Josua 14 - O Debleskro Lab 2024 (Sinte-Manouche)

O them Kanaan vell vin dino

¹ Oun kalla hi kol kotya them, hoy i Israelende dino van an o them Kanaan. O rashay Elazar oun o Yosua, koleskro dad o Noun his, khetne kol pralstunentsa pral i bare familyende, yon his kolla, kay dan ko them vin, te lell haki familya peskro kotar them.

² Yaake har o baro Devel kova o Moseske penas, vitsran le barra, hoy sikrenn, havo them hakeno kol enya-te-paash bare khera lella.

³ Kol menshen dran kol douy-te-paash vavar khera das o Mose pengro kotar them ap i vavar rig o panyestar Yordan. I Levitaryen das lo kek them.

⁴ Hakeno o Yosefeskre douy čavendar vas yek bari familya: o kheer Manasse oun o kheer Efrayim. Oun o kheer Levi las kek kotar them, kokres forya, kay le dren djivenn, oun koy phoub, kay lengre firhe rhan.

⁵ Oun yaake har o baro Devel ap o Mose penas, te krenn le, yaake kran i Israelitarya oun dan o them vin.

O Kaleb lell o foro Hebron

⁶ Har i Israelitarya pash Gilgal his, van i morsha dran o kheer Youda pash o Yosua. Oun o Kaleb, koleskro dad o Yefunne his, dran o kheer Kenas, penas ap leste: “Tou djineh, hoy o baro Devel ap o Debleskro morsheste, o Moseste, penas, har hams an o foro Kadesh-Barnea, har troul toute oun mande djas.

⁷ 40 (star-deesh) bersha homs kote phouro, har o Mose, koles o baro Debleskro čačo vast his, man dran o foro Kadesh-Barnea bičras, te dikap man čorrhanes an o them trouyel. Oun har pale vom, penom leske, har kote čačepah vin dikas.

⁸ Mire phrala, kay mantsa pre djan, kran i menshenge daar. Me rikrom ap o baro Debleste, kay miro Devel hi, oun patsom leske.

⁹ Ap ko dives das o Mose pes sovel, oun penas: Ko them, kay tiri heri pre stakras, hi touke oun tire čavenge hako tsireske doleske, kay tou rikral ap o baro Debleste, kay miro Devel hi, oun patsal leske.

¹⁰ Oun kanna dik, o baro Devel rikras man ap o djipen, yaake har lo kova penas. Kanna djan 45 (star-deesh-te-panč) bersha trouyel, foun ko tsiro, har o baro Devel kal laba ap o Mose penas, har i Israelitarya an o moulo them trouyel djan. Kanna hom 85 (orhta-deesh-te-panč) bersha phouro.

¹¹ Oun me hom kava dives gomme yaake zorelo, har ap ko dives, har o Mose man vin bičras. Koy zoor, hoy man an ko tsiro his, hi man kanna ninna gomme, yaake te nay kourap man oun djap vin an o kourepen.

¹² Oun kanna de man kol berge, kolendar o baro Devel an ko dives rakras! Tou shounal an ko dives, te djivenn kol Anakarya koy an bare zorele forya. Te hi o baro Devel mantsa, palle nay tradap len vin, har o baro Devel kova penas.”

¹³ Kote rakras o Yosua o Debleskri barht pral o Kaleb vin, koleskro dad o Yefunne his, oun das les o foro Hebron, te vell lo leskro.

¹⁴ Yaake vas o foro Hebron o Kaleb dino, koleskro dad o Yefunne his dran o kheer Kenas. Ninna kava dives hi kava foro leskre čavenge doleske, kay rikras o Kaleb ap o baro Debleste, kay o Israeleskro Devel hi, oun patsas leske.

¹⁵ O foro Hebron kharas glan kova Kiryat-Arba pal o barester morsh mank i Anakarya. Oun o kourepen his trouyel an o them Kanaan, oun i menshe nay djivan an lačepen khetne.