Kamlepaskri gili 3 - O Debleskro Lab 2024 (Sinte-Manouche)

Yoy dell souni lestar YOI

¹ Ap miro čiben an i ratsya rodom les, koles miro dji kamell, me rodom les oun hatsom les gar.

² Kamau pre te stell, kamau an o foro te nashell, ap i dromma oun ap i platse kamau les te rodell, koles miro dji kamell. Me rodom les oun hatsom les gar.

³ I lourde hatsan man, kolla, kay ap o foro garda denna oun kote trouyel djan: Dikan t'mer les, koles miro dji kamell?

⁴ Har me lendar i tikno kotar doureder djom, hatsom les, koles miro dji kamell. Me taprom leskro vast, oun moukom les bouder gar mandar te djal, lom les khere pash mande, an miri dakri isema, kay boldo vom.

⁵ T'mer ča dran o foro Yerusalem, i vesheskre bouzya oun i tserfe shounenn, har mangau t'men: Moukenn men kokres, yaake rah har khetne ham, bis te stah pre.

I triinti gili YOI

⁶ Koon hi kolla, kay venn pre dran o moulo tato them, har i yagakro dourho, hoy pre djal, te vell soungepaskro koova rhačedo? Lačo khand vell pash mende, dran ko soungepaskro koova, hoy i parepangre anenn.

⁷ Dikenn mishto kote! Kova hi o Salomeskro čiben! Shob-deesh čače morsha hi troul leste, kol zorleder morshendar an Israel.

⁸ Lače kourepangre hi le halauter, oun hayvenn mishto te kourenn le pen o rhareha. Hakeno lendar hidjrell peskro rharo ap i rig, te kourell lo pes koleha, kay čorrhanes nay vell an i rati.

⁹ O baro ray Salomo moukas pes kava čiben te krell dran kouč kasht,

¹⁰ i pire dran roup, o palstouno kotar dran sonakay, oun i pernitse dran lolo than, shoukar khetne sido kamlepah i djouvyendar an o foro Yerusalem.

¹¹ T'mer ča dran o foro Yerusalem, avenn vin! T'mer ča dran Sion dikenn o baro rayes, o Salomes! Dikenn leskri rayeskri stadi, hoy leskri day leske ap o shero čivas, ap ko dives, kay lo romedineras, oun leskro dji i barhtyatar bashras.