Kamlepaskri gili 5 - O Debleskro Lab 2024 (Sinte-Manouche)

YOB

¹ Me vau an miri baar, heyo, miri pirni. Oun lau mire soungepaskre roukengre, kashta oun patria. Oun rhau miro goudlo gvin, oun piyau miri mool oun miro thoud. Rhan, mala, oun piyenn! Oun venn mate an t'maro kamlepen!

LENGRE MALA I starti gili YOI

² Me sovom, miro dji his djangelo. Shoun, miro pirno dell ap o voudar: Kre mange pre, heyo, miri pirni, miri tauba, miri goudli! Mire balla hi sapeno.

YOB YOI

³ Rivom miro ripen vin, hoske te rivap les kanna pale an? Thovom mire pire, hoske te krap len kanna pale čikles?

⁴ Miro pirno čivas peskro vast an o voudareskri vorhni, oun halauter, hoy an mande hi, kamas pash leste.

⁵ Me stom pre, te krap miro pirneske o voudar pre, oun mire vasta his pherdo soungepaskro djet. O djet nashas mire goushte tele, har len ap i pandepaskri čivom.

⁶ Me krom o voudar miro pirneske pre, koy hi lo bouder gar koy – djas peske doureder. Miro dji kamas tardo te ačell, har djas yob peske. Me rodom les, oun hatsom les gar. Me kharom les, oun shounom kek rakepen lestar.

⁷ Koy hatsan man kol morsha, kay denn garda an o foro oun kay kote trouyel nashenn. Yon dan man dava oun doukan man. Kal morsha tserdan i plaashka mandar tele.

⁸ T'mer ča dran Yerusalem, mangau t'men o tselo djiyestar: Te hatsenn t'mer miro pirnes, penenn leske, kay nasselo hom pal leste, yaake boud kamau les.

I ČA

⁹ Hoske hi tiro pirno feteder har vavar morsha? Pen kova menge, tou shoukester mashkral i djouvyende! Hoske hi tiro pirno feteder har vavar morsha, te mangeh tou mendar yaake zoreles kava koova?

YOI

¹⁰ Miro pirno hi sasto oun zorelo, kokres yek mank zeryende hi har yob.

¹¹ Leskro shero hi shoukar har dran lačeder sonakay. Leskre balla hi čiddo har bakrengro baal, oun hi kalo har i korako.

¹² Leskre yaka hi har taube pash i panya, – taube, kay hi yaake biyalo har thoud oun beshdo kote, kay boud pani hi.

¹³ Leskre čamya soungenna mishto har i phoub, kay soungepaskre bourra tardo hi. Leskre vushte hi har lilya, sapeno lačo djeteha.

¹⁴ Leskre goushte hi har dran sonakay, Ap lende hi goustria kouč barrentsa. Yob hi har i kouč figura dran elefantikro dand, shoukar kerdo kouč blauete barrentsa.

¹⁵ Leske herya hi har dran parno marmor, zoreles tardo ap pire dran sonakay. Baro hi lo har o Libanon, zorelo har i cedertikre rouka.

¹⁶ Leskro rakepen hi goudlo, oun halauter ap leste hi kamlo. Kova hi miro pirno; ava, kova hi miro maal, t'mer ča dran o foro Yerusalem!