Kamlepaskri gili 1 - O Debleskro Lab 2024 (Sinte-Manouche)

¹ Kate hi i shoukester gili, činlo o Salomeske.

I ersti gili YOI

² Ab oun čoumme man! Tiro kamlepen hi lačeder har mool.

³ Tiro soungepaskro djet soungell yaake lačo. Hakeno prindjrell tout. I tsele ča kamenn tout.

⁴ Le miro vast, tradas men! Miro pirno mou anell man khere pash peste! Mer kamah khetne te sanell oun barhteles te vell. Tiro kamlepen hi mange shoukeder har mool. Kol čen hi čačo, kay tout kamenna.

⁵ Kales hom oun shoukar hom, t'mer ča dran o foro Yerusalem, kalo har i plarhtene khera an o them Kedar oun har o Salomeskre stakepangre.

⁶ Ma dikenn tele ap mande, har kalo hom! O kham rhačas man kales. Mire phrala his rhoyedo ap mande, oun kaman te dap garda ap i drakengre rouka. Ap miro shoukapen nay dom kek garda.

⁷ Tou, koles miro dji kamell, pen mange, kay aneh tire bakre, te rhan le? Kay besheh tou tout tele mashkral o dives? Te nashap gar trouyel mank i bakre, te rodap tout pash i vavar bakrengre!

YOB

⁸ Djineh tou kova gar, tou shoukester mank i djouvyende, palle dja vin, oun naash pal i bakre oun le tire tikne bouzya touha, te rhan le pash o plarhtene khera, kay i bakrengre djivenn!

⁹ Tou, miri pirni, hal shoukar har i gray glan o vourdin o baro rayestar an o them Egiptia.

¹⁰ Tire čamya hi shoukar mank i kanengre, oun tiri meen hi shoukar an verklia dran mirklia.

¹¹ Sonakangre verklia kamah mer touke te krell, kay roupene mirklia dren hi.

YOI

¹² Miro pirno, miro ray, his čiddo ap peskro čiben, oun miro soungepaskro djet soungas lačes.

¹³ Miro pirno hi mange har i tikno gono pherdo soungepaskro kasht, čiddo ap miro beč.

¹⁴ Har i divye bloume mank i drakengre rouka an En-Gedi hi lo mange.

YOB

¹⁵ Har shoukar tou hal, miri pirni, tou hal yaake shoukar, tire yaka hi har taube.

YOI

¹⁶ Oun tou, miro pirno, har shoukar hal tou! Har kreh man barhtelo! Maro čiben hi an o zenlepen.

¹⁷ Shoukar zorele rouka hi maro kheer, oun rouka boud zenele patyentsa krenn pen bourhles pral mende.