Kamlepaskri gili 2 - O Debleskro Lab 2024 (Sinte-Manouche)YOI 1 I tikni blouma hom me, har hi le tardo ap o telstouno them Sharon, i lilya an i tala. YOB 2 Ava, har i lilya – i lilya mank i soubyengre bourra, yaake hi miri pirni mank i čende. YOI 3 Har i phabyengro rouk mank i divye rouka an o veesh, yaake hi miro pirno mank i terne morshende. Barhteles hom beshdo an leskro shatto, oun leskre phabya hi goudlo mange. 4 Yob anas man an o molyengro kheer, oun čakras man peskro kamlepah. 5 Krenn man pale zoreles drakentsa, denn man nevi zoor phabyentsa! Miro kamlepen touke krell man nasselo. 6 Leskro servo vast hi tel miro shero čiddo, oun leskro čačo vast taprell man trouyel. YOB 7 T'mer ča dran o foro Yerusalem, i vesheskre bouzya oun i tserfe shounenn, har mangau t'men: Moukenn men kokres yaake rah har khetne ham, bis te stah pre. I douyti gili YOI 8 Miro pirno dell gole pal mande! Dik, oke vell lo, oun stell pral i bare oun tikne berge. 9 Miro pirno hi har i terni vesheskri bouzni har i terno tserfo. Kate hi lo! Pal maro kheer! Oun dikell an i vorhni, mank i kashta dren. 10 Miro pirno dell pal mande gole: Ste pre, miri pirni, miri shoukester, oun ab! YOB 11 Dik, o vend hi bouder gar, oun o brishin djas peske. 12 I bloume djan pre an o them, O tsiro o gipaske hi koy, oun i čirkle moukenn pen te shounell an maro them. 13 I fayge venn baro ap o rouk, oun i drakengre rouka soungenna yaake goudlo. Ste pre, miri pirni, miri shoukester, oun ab mantsa! 14 Miri tauba, ma khate tout glan mande, har i čirklo khatrell pes mank i bare barra, an o khatepen ap i berge! Mouk man tout te dikell, mouk man tout te shounell! Goudlo hi tiro rakepen, oun kamles dikeh tou vin. YOI 15 Taprenn menge i divye djoukle, kol tikne divye djoukle, hoy krenn o molyengro them paash! Mare drakengre rouka hidjrenn knospe. 16 Miro pirno hi miro, oun me hom leskri. Yob hatsell peskri barht mank i lilya. 17 O dives te vell shila, oun o kham djal tele, ab pash mande, miro pirno! Ab sik har i vesheskri bouzni, har i terno tserfo ap i barrengre berge! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.