Kamlepaskri gili 8 - O Debleskro Lab 2024 (Sinte-Manouche)YOI 1 Kamoms te vals mange har i phraal, i čavo miri datar! Hatsoms tout kaymone vin, nay čoumroms tout, oun kek nay vals rhoyedo ap mande. 2 Me loms tout pash o vast, oun anoms tout khere pash mande, an miri dakri isema, kay boldo vom. Me doms tout miri feteder mool, oun miri phabyengri mool. 3 Leskro servo vast hi tel miro shero čiddo, oun leskro čačo vast taprell man trouyel. 4 T'mer ča dran o foro Yerusalem, me mangau t'men o djiyestar: Moukenn men kokres, yaake rah har khetne ham, bis te stah pre. I shobti gili I ČA 5 Koon hi koya, kay vell pre dran o moulo tato them, moussi an moussi peskri pirneha? Tel o phabyengro rouk djangrom tout, kote, kay tiri day touha vavarčandes vas, oun tou boldo val. YOI 6 Čin miro lab ap tiro dji! Mouk man har i goustri ap tiro vast te vell! Te kamenn pen douy, hi lengro kamlepen zoreles har o merepen, oun rikrell len pandles har o moulengro them. Len hi i dji yek o vavareske, hoy rhačell zoreles har i yag o baro Deblestar. 7 Ninna boud panya nay krenn o kamlepen gar vin, oun i zorele panya nay hidjrenn o kamlepen gar krik. Te kamals yek o kamlepen te ginell, oun dals peskro tselo bravlepen koleske, sans i menshe les vin. LAKRE PHRALA 8 Men hi i tikni pheen, koy hi yaake terno, te nay romedinerell li gar, Hoy te kras mari phenyah ap ko dives, kay vell yek te romedinerell lo lat? 9 Te hi li har i massouri, krah lat shoukar kouč roupeha. Te hi li har i voudar, pandah ko voudar zorele činle kashtentsa. YOI 10 Me hom i massouri, oun mire čoučya hi har turme. Doleske dikell lo ap mande har ap yekate, kay anell leske barht. YOB 11 O Salomes hi i kotar phoub ap i berga Baal-Hermon, Kote hi drakengre rouka tardo. Koy kotar them das lo kol harhende an i vasta. Hakeno lendar hounte playsrals i drakenge, hoy bikrals lo, i zero kotya roup. 12 Salomo, tout nay vell kol zero kotya roup, oun douy-sheel nay venn i harhen! Man hi miro kotar them mire drakentsa! YOB 13 Tou, kay hal beshdo an i baar, de man gole pash toute! Mire mala hi koy oun kamenn tout te shounell. YOI 14 Naash, miro pirno! Ab sik har i vesheskri bouzni oun har i terno tserfo ap i berge, kay i bourra tardo hi, hoy soungenna lačo. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.