Jona 1 - O Debleskro Lab 2024 (Sinte-Manouche)

O Yona vell o baro Deblestar an o foro Ninive bičedo

¹ O baro Devel rakras o morsheha Yona, koleskro dad o Amitay his, oun penas:

² “Dja sik an o baro foro, hoy kharell Ninive, oun de lakri doosh vin gole. Lakro čilačepen vas glan mande.”

O Yona shounell gar oun nashell peske

³ Oun o Yona stas pre oun kamas glan o baro Debleste an o foro Tarsis te nashell, oun vas tele an o foro Yafo. Oun har lo i shiffo hatsas, hoy kamas pash o foro Tarsis te oulerell, das lo love koy, oun stas dren, te nay oulerell lo lentsa pash o foro Tarsis, oun te vell lo glan o baro Debleskre yaka bouder gar diklo.

⁴ Kote moukas o baro Devel i zorelo phourdepen pral o baro pani te vell, hoy yaake zorelo his, te kamas ko shiffo khetne te phagell.

⁵ Oun i bari traash vas ap kol tsele morshende, kay ap ko shiffo boudran. Oun yon dan i bari gole hakeno ap peskro debleste. Oun yon vitsran ko koova, hoy ap ko shiffo čiddo his, an o baro pani, te vell ko shiffo bouder gar yaake pharo. Oun o Yona his tele an o shiffo, his koy čiddo, oun sovas zoreles.

⁶ Kote vas ko ray pral kava shiffo pash leste oun poučas lestar: “Hoy hi kanna touha? Hoske soveh tou? Ste pre, oun khare tiro debles an! Nay vell, tiro devel dikell kamles ap mende, te meras gar!”

⁷ Oun yek rakras o vavareha: “Avenn, mer kamah kashta te vitsrell, te djinas nay, dran koneste savi bibarht ap mende vas.” Oun har yon kol kashta vitsran, sikran le ap o Yona.

⁸ Kote penan yon ap leste: “Pen menge, koneskri doosh hi kova, te djal menge yaake čikles? Hoy hi tiri boudi, oun kay veh tou? Dran havo them hal tou, oun have menshendar veh tou?”

⁹ Oun yob penas ap lende: “Me hom i Hebreari oun mangau o baro Debles an, ko Devel pral o bolepen, kova kay kras o baro pani oun ninna o them.”

¹⁰ Ninna penas lo lenge, kay yob o baro Deblestar krik nashas. Kote trashan kol morsha boudeder, oun poučan lestar: “Hoske kral tou kova?

¹¹ Hoy te kras kanna touha, te vell ko baro pani pokones oun moukell mendar tele?” Ap ko tsiro vas o baro pani divyes oun divyeder.

¹² O Yona penas ap lende: “Lenn man oun vitsrenn man an o baro pani! Palle vell o baro pani pale pokones oun moukell t'mendar tele. Me djinau: Kova hi miri doosh, kay kava baro phourdepen pral t'mende vas.”

¹³ Ninna har lan kol morsha pengri tseli zoor khetne, te anenn le ko shiffo pale ap o them, djas kova lenge gar. Ko baro pani vas divyeder oun divyeder.

¹⁴ Kote dan le ap o baro Debleste gole oun penan: “Ah, baro Devel, ma mouk men te tassell dran kava morsheste. Ma mouk leskro rat pral mende te vell! Tou, baro Devel, kral, hoy an tire yaka mishto hi.”

¹⁵ Oun yon lan o Yona oun vitsran les an o baro pani. Kote vas ko baro pani ap yek kopo pokones oun his bouder gar divyo.

¹⁶ Kote lan i morsha bari traash glan o baro Debleste. Oun yon rhačran leske i firhes, te parkrenn le pen pash leste, yaake har yon pen sovel dan.