Johanni 8 - O Debleskro Lab 2024 (Sinte-Manouche)

O Yezous oun koy djouvel, kay rhorhras peskro romes

¹ O Yezous djas pash o djeteskri berga.

² O vavar dives taysarlake vas yob pale an o Debleskro baro kheer. Oun i tsele menshe van pash leste. Oun yob beshas pes tele, oun penas lenge o Debleskro lab.

³ Koy van i čačepangre oun i Farisarya. Kolla anan i romedini romyat pash leste. Koya vas tapedo koy pashel, har yoy i vavar morsheha khetne his. Yon čivan lat mashkral i menshende, yaake, kay dikell lat nay hakeno.

⁴ Oun yon penan ap o Yezouseste: “Sikepaskro, kay romni vas tapedo, har yoy i vavar morsheha khetne his.

⁵ An o Moseskre lila, kay činlo hi, har mer djivas, penas o Mose menge, kay save djouvya hounte venn moulo dino i barrentsa. Hoy peneh tou pral kova?”

⁶ Kova poučan le lestar, te nay taprenn le les an leskre laba, yaake te nay anenn le i doosh ap leste pre. O Yezous čivas pes glan tele, oun činas o goushteha an i phoub.

⁷ Har yon lestar pale poučan, hadas yob pes pre, oun penas: “Koon kek čilačo koova kras, mou vell ko ersto, kay vitsrell i bar ap late!”

⁸ Oun pale čivas pes yob glan tele, oun činas pale an i phoub.

⁹ Har yon kova shounan, djan le penge, yek pal o vavar. I phoureder djan sikeder lendar, har kol vavar. Yob ačas kokres koy romyah, kay kote tardo his.

¹⁰ Kanna hadas pes o Yezous pale pre, oun poučas koy romyatar: “Hi kek koy, kay kamell, te less i phagi?”

¹¹ “Na-a, miro ray, kek hi koy,” penas koy romni. Penas o Yezous: “Yaake kamau me vitar gar, te less i phagi. Dja khere, oun ma an bouder kek doosh ap toute!”

O Yezous hi i bari momeli i menshenge

¹² Pale rakras o Yezous i menshentsa oun penas: “Me hom koy momeli i menshenge. Koon mange palla djala, djal gar an o tamlepen. Me hom koy momeli, kay o djipen della.”

¹³ Koy penan kol Farisarya ap leste: “Tou rakreh toutar kokres oun peneh, koon tou hal. Doleske hi kova či moldo, hoy tou rakreh.”

¹⁴ Penas o Yezous: “Ninna te rakrau mandar kokres, hi kova čačo, hoy penau. Me djinau, konestar me vom, oun kay me djaua. T'mer djinenn gar, konestar me vom, vitar gar, kay me djaua.

¹⁵ T'mer dikenn i menshes t'mare yakentsa, oun penenn: Kova anas doosh ap peste! Me krau kova gar.

¹⁶ Me te penau: Kova anas i doosh ap peste! palle hi kova čačo. Me krau kova gar mandar kokres. Miro dad, kay bičras man, hi pash mande.

¹⁷ Ninna an o Moseskre lila hi činlo: Te penenn douy pral yekeste vin, yaake hi kova čačo.

¹⁸ Me penau o čačepen pral mande, oun miro dad, kay bičras man, penell ninna o čačepen pral mande.”

¹⁹ Poučan yon lestar: “Kay hi tiro dad?” Penas o Yezous: “T'mer prindjrenn man gar, vitar gar miro dades. Te prindjrans t'mer man, yaake prindjrans ninna miro dades.”

²⁰ Har yob kava penas, his yob an o Debleskro baro kheer, kote, kay i pirya tardo his, kay i menshe love o Debleske dren čivan. Kote penas yob i menshenge o Debleskro lab. Oun kek tapras les. I tsiro his leske kanna gar koy.

²¹ Pale penas o Yezous ap lende: “Me djau mange. T'mer rodenn man, oun t'mer merenn an t'maro čilačepen. Kote, kay me djaua, nay venn t'mer gar.”

²² Penan kol bibolde: “Hoy penell yob kay: Kote, kay me djau, nay venn t'mer gar? Kamell yob pes te marell?”

²³ Penas yob ap lende: “T'mer han i phoubyatar. Me hom dran o bolepen. T'mer han kay phoubyatar. Me hom gar kay phoubyatar.

²⁴ Doleske penom t'menge: T'mer merenn an t'maro čilačepen. T'mer te patsenn gar, kay me kova hom, koon me hom, palle merenn t'mer an t'maro čilačepen.”

²⁵ “Pen menge, koon tou hal!” penan yon ap leste. Penas o Yezous: “Me penom t'menge kova yaake boud kope.

