Josua 19 - O Debleskro Lab 2024 (Sinte-Manouche)

O them i menshenge dran o kheer Simeon

¹ Oun o douyto kopo van i barra vitsedo, kava kopo peran le ap o kheer Simeon oun leskre familye. Oun lengro kotar them his mashkral dren an o them Youda.

² Oun lenge van kal forya: Beersheba, Shema, Molada,

³ Hazar-Shoual, Baala, Ezem,

⁴ Eltolad, Betoul, Horma,

⁵ Siklag, Bet-Markabot, Hazar-Soussa,

⁶ Bet-Lebaot oun Sharouen. Kolla his 13 (deesh-te-triin) forya oun lengre gaba.

⁷ Koy pashel van kol forya: Ayin, Rimmon, Eter oun Ashan; kolla his khetne star forya oun lengre gaba.

⁸ Oun koy pashel his kol tsele gaba, kay his čiddo troul kol forya. Kote, kay o kham pralstounes tardo hi, djas kava them bis pash o foro Baalat-Beer, hoy kharell ninna Ramat-Negev. Kova his o them, hoy lan i familye dran o kheer Simeon.

⁹ Oun kava them vas dran o them Youda vin lino. Har las o kheer Youda peskro them, his kova bareder har len hounte vals. Doleske las o kheer Simeon peskro kotar them mashkral dren an them Youda.

O them i menshenge dran o kheer Zabulon

¹⁰ Oun i barra van o triinto kopo vitsedo. Oun kava kopo peran le ap o kheer Zabulon oun leskre familye. Oun lengro them djas bis pash o foro Sarid,

¹¹ oun palle doureder pral ap koy rig, kay o kham tele djal, bis pash o foro Marala oun doureder bis pash o foro Dabbeshet oun palle bis pash ko tikno pani, hoy nashella vergel o foro Yokneam.

¹² Kote, kay o kham pre-djal, djas ko them foun o foro Sarid bis pash ko kotar them pash o foro Kislot-Tabor, oun doureder bis pash o foro Daberat, oun foun kotar pral pash o foro Yafia,

¹³ oun doureder kote, kay o kham pre djal, bis pash kol forya Gat-Hefer oun Et-Kazin, oun doureder bis pash o foro Rimmon oun doureder bis pash o foro Neah.

¹⁴ Foun kotar djas ko drom, hoy sikrell har dour o them djal, doureder pash o foro Hannaton oun doureder bis pash i tala Ifta-El.

¹⁵ Koy pashel las o kheer Zabulon 12 (deesh-te-douy) forya oun lengre gaba. Kal forya his: Kattat, Nahalal, Shimron, Yidala oun Betlehem.

¹⁶ Kava his o them oun i forya oun lengre gaba, hoy lan i familye dran o kheer Zabulon.

O them i menshenge dran o kheer Issakar

¹⁷ Oun i barra van o starto kopo vitsedo, oun kava kopo peran le ap o kheer Issakar oun leskre familye.

¹⁸ An lengro them his kol forya: Yesreel, Kessoulot, Shounem,

¹⁹ Hafarayim, Shion, Anaharat,

²⁰ Rabbit, Kishyon, Ebez,

²¹ Remet, En-Gannim, En-Hadda oun Bet-Pazez.

²² Oun o them Issakar djas bis pash i berga Tabor oun pash kol forya Shassayim oun Bet-Shemesh oun doureder bis pash o pani Yordan. Khetne his an kava them 16 (deesh-te-shob) forya oun lengre gaba.

²³ Kava his o them oun i forya oun lengre gaba, hoy lan i familye dran o kheer Issakar.

O them i menshenge dran o kheer Asser

²⁴ Oun i barra van o pančto kopo vitsedo, oun yon peran ap o kheer Asser oun leskre familye.

²⁵ Oun an lengro them his kal forya: Helkat, Hali, Beten, Akshaf,

²⁶ Alammelek, Amad oun Mishal. Oun kote, kay o kham tele djal, djas ko drom, hoy sikras har dour o them djal, bis pash i berga Karmel oun pash o lengsto pani Libnat.

