Jona 2 - O Debleskro Lab 2024 (Sinte-Manouche)O Yona an o mačeskro per 1 Oun o baro Devel moukas i baro mačes te vell, te rhal lo o Yona pre. Oun o Yona his an o per ko baro mačestar triin divessa oun triin ratsya. 2 Oun har lo an o mačeskro per his, mangas lo peskro baro Debles an, 3 oun penas: Me dom gole ap o baro Debleste an miri traash, oun yob rakras mantsa. Har kras o merepen peskro mouy pre, te rhal lo man, kharom tout, oun tou shounal mire laba. 4 Tou vitsral man dour tele an o baro pani. Zorele panya his troul mande. Tire tsele panya djan pral oun tele oun phagan pral mande khetne. 5 Oun me penom mange, te kameh man bouder gar glan tire yaka te dikell, oun te dikau bouder gar o Debleskro kheer, kay tou khere hal. 6 O pani djas mange bis ap i meen. O telstunepen his troul mande, oun o panyeskro khass pandas pes troul miro shero. 7 Me djom tele bis kote kay hadenn pen i berge, bis an o moulengro them, kay o voudar vell pandlo pal mande hako tsireske. Tou baro Devel, miro Devel, anal man djides vin dran o merepen. 8 Har kamas miro djipen an mande tele te merell, val tou baro Devel mange an o shero, pash toute vas miro mangepen, an tiro kheer, kay tou khere hal. 9 Kolla kay rikrenn pen ap čičeskro koova, rikrenn pen bouder gar ap toute. 10 Me kamau man pash toute te parkrell, oun anau touke firhen. Hoy man sovel dom, ko kamau te rikrell. Tou baro Devel, tserdal man vin dran o merepen! 11 Oun o baro Devel rakras ap ko mačo, oun ko mačo čoungras o Yona dran peskro mouy vin ap o them. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.