Josua 13 - O Debleskro Lab 2024 (Sinte-Manouche)

O Devel penell, te vell o them lenge vin dino

¹ Oun o Yosua vas phouro. Les his i lengsto djipen. Kote penas o baro Devel ap leste. Tou val phouro, oun tout his i lengsto djipen. Oun koy hi gomme boud them, hoy gar dren lino hi:

² Kol themma, kay i Filistarya djivenn, oun o tselo them Geshour;

³ oun ko them, kay i Kanaanitarya djivenn, mank o pani Shihor, hoy glan o them Egiptia nashell, oun o foro Ekron, kay kote čiddo hi, kay norden hi; oun kol panč forya, pral kolende panč Filistarya i raya hi: Gaza, Ashdod, Ashkelon, Gat oun Ekron; koy pashel ko them, kote kay o kham pralstounes hi, oun kay i Avarya djivenn;

⁴ oun ko tselo them, kay i Kanaanitarya djivenn, foun o foro Meara, kay i Sidonarya djivenn, bis pash o foro Afek oun bis ap ko them Amor;

⁵ oun ko tselo them, kay i Gebalarya djivenn, oun kote, kay o kham pre-djal kol tsele berge, kay kharenn Libanon, foun o foro Baal-Gad, hoy tella pash i berga Hermon čiddo hi, bis tele ap o drom, hoy an Lebo-Hamat djal;

⁶ oun o pralstouno them mank i berge Libanon oun o foro Misrefot-Mayim. Kol tsele Sidonarya, kay kote djivenn, kolen tradau me vin glan kol Israelitaryen. Vitse tou kol barra, hoy sikrenn, have Israelitarya havo kotar them lenna, yaake har me touke penom, te kress kova.

⁷ Kre kova kanna, te dess kolen dran i enya khera oun ko paash kol familyendar dran o kheer Manasse pengro kotar them, hoy lengro vell.

⁸ Ko vavar paash kol familyendar dran o kheer Manasse, ninna kol familye dran i khera Ruben oun Gad, yon lan pengro kotar them ap i vavar rig o panyestar Yordan, kote kay o kham pre djal. O Mose, koles o baro Debleskro čačo vast his, das len les kote:

^9-10 Ko tselo pralstouno them mank i forya Medeba oun Dibon; oun i tsele forya, pral kolende o Sihon o ray his, foun o foro Aroer, hoy pash ko pani Arnon čiddo hi, oun ko foro mashkral an i tala, bis kote kay o them Ammon hi. O Sihon his o baro ray pral i Amorarya oun djivas an o foro Heshbon;

¹¹ o them Gilead; oun ko them, kay djivenn i Geshourarya oun i Maakatarya; oun i tsele berge, hoy kharenn Hermon; oun ko tselo them Bashan bis pash o foro Salka;

¹² Pral kava them his glan kova o Og dran Bashan o baro ray. Kova djivas an kol forya Astarot oun Edrei, oun his yek kolendar, kay kol bare menshendar pral ačan, kay rise kharedo venna. Pral kolende vas o Mose o zorleder an o kourepen oun tradas len krik.

¹³ Kol menshen dran Geshour oun Maaka tradan i Israelitarya gar krik. Doleske djivenn yon gomme kava dives mank i Israelitaryen.

¹⁴ I menshenge dran o kheer Levi vas kek kotar them dino. Yon lenn pengro kotar kol firhendar, hoy i Israelitarya o baro Debleske anenna, kay o Israeleskro Devel hi. Yaake vell kova, hoy i Levitaryen hounte vell djipaske, o baro Deblestar. Yaake penas lo les lenge.

O them i menshenge dran o kheer Ruben

¹⁵ Oun o Mose das i familyen dran o kheer Ruben lengro kotar them.

¹⁶ Kava them djas o forestar Aroer, hoy pash o pani Arnon čiddo hi, oun ko forestar, hoy mashkral an i tala čiddo hi, pral o tselo pralstouno them bis pash o foro Medeba,

¹⁷ oun doureder bis pash o foro Heshbon. An kava pralstouno them hi kol forya čiddo: Dibon, Bamot-Baal, Bet-Baal-Meon

¹⁸ Yahaz, Kedemot, Mefaat,

¹⁹ Kiryatayim, Sibma, Seret-Shahar ap koy berga hoy an i tala čiddo hi;

²⁰ Bet-Peor, Ashdot-Pisga, oun Bet-Yeshimot,

²¹ oun kol vavar forya an o pralstouno them, ninna ko tselo them, kay o Sihon o ray his. Yob his o baro ray pral i Amorarya, oun djivas an o foro Heshbon. Koles das o Mose an o kourepen. Ninna das o Mose kol rayen dran o them Midian, kay an o Sihoneskro them djivan oun kolen yob pral peskro them čivas: O Evi, o Rekem, o Sur, o Hour, oun o Reba.

²² Mank kolende, kolen i Israelitarya o rhareha maran, his ninna ko dourkepaskro, o Bileam, koleskro dad o Beor his.

²³ Oun o them, hoy i menshenge dran o kheer Ruben his, djas bis pash o pani Yordan. Kava tselo them oun leskre gaba oun forya lan i familye dran o kheer Ruben, te vell lo lengro.

O them i menshenge dran o kheer Gad

²⁴ Oun o Mose das i familyen dran o kheer Gad lengro kotar them:

²⁵ Ko foro Yaser oun i tsele forya an o them Gilead oun o paash them Ammon bis pash o foro Aroer, hoy ap koy rig o forestar Rabba čiddo hi, kay o kham pre djal.

^26-27 Lengro them his ko kotar them, hoy gomme pral ačas ko themestar, pral koleste o Sihon o ray his – kova kay djivas an o foro Heshbon. Kava them djas foun o foro Heshbon bis pash i forya Ramat-Mizpe oun Betonim, oun foun o foro Mahanayim bis pash o them Debir. Koy pashel hi koy tala ap koy rig o panyestar Yordan, kay o kham pre djal, bis pash o pani Génésareth. Kote his kol forya čiddo: Bet-Haram, oun Bet-Nimra, oun Soukot oun Zafon.

²⁸ Kava tselo them oun leskre gaba oun forya lan i familye dran o kheer Gad, te vell lo lengro.

O them fer i paash kol menshendar dran o paash kheer Manasse

²⁹ Oun o Mose das o paash kol familyendar dran o kheer Manasse lengro them:

³⁰ ko tselo them Bashan bis pash o foro Mahanayim; o them Bashan his o them, kay o Og o baro ray his; oun i tsele gaba, kay kharenn Yayreskre gaba, oun hi an o them Bashan čiddo – kolla his 60 (shob-deesh) gaba.

³¹ Oun o paash kol familyendar dran o kheer Makir – koleskro dad o Manasse his – kolen das o Mose o paash them Gilead. Kote hi kol forya Astarot oun Edrei čiddo, kay o ray pral Bashan, o Og, djivas.

³² Oun kava hi kava them, hoy o Mose vin das, har his lo an o telstouno them, kay i Moabarya djivan, ap koy rig o panyestar Yordan, kay o kham pre djal oun vergel o foro Yericho.

³³ I menshenge dran o kheer Levi vas kek kotar them dino. Kova, hoy len hounte vell djipaske, vell lengro baro Deblestar, kay o Israeleskro Devel hi. Yaake penas lo lenge.