Judas 1 - O Debleskro Lab 2024 (Sinte-Manouche)

I liil ap kolende, kolen o Devel peske vin rodas

¹ Me, o Youdas, činau kava liil ap t'mende, kolen o Devel peske vin rodas. Yob hi t'maro dad oun kamell t'men o djiyestar. Oun o Yezous Kristo dell garda ap t'mende. Me hom o Yezous Kristeskro boudepaskro oun o Yakobeskro phraal.

² O Debleskro kamlepen, barht oun lačepen vell boud oun boudeder pral t'mende!

I rhorhene sikepangre

³ Mire phrala oun phenya, his i tsiro, kay kamoms t'menge an i liil te činell, har lačo o Devel ap mende hi, te las lo men dran o čilačepen vin. Pral kova kamau me kanna bouder gar te činell. Kanna dikau, hi feteder, te činap t'menge, te ačenn zoreles an o patsepen. Ma moukenn t'men o Debleskro dromestar tele te anell! Leskro lab, hoy t'menge penlo vas, ačell čačo hako tsiro.

⁴ Me shounom, hi menshe koy, hoy čorrhanes mank t'mende van. Kolla kamenn o Deblestar či djinell. Yon penenn, te hi o Devel lačo, oun te nay krenn le lauter, hoy yon kamenna. Yaake djivenn le i vi-ladjedo djipen, oun denn maro rayes, o Yezous Kristes, bourhoste. Kova kokres hi maro ray. Glan i rah tsiro hi činlo, te lenn yon pengri phagi.

⁵ Ninna te djinenn t'mer kova lauter, kamau, te bistrenn gar, har o Devel, maro ray, peskre menshen dran o them Egiptia vin las. Oun ap i vavar tsiro maras lo kolen, hoy gar patsan.

⁶ Ma bistrenn vitar gar kol bolepangren, kay dan gar garda ap koy boudi, hoy o Devel len das, oun moukan pengro kheer an o bolepen. Kolen pandas lo i shellentsa, hoy kek tsireske bouder pre kerdo venn. Oun yob rikrell len stildo an i kali rat, bis te vell ko baro dives, kay i phagi pral lende vi-rakedo vella.

⁷ Yaake lan ninna kol menshe i phagi, kay djivan an i forya Sodom oun Gomorra oun an kol forya troul lende. Yon kran vi-ladjedo koova har kol bolepangre oun djan vavar mass palla. I phagi, hoy pral kol menshende vas, sikrell mende, hoy kolenge djal, kay savo koova krenna. Yon djan an i yag, hoy hako tsiro rhačella.

⁸ Oun yaake hi ninna kolla, kay dikenn sounya, oun krenn vi-ladjedo koova, oun kamenn kek rayes pral pende, oun rakrenn djoungeles pral kolende an o bolepen.

⁹ O Debleskro baro bolepaskro, leskro lab hi Mikael, las peske gar vin, te praasell lo o benges, har yob čingras pes o bengeha, koon lendar lals o moulo Moses. Yob penas leske kokres: “O Devel, maro ray, dell tout i phagi!”

¹⁰ Kolla menshe praasenn lauter, hoy le gar prindjrenna. Kova, hoy lengro mass kamella, kova krenn le yaake har i firhe, kay či djinenna. Oun yaake djan le nashedo.

¹¹ Bibarht vell ap lende! Yon djan ap o čilačo drom, kay ninna o Kayn djas. Oun i lovenge anenn le doosh ap pende, yaake har o Bileam kras. Oun yaake har o Korah merenn le. O Korah hadas pes peskre menshentsa pral o Debleskre morshende.

¹² Kol menshenge hounte ladjenn t'men. Te venn t'mer khetne, te piyenn oun te rhan, palle rhan yon pen thoulles pash t'mende oun ladjenn pen gar. Yon dikenn ap pende kokres, te djal lenge kokres mishto. Yon krenn bare laba, hoy či moldo hi. Yon hi har rouka, ap kolende či baro vella, vitar kek patria, oun kay hi tseles moulo oun venn tele dino.

¹³ Yon hi har divye panya, hoy vitsrenn pengro čik, hoy an lende hi, vin ap i phoub glan lende. Yon hi har bolepangre momlia, hoy dran pengro drom vin djan, oun hounte djan kanna hako tsireske an i kali rat.

¹⁴ Glan i rah tsiro penas pral lende o Henok, kova his o eftato dad pal o Adam: Dikenn, o Devel, maro ray, vell dran o bolepen. Oun boud zerya bolepangre hi pash leste.

¹⁵ Yob vell, te rakrell lo o čačepen vin pral i tsele menshende, oun te dell lo kolen i phagi, kay djan gar ap o Debleskro drom oun kran gar, hoy yob kamas, oun čingran ap leste čilače labentsa.

¹⁶ Kolla hi save menshe, kolenge kova gar mishto doha hi, hoy o Devel len das. Oun yon rhoyrenn pen, kay lenge gar feteder djal. Yon djivenn pal pengro shero. Yon hi sharede, kay rakrenn shoukar labentsa i menshentsa, te lenn le lendar lačo koova.

¹⁷ T'mer, mire phrala oun phenya, ma bistrenn kol laba, hoy t'menge kolla penan, kolen maro ray, o Yezous Kristo, bičras, te penenn le i menshenge leskre laba.

¹⁸ Yon penan: Glan ko tsiro, kay maro ray Yezous pale vella, venna save menshe, hoy san pral o Debleskro koova, oun djivenn yaake, har yon kamenna oun krenn, hoy o Devel gar kamella.

¹⁹ An lengro shero hi phoubyakro koova. Oun an lengro dji hi gar o Debleskro Dourho. Kolla anenn čingepen oun krenn, te rikrenn i patsle bouder gar khetne.

Djan doureder ap o Debleskro drom!

²⁰ T'mer, mire phrala oun phenya, ačenn zoreles an t'maro patsepen, hoy das t'men o Devel. Oun mangenn les yaake, har leskro Dourho an t'mende kamell.

²¹ Oun rikrenn t'men an o Debleskro kamlepen! Oun dikenn ap maro rayeste, o Yezous Kristeste! Kova hi yaake lačo ap mende, te dell lo men o djipen, hoy gar pre-herella.

²² Avenn lačes ap kol menshende, kay djinenn gar, hoy te patsenn, oun yek kopo kava patsenn oun ko vavar kopo kova. Krenn lengre djia zoreles!

²³ Vavar nashran pen. Kolen anenn ap o čačo drom! Kova hi yaake har te tserdans len dran i yag vin. Vavar djivenn i djoungelo djipen. Rakrenn ninna kolenge lačes an o dji! Oun denn garda, te krenn gar kova, hoy yon krenna. Lengro djipen hi har i čiklo ripen ap lende.

Sharas o Debles!

²⁴ Maro Debles hi i zoor, te rikrell lo t'men ap leskro drom, te hatsell lo kek doosh ap t'mende ap ko dives, kay han glan leste tardo, oun dikenn leskro raylepen, oun han barhteles.

²⁵ Sharas koles, kay kokres o Devel hi! Yob las men dran o čilačepen vin, har maro ray, o Yezous Kristo, menge meras. Maro Devel hi o baro ray. Les hi i tseli zoor kanna oun glan kava tsiro oun an ko tsiro, hoy vella. Amen.