Josua 4 - O Debleskro Lab 2024 (Sinte-Manouche)

Bare barra venn pre-čidde, te bistrenn i menshe gar, hoy kote djas

¹ Oun har i tsele menshe ap i vavar rig o panyestar Yordan his, koy penas o baro Devel ap o Yosua:

² “Lenn t'menge deesh-te-douy morshen – yekes dran haki bari familya, hoy vell kol deesh-te-douy Israeleskre čavendar,

³ oun penenn lenge: Hadenn t'menge deesh-te-douy barra pre mashkral dran o Yordan, kote kay i rashayengre herya tardo his. Oun lenn len t'mentsa oun čivenn len ap koy platsa, kay ačenn kay rat!”

⁴ Kote das o Yosua kol deesh-te-douy morshen gole, kolen yob dran i Israelitarya vin rodas, yek dran haki bari familya, hoy vell kol deesh-te-douy Israeleskre čavendar.

⁵ Oun yob penas ap lende: “Djan mashkral an o pani glan o morhton, kay i laba t'maro baro Deblestar dren hi! Oun hakeno t'mendar hadell yek bar ap leskro phik, yek bar haki bari familyake, hoy vella kol deesh-te-douy Israeleskre čavendar.

⁶ Oun kol barra te venn i sikepen t'menge. Te vell ko tsiro, kay poučenn t'mare čave: Hoske hi kal barra kay?

⁷ Palle penenn t'mer lenge: O pani dran o Yordan ačas tardo glan o morhton, kay o baro Debleskre deesh laba dren his, har vas o morhton mank o pani ap i vavar rig hidjedo. Oun kal barra hi kate, te bistrenn i Israelitarya kova kek tsireske.”

⁸ Oun kote kran i Israelitarya yaake har o Yosua kova lenge penas, oun djan koy oun hadan mashkral an o Yordan deesh-te-douy barra pre, yaake har o baro Devel kova ap o Yosua penas, – yek bar haki bari familyake, hoy vell i deesh-te-douy Israeleskre čavendar. Oun yon anan kol barra ap koy platsa, kay pengre plarhtene khera tardo hi. Kote čivan le i barra tele.

⁹ Deesh-te-douy vavar barra čivas o Yosua mashkral an o pani Yordan, kote kay i herya kol rashayendar tardo his, kay hidjran o morhton, kay o Debleskre deesh laba dren hi. Oun kote hi kol barra ninna gomme kava dives.

¹⁰ Oun kol rashaya, kay ko morhton hidjrenn, ačan mashkral an o pani Yordan tardo, bis te halauter kerdo his, hoy o baro Devel ap o Yosua penas, te penell lo kova i tsele menshenge, yaake har o Mose kova ap o Yosua penas. Oun i tsele menshe djan sik vergel.

¹¹ Oun har i tsele Israelitarya ap i vavar rig his, koy djan ninna kol rashaya ap i vavar rig, kay hidjrenn ko morhton, kay i laba o baro Deblestar dren hi. Oun yon djan glan i menshende.

¹² Oun i morsha, kay dran o kheer Ruben oun dran o kheer Gad his, oun kol paash kolendar dran o kheer Manasse, kolla lan pengre rhare pentsa, oun djan glan i vavar Israelitarya, yaake har o Mose kova glan i tsiro ap lende penas.

¹³ Yaake 40.000 (star-deesh-zerya) lourde djan an o kourepen an o telstouno them pash o foro Yericho. Oun o baro Devel his lentsa.

¹⁴ Oun ap ko dives kras o baro Devel o Yosua bares glan i yaka kol tsele menshendar Israel. Oun an leskro tselo djipen dikan le pre ap leste, yaake har le kova ninna o Moseha kran.

¹⁵ Oun o baro Devel penas ap o Yosua:

¹⁶ “Pen ap i rashaya, kay o morhton hidjrenn, kay o Debleskre deesh laba dren hi, te venn le dran o pani Yordan vin.”

¹⁷ Kanna penas o Yosua ap i rashayende: “Avenn vin dran o Yordan!”

¹⁸ Oun har i rashaya kova kran, oun lengre herya ap o them čivan, vas o pani an o Yordan pale oun nashas pale yaake pral i tsele rigya har glan ko tsiro.

¹⁹ Kova his o deshto dives an o glanstouno čon, har i Israelitarya ap i vavar rig o panyestar Yordan van. Oun yon čivan pengre plarhtene khera pre ap i platsa, hoy kharella Gilgal. Kay platsa hi pash o foro Yericho ap koy rig, kay o kham pre djala.

²⁰ Oun kol deesh-te-douy barra, hoy yon dran o Yordan lan, čivas o Yosua kote ap i platsa Gilgal

²¹ oun penas ap i Israelitarya: “Te vell i tsiro, kay poučenn t'mare čave pengre dadendar: Hoske hi kal barra kate?

²² Palle penenn t'mer lenge: Har i Israelitarya mashkral o pani Yordan djan, van lengre herya gar sapenes.

²³ T'maro baro Devel moukas o Yordan glan t'mende trouk te vell, bis te djan halauter vergel. Yaake har o baro Devel kova ninna o Baro Lolo Panyeha kras.

²⁴ Oun kova kras lo doleske, te dikenn i tsele natsyone ap kay phoub, har zorelo o baro Devel hi. Oun t'mer hounte rikrenn t'menge hako tsiro t'maro baro Debles glan i yaka.”