Josua 15 - O Debleskro Lab 2024 (Sinte-Manouche)

O them i menshenge dran o kheer Youda

¹ Oun i barra peran o khereske Youda yaake, te lan le ko kotar them, hoy djas bis pash o them Edom, bis an o moulo them Tsin, kote kay o kham pralstounes tardo hi.

² Ap koy rig, kay o kham pralstounes tardo hi, sikras i drom, har dour o them djas. Ko drom djas foun o Londo Baro Pani – foun leskro palstouno kotar kote, kay o kham pralstounes tardo hi –

³ doureder pash i berga Akrabbim, oun kotar doureder an o moulo them Tsin, oun pale doureder troul o foro Kadesh-Barnea ap koy rig, kay o kham pralstounes tardo hi, oun doureder bis pash kol forya Hesron oun Addar, oun doureder pash o foro Karka,

⁴ oun doureder bis Azmon. Foun Azmon djas ko drom bis an koy tala, pal late o them Egiptia hi, oun an i tala doureder bis pash o Mashkralstouno Baro Pani. Yaake dour djas o them ap koy rig, kay o kham pralstounes tardo hi.

⁵ Ap koy rig, kay o kham pre djal, djas o them bis pash o Londo Baro Pani, oun pral bis kote, kay o Yordan dren nashell. Koy nordetikri rig o themestar his ko drom, hoy djas foun kotar, kay o Yordan an o Londo Baro Pani nashell,

⁶ doureder bis pash o foro Bet-Hogla, oun doureder ap i nordetikri rig o forestar Bet-Araba pral bis pash o bar Bohan, hoy kharedo hi pal o čaveste o morshestar Ruben,

⁷ oun doureder an i tala Akor oun pral pash o foro Debir, oun doureder ap koy nordetikri rig pash o foro Gilgal. O foro Gilgal his čiddo ap i vavar rig o dromestar, hoy djas an i berga Adoummim. Kay berga hi ap koy rig foun i tala, kay o kham pralstounes hi. Oun ko drom, hoy sikras, har dour o them djal, djas foun o foro Gilgal doureder pash o pani En-Shemesh oun pash o pani, hoy kharell En-Rogel,

⁸ oun foun kotar doureder pre an i tala Ben-Hinnom, hoy ap koy rig koy bergatar čiddo hi, kay o kham pralstounes tardo hi. Ap koy berga hi ko foro čiddo, kay i Yebousarya djivan. Kava foro hi kanna Yerusalem. Oun kotar djas o drom doureder bis pral pre ap i berga, hoy hadell pes ap koy rig foun i tala Hinnom, kay o kham tele djal. Kay berga hi čiddo ap i nordetikri rig ko telstouno themestar, hoy kharell Refayim.

⁹ Foun kotar pral ap kay berga djas o drom tele troul i berga trouyel oun pash ko pani, hoy kharell Me-Neftoa, oun pash kol forya, hoy pash i berge Efron čiddo hi. Oun kotar djas ko drom tele pash o foro Baala – kova hi kava dives Kiryat-Yearim.

¹⁰ Oun foun o foro Baala djas o drom pash i berge Seir, hoy kote čiddo hi, kay o kham tele djal. Foun kotar djas doureder ap i nordetikri rig koy bergatar Yearim – lakro vavar lab hi Kesalon – oun palle tele pash o foro Bet-Shemesh oun doureder an o foro Timna;

¹¹ oun palle doureder ap i tikni berga, hoy ap i nordetikri rig o forestar Ekron hi, oun doureder pash o foro Shikkaron oun doureder pash i berga Baala, oun doureder bis pash o foro Yabneel oun pash o Baro Pani.

¹² Ap koy rig, kay o kham tele djal, djas o them bis pash o Baro Pani. Kava hi o them, hoy lan i familye dran o kheer Youda.

O Kaleb lell o foro Hebron

¹³ Oun o Yosua das o Kalebes peskro foro mashkral dren an o them Youda, yaake har o baro Devel ap o Yosua penas, te krell lo kova. Kava foro kharas Arba, oun kharell kanna Hebron. O Arba his o phouro dad kol menshendar, kay kharenn Anakarya.

¹⁴ Kote djivan kol triin bare familye, kolengre phoure dada o Sheshay oun o Ahiman oun o Talmay his. Kolla van o morshestar Anak. Oun o Kaleb tradas len vin dran o foro.

¹⁵ Oun yob djas doureder oun kouras pes kolentsa, kay an o foro Debir djivenn. Oun ko foro kharas glan kova Kiryat-Sefer.

¹⁶ Oun o Kaleb penas: “Koon Kiryat-Sefer kourell oun dren lell, koles dau miri čat Aksa, te vell li leskri romni.”

¹⁷ Kote las o Otniel o foro dren. Koleskro dad his o Kenas, koleskro phraal his o Kaleb. Oun o Kaleb das les peskri čat Aksa, te vell li leskri romni.

¹⁸ Oun har li pash leste vas, rakras li leske an o dji, te mangell lo lakro dadestar yek kotar phoub. Oun yoy stas peskri bourika tele. Koy penas o Kaleb ap late: “Hoy hi tout?”

