Josua 20 - O Debleskro Lab 2024 (Sinte-Manouche)

I naashepangre forya

¹ Oun o baro Devel penas ap o Yosua:

² Pen ap i Israelitarya: “Rodenn t'menge forya vin, kay kolla nay nashenna, kay ap o naashepen hi – save forya, kolendar me o Moseske penom, te krenn t'mer.

³ Kote nay nashell yek, kay das i vavares moulo oun kamas kova gar, oun les kek doosh koy pre his. Kal forya hi saveske, kay hounte khatrell pes kolestar, kay kamell o rat ko maredo menshestar ap o marepaskro pale te anell.

⁴ Koon pash sau foro nashell, hounte ačell tardo glan o foreskro voudar oun anell leskro koova glan i phourende an kava foro. Oun kolla lenn les palle an o foro pash pende pre, te nay djivell lo pash lende.

⁵ Oun te lell les kova palla, kay kamell les moulo te dell, palle denn kol morsha dran ko foro koles, kay yekes temerl das, gar vin an koleskro vast. Ninna te das yob yekes moulo, kamas lo kova gar, oun his gar rhoyedo ap leste.

⁶ Yob nay ačell an ko foro, bis te yob glan i tsillo tardo his, oun o čačepen pral leste vin kerdo vas. Oun yob ačell palle an ko foro, bis te meras o baro rashay, kay an ko tsiro djivell. Palle nay djal kova, kay yekes temerl das, pale pale an peskro kheer oun an peskro foro, kolestar yob hounte nashas.”

⁷ Oun i morsha dran Israel rodan kal forya vin, te venn le naashepangre forya: o foro Kedesh an o them Galilea ap i berga Naftali; o foro Sichem an o them Efrayim; oun o foro Kiryat-Arba, hoy hi kanna Hebron, ap i berge Youda.

⁸ Ap i vavar rig o panyestar Yordan pash o foro Yericho rodan le vin: o foro Bezer an o moulo them ap ko pralstouno kotar them, kay i menshe dran o kheer Ruben djivan; o foro Ramot an o them Gilead ap o kotar them, kay i menshe dran o kheer Gad djivan; oun o foro Golan an o them Bashan ap ko kotar them, kay i menshe dran o kheer Manasse djivan.

⁹ Kolla his kol naashepangre forya, kay nay nashenn i tsele Israelitarya oun ninna i vi-themarya, kay pash lende djivenn. Kote nay nashas hakeno, kay das yekes moulo, oun kamas kova gar, te vell lo gar kolestar temerl dino, kay leskro rat kamell. Kote nay ačell lo, bis te yob glan i tsillo tardo his, kay o čačepen pral leste vin kerdo vell.