Josua 5 - O Debleskro Lab 2024 (Sinte-Manouche)

¹ Oun i tsele bare raya pral i Amorarya, kay ap koy rig o panyestar Yordan djivan, kay o kham tele djal, ninna i tsele bare raya pral i Kanaanitarya, kay pash o Baro Pani djivan, kolla halauter shounan, har las o baro Devel o pani dran o Yordan krik glan i Israelitarya, bis te yon halauter ap i vavar rig his. Oun har yon kova shounan, vas bari traash ap lende, oun an kekeste ačas i zoor te djal lo pre ap i Israelitarya.

I morsha venn činle ap pengro mass

² An ko tsiro penas o baro Devel ap o Yosua: “Kre touke barrengre čourya, oun čin kol morsh Israelitarya ap pengro mass, kay gomme gar činlo hi!”

³ Koy kras o Yosua barrengre čourya, oun činas i Israelitarya ap pengro mass. Koy platsa, kay lo kova kras, hi kanna kharedo činepaskri berga.

^4-6 Har djan i Israelitarya dran o them Egiptia vin, his i tsele morsha činlo ap pengro mass. Kolla, kay an o moulo tato them bolde van, his gomme gar činle ap pengro mass. Doleske činas o Yosua len kanna ap lengro mass. An kol star-deesh bersha har djan le an o moulo tato them trouyel, meran i tsele morsha, kay phouro doha his, te djan le an o kourepen. Yon shounan gar ap kova, hoy o baro Devel penas. Doleske hounte meran le yaake, har o baro Devel pes sovel das, te moukell lo len ko them gar te dikell, kolestar yob lengre phourenge penas oun peskro vast pre das, te dell lo len i them, kay boud thoud oun gvin hi.

⁷ I čave kolendar, kay moulo his, moukas o baro Devel bares te vell. Yon his gomme gar činlo ap pengro mass. Oun kolen činas o Yosua kanna ap lengro mass.

⁸ Oun har i tsele morsha činlo his, ačan le ap koy platsa, bis te halauter pale sasto his.

⁹ Oun o baro Devel penas ap o Yosua: “Kava dives lom koy ladj t'mendar krik, hoy ap t'mende vas, har van pandle boudepangre an o them Egiptia.” Doleske kharan le koy platsa Gilgal.

¹⁰ Oun har i Israelitarya pengre plarhtene khera pre čivan pash Gilgal an o telstouno them, kay o foro Yericho čiddo hi, kote rhan le ap i rati ko rhapen, hoy kharella Passa. Kova his ap o deesh-te-starto dives an ko čon.

¹¹ Oun ap o vavar dives rhan le kova, hoy an ko them bares vas: peklo djob oun maro, kay kek shoutlo yarro dren his.

¹² Oun pal ko dives peras bouder kek Manna dran o bolepen tele. Oun yon rhan ko djob, hoy an o them Kanaan an ko bersh dren anlo vas.

O pralstouno pral o Debleskre kourepangre vell pash o Yosua

¹³ His i dives, har o Yosua pash o foro Yericho his, koy dikas yob ap yek kopo i morshes glan peste. Koles his peskro rharo an o vast. Oun o Yosua djas pash leste oun penas: “Ap koneskri rig hal tou? Ap mari rig? Ap i vavarengri rig?”

¹⁴ Oun yob penas: “Kek kol douyendar! Me hom o pralstouno pral o baro Debleskre lourdende. Oun kanna vom kay.” Kote peras o Yosua ap peskro mouy ap i phoub, oun mangas les an, oun penas ap leste: “Me hom tiro boudepaskro. Hoy penell miro ray ap mande, te krap?”

¹⁵ Koy penas o pralstouno pral o baro Debleskre lourdende ap leste: “Rib tire kirrha vin! I phoub, ap koy tou tardo hal, hi o Debleskri phoub.” Oun o Yosua kras yaake.