Jona 3 - O Debleskro Lab 2024 (Sinte-Manouche)

O Yona vell o douyto kopo an Ninive bičedo

¹ Oun o baro Devel rakras i douyto kopo ap o Yona, oun penas:

² “Dja sik an ko baro foro, hoy kharell Ninive, oun de kote vi-gole, hoy me touke penau!”

³ Kote kras pes o Yona ap o drom oun djas an o foro Ninive, yaake har leske o baro Devel penas. O foro Ninive his yaake baro, te djal yek triin divessa, te vell lo yek rigyatar ap i vavar.

⁴ Oun o Yona djas i tselo dives dren. Palle das lo gole oun penas: “Star-deesh divessa, palle phagell o foro Ninive khetne.”

I menshe an Ninive moukenn pengre čilače dromma

⁵ Oun kol tsele menshe an o foro Ninive patsan o Debleske, oun moukan vin te kharell, kay kek te rhal čomone bouder. Oun halauter, bare oun tikne, rivan gone pral pende, te sikrenn le, te khaytell len lengro čilačo djipen.

⁶ Har o baro ray o forestar Ninive shounas, hoy o Yona rakras, stas lo pre peskro beshepastar, rivas peskri kouč plaashka vin, oun čivas i gono ap peste, oun beshas pes an i yagakri čik.

⁷ Yob moukas vin kharell an o tselo foro: “Shounenn, hoy o baro ray oun leskre pralstoune boudepangre t'menge penenn! Kova hounte vell hakenestar kerdo, i menshendar, ninna i firhendar: Kek mensho, kek groumni, vitar kek bakro rhal oun piyell čomone! Oun i firhe venn gar ap o zenlepen anlo! Moukenn len vitar kek pani te piyell!

⁸ Oun halauter hounte čivenn gone pral pende: i menshe oun i firhe. Oun hakeno hounte kharell ap o Debleste peskri tseli zoryah. Oun hakeno hounte moukell peskro čilačo drom oun ko čilačo koova, hoy lo kras.

⁹ Koon djinella? – Kova, hoy o Devel kamas te krell, nay khaytell les, oun yob moukell peskri rholi gar pral mende te vell, te meras gar halauter.”

¹⁰ Har o Devel dikas, hoy yon kran, har moukan le pengre čilače dromma, kote khaytas o Debles koy bibarht, hoy kamas lo pral lende te anell, oun yob kras les gar.