Josua 2 - O Debleskro Lab 2024 (Sinte-Manouche)

Douy morsha djan čorrhanes an o foro Yericho

¹ Oun har yon ap i platsa Shittim his, bičras o Yosua, koleskro dad o Noun hi, čorrhanes douy morshen vin oun penas ap lende: “Djan oun dikenn, har zorelo o them hi, ninna o foro Yericho!” Koy djan le oun van an i kheer, kay i loubni djivas. Koya kharas Rahab. Oun yon djan dren, te ačenn le kote pral i rat.

² An kay rat vas o baro rayeske pral o foro Yericho penlo: “Shoun, an kaya rat van morsha kol menshendar Israel an o foro, te dikenn le čorrhanes, har zorelo maro them hi.”

³ Koy bičras lo morshen pash i Rahab oun moukas lake te penell: “De kol morshen vin, kay pash toute an tiro kheer van. Yon van te dikenn le, har zorelo maro them hi.”

^4-6 Koy djouvel anas kol douy morshen pral pre ap o kheer oun khatras len tel flakstikre ranya, hoy kote čiddo his. Oun yoy penas ap kol bičepangre o baro rayestar: “Ava, douy morsha van pash mande. Me djinom gar, dran havo them yon venn. Oun ap i rat, gomme glan ko tsiro, kay o foreskre bare voudya pandlo venn, djan kol douy morsha pale vin. Me djinau gar, kay le djan. Kanna nashenn lenge sik palla! Palle taprenn len gomme!”

⁷ Oun kol bičepangre tradan len palla ap ko drom, hoy pash o pani Yordan oun koy vergel djal. Oun har yon vin glan o foro his, vas o baro voudar pal lende pandlo.

⁸ Oun i Rahab djas pash kol douyende pre, har kolla pen gomme gar tele čivan,

⁹ oun penas ap lende: “Me hayvom, te das o baro Devel t'men kava them. I bari traash glan t'mende peras ap mende. Oun hakeno, kay kate djivell, hi har bango daryatar glan t'mende.

¹⁰ Mer shounam, har kras o baro Devel t'menge i drom an o baro pani, hoy kharella Baro Lolo Pani, har djan dran o them Egiptia vin. Shounam ninna, hoy kran t'mer kol douy bare rayentsa pral i Amorarya, o Sihon oun o Og, hoy ap i vavar rig o panyestar Yordan his. T'mer maran len oun kran halauter paash, hoy lenge his.

¹¹ Oun har kova shounam, vas bari traash ap mende, oun an kekeste mendar ačas i zoor, te djal lo pre ap t'mende. O baro Devel hi t'maro Devel, oun hi o Devel pral an o bolepen oun kate tele ap i phoub.

¹² Kanna denn t'men kate sovel pash o baro Debleste, te venn lačes ap miro dadeskro kheer, yaake har me lačes ap t'mende homs. Oun denn man čomone, hoy sikrell man,

¹³ te moukenn miro dades oun miri dat te djivell, oun ninna mire phralen oun mire phenyen oun lauteren, hoy pash lende hi! Denn man i sikepen, te denn men gar an o merepen!”

¹⁴ Kote penan kol morsha ap late: “Mer dah men sovel pash maro djipen: Te phoukreh tou men gar, krah mer kek čilačepen ap t'mende ap ko tsiro, kay dell men o baro Devel kava them, oun vah lačes ap t'mende.”

¹⁵ Kote moukas li len ap yek shello dran i vali tele. Lakro kheer his kerdo an i pre-čidde barra, hoy djan troul o foro.

¹⁶ Oun yoy penas ap lende: “Djan an i berge, te nay hatsenn t'men kolla gar, kay t'men palla lenn. Oun khatrenn t'men kote triin divessa. Palle hi kolla, hoy t'men palla lan, pale khere. Oun t'mer djan t'maro drom.”

¹⁷ Kote penan kol morsha ap late: “Mer krah yaake, har men kay sovel dam, hoy tou kamal te das mer tout.

¹⁸ Te vah an o them, palle pande kava lolo shello an koy vali, kay tou men tele moukal! Oun le tiro dades oun tiri dat oun tire phralen oun tiri tseli dadeskri familya pash toute an tiro kheer khetne!

¹⁹ Oun hakeno, koon lendar pale vin djal, koleskro rat vell ap leskro shero! Oun mari sovel his gar koleske. Hakeno, kay an tiro kheer hi oun vell maredo, koleskro rat vell ap maro shero!

²⁰ Oun ninna te phoukreh tou ap mende, palle hounte rikras gar mari sovel, hoy tou mendar kamal.”

²¹ “Ava”, penas li, “yaake har t'mer penan, yaake vell ninna!” Oun yoy moukas len te djal. Oun har yon penge djan, pandas li ko lolo shello an i vali.

²² Oun yon djan penge, oun van an i berge oun ačan kote triin divessa, bis te his kolla, kay len palla lan, pale pale. Oun kolla, kay len palla lan, rodan len ap i tsele dromma, oun hatsan len gar.

²³ Kol douy morsha rissran pale trouyel, djan i berge tele oun djan vergel o pani oun van pash o Yosua, koleskro dad o Noun his, oun penan leske halauter, hoy lenge djas.

²⁴ Oun yon penan ap o Yosua: “O baro Devel das o tselo them an maro vast. Ninna halauter kolla, kay koy djivenn, hi har bango daryatar glan mende.”