Josua 16 - O Debleskro Lab 2024 (Sinte-Manouche)

O kheer Yosef lell peskro them

¹ Oun o khereske Yosef peran i barra yaake, te las lo ko them, hoy djas foun o pani Yordan – foun kotar, kay o foro Yericho čiddo hi – bis pash o foro Betel. Ko drom, hoy sikras, har dour o them djal, djas foun koy rig o forestar Yericho, kay o kham pre djal oun kay kol tikne panya hi, doureder an o moulo them, oun doureder bis an kol berge, kay o foro Betel čiddo his.

² Oun o forestar Betel djas o drom doureder pash o foro Louz oun an o them dren oun pale vin, kay i Arkarya djivenn, bis pash o foro Atarot,

³ oun doureder ap koy rig, kay o kham tele djal, an ko them, kay i Yafletarya djivenn, bis pash o telstouno foro Bet-Horon, oun doureder bis pash o foro Geser, oun foun kotar pash o Baro Pani.

⁴ Kava hi o them, hoy lan i čave o Yosefestar, o Manasse oun o Efrayim.

O them i menshenge dran o kheer Efrayim

⁵ Oun kava hi o them, hoy las o kheer Efrayim: Ap koy rig, kay o kham pre djal, djas o drom, hoy sikras, har dour o them djal, foun o forestar Atarot-Addar bis pash o pralstouno foro Bet-Horon,

⁶ oun doureder bis pash o Baro Pani. O foro Mikmetat his kote čiddo, kay norden hi. Kotar djas o drom doureder kote, kay o kham pre djal, bis pash o foro Taanat-Shilo oun doureder pash o foro Yanoa.

⁷ Foun o foro Yanoa djas o drom tele pash i forya Atarot oun Naara oun doureder bis pash o foro Yericho, oun foun kotar pash o pani Yordan.

⁸ Foun o foro Tapoua djas o drom kote, kay o kham tele djal, pash ko tikno pani, hoy kharell Kana, oun doureder pash o Baro Pani. Kova hi o them, hoy lan i familye dran o kheer Efrayim.

⁹ Koy pashel lan le boud forya oun i gaba koy trouyel, hoy an o them Manasse čiddo his.

¹⁰ Oun yon tradan i Kanaanitarya gar vin, hoy an o foro Geser djivan. Oun i Kanaanitarya djivenn mashkral i Efrayimarya bis ap kava dives. Oun yon hounte boudran lenge.