Kolossarja 3 - O Debleskro Lab 2024 (Sinte-Manouche)

T'maro nevo djipen

¹ O Devel kras t'men o Yezous Kristeha i moulendar djido. Doleske čivenn t'maro dji ap kova, hoy hi an o bolepen! Kote hi o Yezous Kristo ap i čači rig o Deblestar beshdo!

² Dikenn ap kova, hoy an o bolepen hi! Ma dikenn ap kova, hoy ap i phoub hi!

³ T'mer meran. Oun t'maro nevo djipen hi kanna o Yezous Kristeha pash o Debleste an o bolepen, ninna te dikenn kova kanna gomme gar.

⁴ Ap ko tsiro, kay nay dikell hakeno o Yezous Kristes, dikenn le ninna t'men pash leste an leskro raylepen.

⁵ Ma krenn bouder kova, hoy kran an t'maro phouro djipen: Ma loubrenn trouyel! Ma krenn djoungelo oun vi-ladjedo koova! Ma moukenn čilačo koova an t'maro shero trouyel te djal! Ma nashenn pal i love! Koon pal i love nashella, koleske hi peskre love har leskro devel.

⁶ Kol menshe, kay shounenn gar ap o Debleste, kolla krenna savo koova. Doleske vell o Debleskri rholi pral lende.

⁷ Ap ko phouro tsiro, har t'mer gar ap o Yezous Kristeste patsan, kran t'mer ninna kova lauter.

^8-9 Kanna djivenn t'mer bouder gar t'maro phouro djipen. Doleske čivenn i rholi t'mendar krik, ninna o čilačepen, o djoungelo rakepen pral o vavareste, vi-ladjede laba! Ma rhorhenn t'men!

¹⁰ Djivenn kanna o nevo djipen! Moukenn t'men o Deblestar boud oun boudeder neves te krell, yaake te prindjrenn o Debles feteder oun djinenn, hoy yob kamella! Palle venn t'mer yaake har yob, kay t'men o nevo djipen das.

¹¹ Kote, kay o Devel i menshen neves kras, kote hi yek yaake boud moldo har o vavar: I bibolde oun kolla, kay kek bibolde hi; kolla, kay ap o mass činlo hi oun kolla, kay gar ap o mass činlo hi; vi-themarya oun divye; raya oun boudepangre. O Yezous Kristo djivell an hakeneste mendar.

¹² T'mer han kanna o Debleskre menshe, kolen yob peske vin rodas. Yob kamell t'men o djiyestar. Doleske hounte vell t'men i baro dji o vavareske, te vell hakeno lačo ap o vavareste, te krell pes kek bareder har o vavar, te rakrell hakeno lačes o vavareha, te dell kek o vavares sik pre,

¹³ te rhoyrell pes kek sik pral o vavareste. Oun bistrenn ko čilačo koova, hoy i vavar ap t'mende kran! Yaake har o ray, o Yezous Kristo, t'mari doosh bistras, hounte krenn t'mer kova ninna.

¹⁴ Bareder har lauter hi o kamlepen, hoy vella o Deblestar. Te kamenn t'mer i vavaren o djiyestar, palle krenn t'mer lauter, hoy o Devel t'mendar kamella, oun hoy t'men khetne rikrella.

¹⁵ O Yezous Kristo das t'men pash peste gole, te djivenn lauter leha khetne. Djivenn kanna yaake, te han t'mer yek dji oun yek djipen! Oun parkrenn t'men pash o Debleste!

¹⁶ Ma moukenn tele, te rakrenn oun shounenn o lab o Yezous Kristestar! Rakrenn les t'menge an o dji! Avenn gosevo koy pashel, te sikrell yek o vavareste, har te djal lo ap o Debleskro drom! Givenn Debleskre gilya oun save gilya, hoy sharenn o Debles, ninna save gilya, hoy o Debleskro Dourho an t'mende čivella! Ava, givenn o Debleske, oun sharenn les an t'mare djia!

¹⁷ Oun lauter, hoy t'mer krenna oun penenna, kova krenn oun penenn yaake, te vell maro ray Yezous sharedo! Oun parkrenn t'men pash o Debleste, maro dadeste, lautereske, hoy o Yezous Kristo t'menge kras!

Hakeno hounte djivell yaake, har o Devel kova kamella

¹⁸ T'mer djouvya, ma hadenn t'men pral t'mare romende! Yaake kamell kova t'maro ray Yezous t'mendar.

¹⁹ T'mer morsha, avenn kamlo ap t'mare romyende, oun gar rhoyedo!

²⁰ T'mer čave, shounenn hako tsiro ap t'maro dadeste oun ap t'mari date! Kova kamell o ray Yezous t'mendar.

²¹ T'mer dada, ma avenn gar yaake rhoyedo ap t'mare čaven, te darenn le t'mendar an o dji!

²² T'mer boudepangre, shounenn hako tsiro ap t'mare rayende, kolenge t'mer hounte boudrenna! Ma krenn t'mari boudi yaake, te sharenn t'men i menshe! Na-a! Boudrenn lenge o čačo djiyestar, oun yaake, har kamell o ray Yezous kova t'mendar.

²³ Lauter, hoy t'mer krenna, krenn kova o djiyestar o Yezouseske, maro rayeske, oun gar i menshenge!

²⁴ Djinenn, maro ray, o Yezous Kristo, dell t'men peskro bravlepen an o bolepen. Leskre boudepangre han t'mer.

²⁵ Koon o čilačepen krella, kova lell i phagi. Pash o Debleste hi hakeno yaake boud moldo har o vavar.