Kamlepaskri gili 4 - O Debleskro Lab 2024 (Sinte-Manouche)

YOB

¹ Har shoukar hal tou, heyo! har shoukar hal! Tire yakentsa dikeh lačes vin har i tauba pal tiro diklo! Tire balla hi har kale bouzya, kay stenn tele i berga Gilead.

² Tire danda hi parno har bakre, kay van neves činlo oun thodo. Tire tsele danda hi shoukar tardo; oun i tsele pralstoune danda oun telstoune danda hi koy.

³ Har i loli dori hi tiro mouy, oun tiro rakepen hi kamlo. Lolo har i phabi hi tire čamya pal tiro diklo.

⁴ Har o Davideskro turmo, barra ap barra pre-čiddo, oun zerya shilte an-pandlo, yaake shoukar hi tiri meen kol verkyentsa, hoy hi trouyel pandlo yek pral o vavar.

⁵ Tire douy čoučya hi har douy terne vesheskre bouzya, kay hi čiddo mank i lilya.

⁶ O dives te djal peske oun i rati vell, kamau pash tire berge te djal, hoy yaake lačo soungenna.

⁷ Halauter ap toute hi shoukar, heyo! Oun kek djounglepen hi ap toute.

⁸ Ab mantsa, miri pirni! Mouk o Libanon, ab mantsa! Ab tele i berge, kay hi yaake dour mandar, – kol berge Amana, Senir oun Hermon! Naash krik kotar, kay i leve djivenn, oun i bare divye margodje pen khatrenn!

⁹ Tou čoral mange miro dji, heyo, miri pirni. Tou čoral mange miro dji tire yakentsa, har dikal ap mande, oun yek verkliah, hoy troul tiri meen pandlo hi.

¹⁰ Har shoukar hi tiro kamlepen, heyo, miri pirni! Har boud kope shoukeder hi tiro kamlepen har mool! Oun tiro soungepaskro djet hi feteder har i tsele vavar lače djeta.

¹¹ Miri pirni, tire čoumma hi har gvin, goudlo har gvin oun thoud. Oun tire koola, hoy ap toute hi, soungenna lačes har o Libanon soungella.

¹² Heyo, miri pirni, tou hal har i baar, kay o voudar pandlo hi, ava har i baar, har i brounna pandlo i tsele vavarenge.

^13-14 Har i baar hal tou pherde rouka goudle phabyentsa, oun roukengre, hoy mishto soungenna, oun o rhapen lačes krenna: Henna oun Narda, Safrano, goudlo soungepaskro khass oun cinnamome, encens, myrrhe oun aloe, halauter lače kashta oun patria.

¹⁵ I pani, hoy an i baar nashella hal tou, i djido pani, hoy dran o Libanon tele nashella.

YOI

¹⁶ Ab, tou phourdepen, ab foun serves oun ab foun čačes, oun phourde an miri baar, te djal o lačo soungepen an miri baar pre! Miro pirno mou vell an peskri baar, oun rhal lakre lače phabya!