Kamlepaskri gili 6 - O Debleskro Lab 2024 (Sinte-Manouche)

I ČA

¹ Kay djas kanna tiro pirno koy, tou shoukester mashkral i djouvyende? Havo drom nashas tiro pirno, te nay rodas les touha?

YOI

² Miro pirno djas tele an peskri baar, kote, kay i soungepaskre bourra tardo hi, te vell lo barhtelo koy, oun te lell lo peske lilya khetne.

³ Miro pirno hi miro, oun me hom leskri. Yob hatsell peskri barht mank i lilya.

I pančti gili YOB

⁴ Shoukar hal tou, miri pirni, har ko rayeskro foro Tirza, oun kamlo har ko foro Yerusalem. Te dikau tout, ačell mange o rakepen krik.

⁵ Ma dik yaake ap mande! Tire yaka krenn man dineles! Tire balla hi har i kale bouzya, kay stenn tele i berga Gilead.

⁶ Tire danda hi parno har bakre, kay venn vin kotar, kay le thodo van. Tire tsele danda hi shoukar tardo, oun i tsele pralstoune danda oun telstoune danda hi koy.

⁷ Lolo har i phabi hi tire čamya pal tiro diklo.

⁸ Shob-deesh romya hi o baro rayes, oun orhta-deesh vavar djouvya, oun yaake boud ča, te nay djinell kek, kitse yon hi.

⁹ Yek kokres hi miri tauba, miri goudli. Lakri dat hi kek vavar čay. Lake hi li i lačeder čay. I vavar ča dikan lat oun penan: Har barhteli hi li! O baro rayeskre romya oun vavar djouvya dikan lat oun sharan lakro shoukapen.

I ČA

¹⁰ Dikenn kolat, kay stell pre har o nevo dives, shoukar har o čon hi li, oun djoudjo har o kham! Koon dikell lat, koleske ačell o rakepen krik.

YOB

¹¹ An i roukengro baar djom tele, te dikap, har i rouka zenelo venn, oun har i drakengre rouka neve patria lenn, oun har i phabyengre rouka tikne phabya hidjrenn.

¹² Hoy djal mantsa? Miro dji nashell pal toute, har te djoms an o rayeskro vourdin.