Josua 3 - O Debleskro Lab 2024 (Sinte-Manouche)

I Israelitarya djan vergel o pani Yordan

¹ Oun o vavar dives stas o Yosua oun i tsele Israelitarya sik pre, moukan i platsa Shittim pal pende, djan doureder oun van pash o pani Yordan. Kote ačan le i tikno tsiro, bis te nay djan le vergel.

² Ap o triinto dives bičras o Yosua i pralstunen pral i tseli platsa,

³ oun moukas i menshenge te penell: “Ap ko tsiro, kay dikenn t'mer, har hidjrenn i rashaya dran o kheer Levi ko morhton, kay o Debleskre deesh laba dren hi, hoy t'men t'maro baro Devel das, palle stenn pre, oun djan pal o morhton!

⁴ Ko morhton sikrell t'men o drom, hoy hounte djan. Bis kanna djan t'mer ko drom gomme gar. Rikrenn t'men i kotar pal ko morhton! Moukenn yaake yek kilometari mank leste oun t'mende!”

⁵ Oun o Yosua penas ap i menshende: “Krenn t'men djoudjo o Debleske! Taysar krell o baro Devel i baro koova mashkral t'mende.”

⁶ Oun ap i rashayende penas lo: “Hadenn o morhton pre, kay o Debleskre deesh laba dren hi! Oun djan glan i menshende glan!” Koy hadan le o morhton pre, oun djan i menshenge glan vin.

⁷ Oun o baro Devel penas ap o Yosua: “Kava dives krau me tout bares glan i yaka i tsele Israelendar, te hayvenn le: Yaake har homs o Moseha, yaake hom ninna touha!

⁸ Tou pen ap i rashaya, kay hidjrenn ko morhton: Te venn t'mer pash o pani Yordan, ačenn an o pani tardo!”

⁹ Oun o Yosua penas ap i Israelitarya: “Avenn kate! Oun shounenn, hoy t'maro baro Devel t'menge penell:

¹⁰ Ap kava dikenn, te hi o djido Devel mashkral t'mende, oun te tradell lo glan t'mende i Kanaanitarya vin, ninna i Hetarya, i Hivarya, i Perisarya, i Girgasharya, i Amorarya oun i Yebousarya.

¹¹ Dikenn, o morhton, kay i laba o rayestar pral i tseli phoub dren hi, djal glan t'mende an o pani Yordan.

^12-13 Yaake sik, har čivenn i rashaya, kay hidjrenn ko morhton, pengre herya an o pani oun ačenn kote tardo, ačell o pani tardo. O pani, hoy nashell pral tele, ačell tardo har i kheer. Kanna lenn t'menge 12 (deesh-te-douy) morshen, yekes dran haki bari familya, hoy vell kol deesh-te-douy Israeleskre čavendar!”

¹⁴ Oun i menshe djan vin dran lengre plarhtene khera, te djan le vergel o pani Yordan. Oun i rashaya, kay hidjrenn ko morhton, kay o Debleskre deesh laba dren hi, djan lenge glan vin.

¹⁵ Kova his an ko tsiro, kay anenn le o djob dren. An ko tsiro his yaake boud pani an o Yordan, te djal o pani pral i rigya. Har kanna i rashaya pengre herya an o pani čivan,

¹⁶ ačas o pani, hoy pralstounes lendar his, tardo har i kheer dour pral pash o foro Adam, hoy pash Zaretan čiddo hi. Oun ko pani, hoy telstounes lendar his oun tele an o Londo Baro Pani nashell, kova nashas bouder gar pal oun djas krik. Oun yaake nay djan i tsele menshe ap i vavar rig, pash ko foro Yericho.

¹⁷ Oun i rashaya, kay o morhton hidjrenn, kay o Debleskre deesh laba dren hi, kolla ačan tardo mashkral an o pani Yordan ap i phoub, hoy his bouder gar sapeno, bis te djan i tsele Israelitarya ap i vavar rig.