Kamlepaskri gili 7 - O Debleskro Lab 2024 (Sinte-Manouche)

I ČA

¹ Risse tout trouyel, risse tout trouyel, Sulamit! Risse tout pash mende, te nay dikas tout! Hoy kamenn t'mer ap i Sulamit te dikell, har khelell li mank i vavarende?

YOI YOB

² Har shoukar hi tire pire an tire kirrha, tou čay i pralstunestar! Tire herya hi shoukar har i verkli troul tiri meen, kerdo yekestar, kay hayvas, hoy lo kras.

³ Tiro gali hi har i čaro, kay hako tsiro mool dren hi. oun har i berga sonakaskro djob. Oun lilya hi koy trouyel tardo.

⁴ Tiro beč hi har terne vesheskre bouzya.

⁵ Tiri meen hi har i turmo dran elefantikre danda. Tire yaka hi har kol tikne panya an o foro Heshbon pash o voudar Bat-Rabbim. Tiro nak hi har ko turmo ap o Libanon, hoy dikell ap o foro Damaskus.

⁶ Har i berga Karmel rikreh tiro shero pral. Oun tire balla hi har feteder phar. Tiro baro ray hi pandlo an lengro shoukapen.

⁷ Har shoukar hal tou, har kamlo! Tou hal kaya, kay miri barht hi.

⁸ Baro har i palma hal tou. oun tire čoučya hi har drake.

⁹ Me kamau pre te djal ap koy palma oun taprau pal lakre patria. Tire čoučya mou venn mange har drake ap i drakengro rouk! Oun tiro dourho soungell har phabya.

YOI

¹⁰ Tire čoumma hi mange har i lači mool, hoy nashell pral miro mouy oun mire danda.

¹¹ Me hom miro pirneskri pirni, oun pal mande nashell leskro dji.

¹² Ab, miro pirno, te djas mer vin glan o foro, oun ačah pral i rati mank i divye bloume.

¹³ Taysarlake nashah menge kote, kay i drakengre rouka tardo hi, te dikas, har venn le zenelo oun hidjrenn bloume, oun har i phabyengre rouka tikne phabya hidjrenn. Kote dau tout miro kamlepen.

¹⁴ I kamlepaskre phabya soungenna mishto. Oun pash maro voudar hi lauter lačo koova, nevo oun phouro koova, kay me, miro pirno, touke pre garom.