Josua 9 - O Debleskro Lab 2024 (Sinte-Manouche)

I menshe dran Gibeon ačenn djido

¹ Oun kova, hoy i Israelitarya kran, shounan i tsele bare raya, hoy ap i vavar rig o panyestar Yordan djivan, an o pralstouno them oun ninna an o telstouno them oun pash o Baro Pani bis pash i berge Libanon. Kal bare raya his i raya pral o them Het, pral o them Amor, pral o them Kanaan, pral o them Peris, pral them Hiv oun pral o them Yebous.

² Oun yon van halauter khetne, te djan le khetne an o kourepen khatar o Yosua oun o Israel.

³ Har shounan i menshe, kay an o foro Gibeon djivenn, hoy o Yosua kolentsa kras, kay an i forya Yericho oun Ai djivan,

⁴ koy moukan le penge an i shere trouyel te djal, har nay rhorhenn le len, te ačenn le djido. Oun yaake djan le koy oun lan rhapen pentsa an phoure gone, hoy le ap pengre bourike čivan, ninna phoure molyakre gone, hoy paash his oun pale sido van.

⁵ Ap lengre pire rivan le phoure kirrha, hoy paash his oun sido van. Oun ninna lengre koola ap lende his phouro. Oun ko tselo maro, hoy le peha lan, his phouro oun har bar.

⁶ Oun yaake djan le ap koy platsa an Gilgal, kay i Israelitarya oun o Yosua his, oun penan ap leste oun ap i Israelengre morshende: “Dran i them dour katar krik vah mer, te krenn t'mer mentsa vin, te krenn kek kourepen mentsa.”

⁷ Koy penan i Israelengre morsha ap kol Hivarya: “Nay hi, te djivenn t'mer kate mashkral mende! Har nay kras mer palle savo koova t'mentsa vin?”

⁸ Oun yon penan ap o Yosua: “Tire boudepangre ham mer!” Oun o Yosua poučas: “Koon han t'mer? Dran havo them venn t'mer?”

⁹ Oun yon penan: “Dran i them dour katar krik van tire boudepangre kate pash toute. Mer shounam, har baro tiro Devel hi oun hoy yob, o baro Devel, halauter kras an o them Egiptia,

¹⁰ oun ninna halauter, hoy yob kol douy bare rayentsa pral i Amorarya kras, kay ap i vavar rig o panyestar Yordan djivan, ko rayeha Sihon, ko baro rayeha pral o foro Heshbon, oun ko rayeha Og, ko baro rayeha pral o them Bashan, koon an o foro Astarot djivas.

¹¹ Oun har kova shounam, penan mare phoureder oun halauter, hoy an maro them djivenn, ap mende: Lenn kova, hoy t'men o djipaske hounte vell, t'mentsa ap o drom! Oun djan kote pash lende oun penenn ap lende: T'mare boudepangre ham, oun krenn mentsa vin, te krenn kek kourepen mentsa!

¹² Dikenn, kate hi maro maro, hoy o dromeske his. Ap ko dives, har les mentsa lam dran mare khera, his lo gomme tato. Dikenn, hoy lestar vas, – phouro hi lo oun har bar.

¹³ Oun kal molyakre gone, kay his neve, har len khere pherdo kram, kanna van le phoure oun djan paash. Kalla mare koola oun kirrha van phoure oun djan paash ap ko dour drom, hoy hounte djam.”

¹⁴ Kote lan i pralstoune pral i Israelitarya o rhapastar kol vavarendar, hoy len o dromeske pashel his, oun rhan les. O baro Debles poučan le koleske gar.

¹⁵ Oun o Yosua kras lentsa vin, te vell kek kourepen mashkral lende douyende. Oun yob das peskro vast koy pre, te moukell lo len te djivell. Oun i pralstoune pral o Israel dan pen ninna sovel koy pre.

^16-17 Oun i Israelitarya djan doureder oun van pash i forya Gibeon, Kefira, Beerot oun Kiryat-Yearim. Kalla his i forya, kay kol morsha djivenn, kolentsa yon glan triin divessa vin kran, te krenn le lentsa kek kourepen. Koy shounan i Israelitarya, te djivenn kol menshe mashkral lende oun hi gar dran i dour them.

¹⁸ Oun i Israelitarya djan gar ap lende pre. Kova nay kran le gar dran koy sovel, hoy dan pen i pralstoune pral o Israel glan o baro Debleste, kay o Israeleskro Devel hi. Oun i tsele Israelitarya his rhoyedo pral pengre pralstunende.

¹⁹ Oun kolla penan ap i tsele menshende: “Mer dam men sovel ap o baro Debleste, kay o Israeleskro Devel hi, te kras lenge či. Doleske nay taprah len gar an,

²⁰ oun kamah maro sovel, hoy dam, te rikrell, oun moukah len te djivell, te vell gar i rholi o Deblestar pral mende. Kova kamah lentsa te krell:

²¹ Yon ačenn djide, oun venn mare boudepangre, kay kasht hounte denn oun pani hounte anenn o tselo khereske Israel.” Kol labentsa rakran i pralstoune ap i menshende an Israel.

²² Oun o Yosua moukas i morshen dran Gibeon khetne gole te dell, oun penas ap lende: “Hoske rhorhran, har penan, te han dran i dour them, oun djivenn mashkral mende?

²³ Oun kanna venn praasedo! Hako tsireske venn t'mer mare boudepangre, oun hounte denn kasht oun hounte anenn pani miro Debleskro khereske.”

²⁴ Oun yon penan ap o Yosua: “Maro ray, mer shounam, te hi kova čačo, te penas o baro Devel ap o Mose, koles leskro čačo vast his, te dell lo t'men o tselo them, oun te hounte venn halauter moulo dino, hoy dren djivenn. Doleske his men bari daar maro djipaske, oun kram kava yaake.

²⁵ Oun kanna dik, mer ham an tiro vast. Kre mentsa yaake har an tire yaka čačo hi!”

²⁶ Oun yaake kras o Yosua lentsa, oun moukas len gar an i Israelengre vasta te perell, oun moukas len gar moulo te dell.

²⁷ Oun yaake kras o Yosua, te van le boudepangre o khereske Israel, oun hounte dan kasht oun hounte anan pani i rashayenge, kay rhačran firhen o baro Debleske ap koy platsa, kay o baro Devel vin rodell. Kova hi gomme kava dives lengre boudi.