²⁷ Kote kay o kham pre djal, djas ko drom foun o foro Helkat bis pash o foro Bet-Dagon, oun vell bis pash o them Zabulon oun i tala Ifta-El. Foun kotar djal o drom doureder ap koy rig, kay norden hi, pash kol forya Bet-Emek oun Neyel, oun doureder pash i forya Kaboul,

²⁸ Ebron, Rehob, Hammon oun Kana, oun doureder bis pash o baro foro Sidon.

²⁹ Foun kotar djas o drom bis pash o foro Rama, oun doureder bis pash ko zorelo foro Tirus, palle bis pash o foro Hosa oun doureder bis pash o Baro Pani. An o them Asser his i forya Mahaleb, Aksib,

³⁰ Oumma, Afek oun Rehob čiddo. Khetne his kote 22 (biish-te-douy) forya oun lengre gaba.

³¹ Oun kava his o them oun i forya oun lengre gaba, hoy lan i familye dran o kheer Asser.

O them i menshenge dran o kheer Naftali

³² Oun i barra van o shobto kopo vitsedo, oun yon peran ap o kheer Naftali oun leskre familye.

³³ Oun ko drom, hoy sikras, har dour lengro them djal, djas foun o baro rouk pash Zaanannim, hoy pash o foro Helef tardo his, doureder pash i forya Adami-Nekeb oun Yabneel bis pash o foro Lakkoum, oun palle bis pash o pani Yordan.

³⁴ Oun kote, kay o kham tele djal, djas o drom bis pash o foro Asnot-Tabor oun doureder bis pash o foro Houkok. Oun kote, kay o kham pralstounes tardo hi, djas o them Naftali bis pash o them Zabulon. Oun kote, kay o kham tele djal, djas o them Naftali bis pash o them Asser. Oun kote kay o kham pre djal, djas o them Naftali bis pash o pani Yordan.

³⁵ Oun an o them Naftali his kal zorele forya: Siddim, Zer, Hammat, Rakkat, Génésareth,

³⁶ Adama, Rama, Hazor,

³⁷ Kedesh, Edrei, En-Hazor,

³⁸ Yiron, Migdal-El, Horem, Bet-Anat oun Bet-Shemesh. Kolla his khetne 19 (deesh-te-enya) forya oun lengre gaba.

³⁹ Kova his o them oun i forya oun lengre gaba, hoy lan i familye dran o kheer Naftali.

O them i menshenge dran o kheer Dan

⁴⁰ Oun o eftato kopo van i barra vitsedo, oun kava kopo peran le ap o kheer Dan oun leskre familye.

⁴¹ Oun an kava them his kal forya: Zora, Eshtaol, Ir-Shemesh,

⁴² Shaalbim, Ayalon, Yitla,

⁴³ Elon, Timna, Ekron,

⁴⁴ Elteke, Gibbeton, Baalat,

⁴⁵ Yehoud, Bene-Berak, Gat-Rimmon,

⁴⁶ Me-Yarkon oun Rakkon oun ko kotar them troul o foro Yafo.

⁴⁷ I menshe dran o kheer Dan nay rikran pengro them gar. Doleske djan le pre oun kouran pen o foreha Leshem, oun lan les dren oun maran i menshen kote. Palle djivan le kote, oun dan o fores Leshem o lab Dan pal pengro phouro dadeste.

⁴⁸ Kalla forya oun lengre gaba his an ko them, hoy lan i familye dran o kheer Dan.

O Yosua lell peskro kotar them

⁴⁹ Oun har hakenes peskro them his, dan i Israelitarya yek kotar them pendar ko morsheste Yosua, koleskro dad o Noun his, te vell kova leskro.

⁵⁰ Oun yaake har o baro Devel kova penas, dan le les ko foro, hoy yob lendar kamas. Kova his o foro Timnat-Zera ap i berge Efrayim. Oun yob čivas kava foro pale pre oun djivas koy.

⁵¹ Oun yaake dan o rashay Elazar oun o Yosua, koleskro dad o Noun his, khetne kol pralstunentsa pral kol 12 (deesh-te-douy) bare familye hakeneste peskro them, yaake har i barra sikran, hoy le vitsran. Kova vas kerdo, har his le khetne glan o baro Debleste, glan o voudar leskro plarhteno kherestar an o foro Shilo. Oun yaake las kote hakeno peskro kotar them.