo, činau t'menge miro vasteha kal laba: “Ačenn o Debleha!” Ma bistrenn man, kay hom an o stilepen! O Debleskro lačepen djal t'mentsa!