¹⁹ Oun yoy penas: “De man lačepen! I phoub, hoy tou man dal, kote kay o kham pralstounes hi, hi gar sapeno. De man ninna i them, kay panyengre hi!” Oun yob das lat pestar kol panya, hoy kharenna pralstouno pani oun telstouno pani.

I forya an o them Youda

²⁰ Oun kalla hi i forya an o them, hoy o baro Devel i menshende dran o kheer Youda das, te djivenn le kote pengre familyentsa.

²¹ Kote kay o kham pralstounes tardo hi, pash o them Edom, his kol forya: Kabzeel, Eder, Yagour,

²² Kina, Dimona, Adada,

²³ Kedesh, Hazor, Yitnan,

²⁴ Sif, Telem, Bealot,

²⁵ Hazor-Hadatta, Keryot-Hesron – kova hi Hazor,

²⁶ Amam, Shema, Molada,

²⁷ Hazar-Gadda, Heshmon, Bet-Pelet,

²⁸ Hazar-Shoual, Beersheba oun leskre gaba,

²⁹ Baala, Iyim, Ezem,

³⁰ Eltolad, Kesil, Horma,

³¹ Siklag, Madmanna, Sansanna,

³² Bet-Lebaot, Shilhim, Ayin oun Rimmon. Kolla hi 29 (biish-te-enya) forya, oun koy pashel gomme lengre gaba.

³³ An o telstouno them his i forya: Eshtaol, Zora, Ashna

³⁴ Zanoa, En-Gannim, Tapoua, Enam,

³⁵ Yarmout, Adullam, Soko, Aseka,

³⁶ Shaarayim, Aditayim, Gedera oun Gederotayim. Kolla his 14 (deesh-te-star) forya, oun koy pashel gomme lengre gaba.

³⁷ Kote his ninna kol forya: Zenan, Hadasha, Migdal-Gad,

³⁸ Dilan, Mispe, Yokteel,

³⁹ Lakish, Bozkat, Eglon,

⁴⁰ Kabbon, Lahemas, Kitlish,

⁴¹ Gederot, Bet-Dagon, Naama oun Makkeda. Kolla his 16 (deesh-te-shob) forya, oun koy pashel gomme lengre gaba.

⁴² Ninna: Libna, Eter, Ashan,

⁴³ Ifta, Ashna, Nezib,

⁴⁴ Kehila, Aksib oun Maresha: Kolla hi enya forya, oun koy pashel gomme lengre gaba.

⁴⁵ Pash o Baro Pani his kol forya: Ekron oun leskre tikneder forya, oun koy pashel gomme lengre gaba;

⁴⁶ kol forya mank Ekron oun o Baro Pani ap koy rig, kay o foro Ashdod oun leskre gaba čiddo hi;

⁴⁷ ninna Ashdod oun Gaza oun lengre tikneder forya oun lengre gaba bis pash o Baro Pani oun tele bis pash koy tala, pal kolate o them Egiptia hi.

⁴⁸ Oun an i berge his kol forya: Shamir, Yattir, Soko,

⁴⁹ Danna, Kiryat-Sanna [kova hi kava dives o foro Debir],

⁵⁰ Anab, Eshtemoa, Anim,

⁵¹ Goshen, Holon oun Gilo. Kolla his khetne 11 (deesh-te-yek) forya, oun koy pashel lengre gaba.

⁵² Ninna kol forya Arab, Douma, Eshan,

⁵³ Yanoum, Bet-Tappoua, Afeka,

⁵⁴ Houmeta, Kiryat-Arba – kova hi kanna Hebron, oun Sior. Kolla hi enya forya, oun koy pashel lengre gaba.

⁵⁵ Ninna kol forya Maon, Karmel, Sif, Youtta,

⁵⁶ Yesreel, Yokdeam, Zanoa,

⁵⁷ Kayin, Gibea oun Timna. Kolla hi deesh forya, oun koy pashel lengre gaba.

⁵⁸ Ninna kol forya Haloul, Bet-Sour Gedor,

⁵⁹ Maarat, Bet-Anot oun Eltekon. Kolla hi shob forya, oun koy pashel lengre gaba. Ninna kol forya Tekoa, Efrata [kova hi kanna Betlehem], Peor, Etam, Koulon, Tatam, Shoresh, Kerem, Gallim, Bet-Ter, Manak. Kolla hi deesh-te-yek forya, oun koy pashel lengre gaba.

⁶⁰ Ninna kol douy forya Kiryat-Baal, hoy kharell ninna Kiryat-Yearim oun Rabba, oun koy pashel lengre gaba.

⁶¹ An o moulo them his kol forya: Bet-Araba, Middin, Sekaka,

⁶² Nibshan, Ir-Melak, ko loneskro foro, oun En-Gedi. Kolla his shob forya oun koy pashel lengre gaba.

⁶³ I morsha dran o kheer Youda nay tradan i Yebousaryen gar vin dran o foro Yerusalem. Doleske djivenn yon kote khetne i menshentsa dran o kheer Youda bis ap kava dives.