Josua 11 - O Debleskro Lab 2024 (Sinte-Manouche)

O kourepen an boud forya

¹ Oun har o baro ray pral o foro Hazor, o Yabin, kova shounas, bičras lo morshen pash boud bare rayende, te mangenn le lendar, te djan le leha an o kourepen: o Yobab, ko baro ray pral o foro Madon, o baro ray pral o foro Shimron, o baro ray pral o foro Akshaf,

² kol bare raya, kay djivenn ap o nordetikro pralstouno them, kol bare raya, kay djivenn čačes o baro panyestar Génésareth pash o pani Yordan, kol bare raya, kay djivenn an o telstouno them oun pash o baro pani pash o foro Dor.

³ Ninna bičras lo morshen pash i Kanaanitarya, kay djivenn kote, kay o kham pre djala oun kote, kay o kham tele djal pash i Amorarya, pash i Hetarya, pash i Perisarya, pash i Yebousarya ap i berge, pash i Hivarya tele pash i berge Hermon an o them Mispa.

⁴ Oun yon halauter djan vin pengre lourdentsa, boud boud morsha, – yaake boud har i santa pash o baro pani hi, oun boud, boud graya oun vourdya.

⁵ Oun yon van halauter khetne ap i platsa pash ko tikno pani, hoy kharella Merom, te kourenn le pen i Israelentsa.

⁶ Kote penas o baro Devel ap o Yosua: “Ma dare gar lendar! Taysar kava tsireske dan t'mer len halauter moulo. Oun kova krau me t'menge. Palle činenn lengre grayen an i herya yaake te nay nashenn le bouder gar! Oun lengre vourdya rhačrenn pre!”

⁷ Oun o Yosua peskre tsele lourdentsa vas ap yek kopo pral lende, har yon kote pash o tikno pani, hoy Merom kharell, tardo his.

⁸ Oun o baro Devel das len an o Israeleskro vast. Oun yon dan len, oun lan len palla bis pash ko baro foro Sidon oun bis pash Misrefot-Mayim oun bis an ko telstouno them Mispe kote kay o kham pre djala. Oun yon maran len lauteren oun moukan kekes krik te nashell.

⁹ Oun o Yosua kras lentsa yaake har o baro Devel kova leske penas: lengre grayenge činas lo an i herya yaake te nay nashan le bouder gar. Oun lengre vourdya rhačras lo pre.

¹⁰ Palle rissras o Yosua trouyel oun las o foro Hazor dren. Oun leskro rayes das lo o rhareha moulo. O foro Hazor his an ko tsiro o bareder foro mank kol vavar forya an ko them.

¹¹ Oun lauteren, kay koy dren his, dan le o rhareha moulo, oun moukan kekes te djivell. Oun o foro Hazor rhačran le pre.

¹² Ninna kol tsele vavar forya las o Yosua dren oun das kolen o rhareha moulo, kay koy dren his, ninna lengre bare rayen. Kova kras lo yaake har o Mose, o baro Debleskro boudepaskro, leske penas.

¹³ Kal forya his tardo ap tikne berge, oun i Israelitarya rhačran len gar pre. O foro Hazor kokres rhačras o Yosua pre.

¹⁴ Oun o kouč koova, hoy an kol forya his, ninna i tsele firhe čoran penge i Israelitarya. I tsele menshe dan le o rhareha moulo oun moukan kekes lendar djido.

¹⁵ Yaake penas o baro Devel kova ap o Mose, leskro boudepaskro, te krell lo kova. Oun yaake penas o Mose les ap o Yosua, te krell lo kova ninna. Oun o Yosua rikras pes ap i tsele laba, hoy o baro Devel o Moseske penas, oun kras kova yaake.

¹⁶ Oun o Yosua las o tselo them dren: o pralstouno them oun halauter, hoy kote čiddo hi, kay o kham pralstounes tardo hi, ninna o tselo them Gosen, oun o telstouno them, oun o them pash o pani Yordan,

¹⁷ oun o tselo them mank i berga Halak pash i berge Seir oun o foro Baal-Gad an i tala mank i berge Libanon oun i berga Hermon. Oun lengre tsele bare rayen tapran le, oun dan len moulo.

¹⁸ O Yosua hounte kouras pes kol bare rayentsa i rah tsiro, bis te halauter moulo dino his.

¹⁹ Koy his kek foro, hoy pes gar lentsa kouras, har i Hivarya kokres, kay an o foro Gibeon djivan. Kol tsele vavar forya lan le an o kourepen dren.

²⁰ O baro Deblestar vas, te kran kol menshe pengre djia har bar, yaake te djan le an o kourepen khatar o Israel, oun van halauter lendar maredo. I Israelitarya hounte van lenge gar lačes. Na-a, yon hounte dan len halauteren moulo, yaake har o baro Devel kova ap o Mose penas.

²¹ An ko tsiro vas o Yosua peskre lourdentsa ninna pral i Anakarya, kay djivan an o pralstouno them an i forya Hebron, Debir, Anab oun an o tselo pralstouno them, koles o Youda oun o Israel hi. Oun yob das len halauter moulo oun rhačras lengre forya.

²² Kek Anakari ačas pral an o tselo them Israel. Kokres an i forya Gaza, Gat oun Ashdod ačan lendar djides.

²³ Oun yaake har o baro Devel ap o Mose penas, las o Yosua o tselo them dren, oun das les i Israelende. Hakeneste kol deesh-te-douy Israeleskre čavendar das lo peskro kotar them, te venn le kote khere. Oun yon hounte djan bouder gar an o kourepen.