Josua 23 - O Debleskro Lab 2024 (Sinte-Manouche)

O Yosua rakrell ap i menshende glan peskro merepen

¹ Boud bersha djan trouyel, kay kras o baro Devel, te nay djivan i Israelitarya an o lačepen kol thementsa troul lende. Kek kolendar kouras pes lentsa. Oun o Yosua vas phouro. Les his i lengsto djipen.

² Kote das lo i tsele pralstunen pral Israel pash peste khetne gole: i phoureder, oun i pralstoune pral i bare familye, i čačepangre morsha oun vavar pralstoune, oun penas ap lende: Me vom phouro, oun man his i lengsto djipen.

³ Oun t'mer dikan halauter, hoy t'maro baro Devel kol tsele thementsa kras t'menge. Yob hi kova, kay pes t'menge lentsa kouras.

⁴ Dikenn, me dom t'men ko tselo them mank o pani Yordan oun ko Baro Pani, hoy kote čiddo hi, kay o kham tele djal. Yaake har i barra peran, dom t'mare deesh-te-douy bare familyen lengro kotar them, ninna ko them, kolengre menshe gomme gar vin tradedo hi.

⁵ Kolen tradell o baro Devel, kay t'maro Devel hi, glan t'mende vin. Oun t'mer lenn lengro them t'menge, yaake har t'maro baro Devel t'menge penas, te vell kova.

⁶ Doleske rikrenn zoreles ap halauter, hoy činlo hi an o Moseskre lila! Rikrenn leskre tsele laba! Čivenn kek lendar ap i rig!

⁷ Ma čivenn t'men khetne kol vavar menshentsa, kay gomme an kava them djivenn. Lengre deblen denn gar an-gole! Ma denn t'men sovel pash lende! Ma anenn lenge firhen oun vavar koova! Ma vitsrenn t'men tele glan lende!

⁸ O baro Devel hi t'maro Devel. Ap leste rikrenn t'men, yaake har ap leste rikran bis ap kava dives.

⁹ O baro Devel tradas bare oun zorele natsyone glan t'mende vin. Kek nay stakras glan t'mende pre, oun nay vas zorleder har t'mer, bis ap kava dives.

¹⁰ Yek morsh t'mendar tradell yek-sero morshen. T'maro baro Devel, yob hi kova, kay kourell pes t'menge lentsa, yaake har lo penas.

¹¹ Doleske denn yak koy pre, – djal t'maro djipaske – te kamenn t'maro baro Debles o tselo djiyestar!

¹² Te rissrenn t'mer t'men lestar tele, oun čivenn t'men kol vavar menshentsa khetne, kay gomme an kava them djivenn, oun romedinerenn len,

¹³ palle djinenn, palle tradell o baro Devel gar bouder kal vavar menshen glan t'mende vin dran o them. Oun yon venn t'menge har dorya oun netse, an kolende t'mer tapedo venn, oun har čoupnia ap t'mare dume, oun doukrenn t'men har i kasht an o yak. Kova djal yaake dour, bis te kek t'mendar bouder an kava lačo them hi, hoy t'maro baro Devel t'men das.

¹⁴ An i tikno tsiro merau, har hakeno ap kay phoub hounte merell. T'mer djinenn, te peras kek lab ap i phoub kol tsele lače labendar, hoy o baro Devel pral t'mende penas. Lenn kova ap o dji: Lauter, hoy yob penas, vas yaake har yob penas. Kek lab peras tele.

^15-16 Oun yaake har ko tselo lačo lab čačo vas, hoy t'maro baro Devel ap t'mende penas, yaake hi kova ninna kol čilače labentsa. Te rikrenn t'men gar ap kova, hoy t'maro baro Devel t'mentsa vin kras, oun djan pash vavar debla, oun mangenn len an, palle vell o baro Debleskri rholi pral t'mende. Oun sik ačell bouder kek t'mendar djido an kava lačo them, hoy t'maro baro Devel t'men das.