²⁶ Me nay penoms t'menge boud koova, kay dikom o čilačepen ap t'mende. Me krau kova gar. Me penau i menshenge, hoy shounom kolestar, kay bičras man. Oun hoy yob penella, hi čačo.”

²⁷ Yon hayvan gar, kay o Yezous o Deblestar, peskro dadestar, rakras.

²⁸ Koy penas o Yezous ap lende: “Te hadan t'mer o Menshengro Čaves pral, palle djinenn t'mer, koon me hom, oun kay me či mandar kokres kraua. Hoy o dad mange penas, kova penau me doureder.

²⁹ Oun kova, kay bičras man, hi pash mande. Yob moukas man gar kokres. Me krau hako tsiro, hoy yob kamella.”

³⁰ Har o Yezous kova penas, patsan boud ap leste.

I menshe čingrenn pen o Yezouseha

³¹ Ap kol biboldende, kay kanna ap leste patsan, penas lo: “T'mer te krenna, hoy me t'menge penau, palle han t'mer čačepah mire mala, kay mire laba pre lan.

³² Oun t'mer prindjrenna o čačepen. Oun o čačepen krella, te han bouder gar pandlo.”

³³ Penan yon: “Mer ham o Abrahameskre čave. Oun an kek tsiro hams pandle boudepangre. Har nay peneh tou menge, te ačenn bouder gar pandlo?”

³⁴ Penas o Yezous: “Čačepah, me penau t'menge: Koon o čilačepen krella, hi pandlo ap o čilačepen.

³⁵ I boudepaskro ačell gar hako tsiro an peskro rayeskro kheer. O čavo ačella yaake rah, har yob djivella.

³⁶ Te krell o Debleskro čavo, kay han bouder gar pandlo, yaake han čačepah bouder gar pandlo.

³⁷ Me djinau, kay han o Abrahameskre čave. Ninna te hi yaake, kamenn t'mer man te marell. Kova, hoy me t'menge penau, lenn t'mer gar pre. Doleske kamenn t'mer man te marell.

³⁸ Me penau t'menge kova, hoy pash miro dadeste dikom. T'mer krenna, hoy shounan t'maro dadestar.”

³⁹ Koy penan yon ap leste: “Maro dad hi o Abraham.” Penas o Yezous: “Te vans t'mer lestar, krans, hoy yob kras.

⁴⁰ Kanna, kay me t'menge ko čačepen penom, kay shounom o Deblestar, kamenn t'mer man te marell. Kova kras o Abraham gar.

⁴¹ T'mer krenn kova, hoy t'maro dad ninna kras.” Penan yon ap leste: “Mari day hi kek loubni. Men hi yek dad. Kova hi o Devel.”

⁴² “Te vals o Devel t'maro dad”, penas o Yezous, “kamans man t'mer. Lestar vom me. Me vom gar mandar. Hi o Devel, kay bičras man.

⁴³ Hoske hayvenn t'mer miro rakepen gar? T'maro dji hi pandlo. T'mer shounenn nay miro lab gar.

⁴⁴ T'maro dad hi o beng. Oun t'mer krenna, hoy t'maro dad ninna kamella. Yob hi yek, kay marell i menshen hako tsiro. Oun yob hi gar an o čačepen tardo. O čačepen hi gar an leste. Te rakrell yob o rhorhepen, vell kova dran leste. Yob hi i rhorheno, oun anas o rhorhepen ap kay phoub.

⁴⁵ Me penau o čačepen. Doleske patsenn t'mer man gar.

⁴⁶ Koon t'mendar nay penella, kay me yek čilačo koova krom? Me te penau o čačepen, hoske patsenn t'mer man gar?

⁴⁷ Koon o Deblestar vella, shounella ap kova, hoy o Devel penella. T'mer venn gar lestar. Doleske shounenn t'mer gar ap leskre laba.”

⁴⁸ “Hi maro gar čačo?” penan kol bibolde. “Tou hal i Samaritari oun an toute hi o beng, yaake har mer les penam.”

⁴⁹ “Na-a,” penas o Yezous, “an mande hi kek beng. Me sharau miro dades. T'mer kamenn man gar te sharell.

⁵⁰ Me kamau gar, te sharenn man i menshe. Kova hi o Devel, kay kamella, te vap me sharedo. Yob rakrell i phagi pral t'mende vin.

⁵¹ Čačepah, me penau t'menge: Te hi yek koy, kay krella, hoy me penom, kova merell bouder gar.”

⁵² Koy penan yon: “Kanna djinah mer, kay hi an toute i beng. O Abraham meras, oun o Debleskre rakepangre meran ninna. Oun tou peneh: Te krell yek, hoy me kamau, kova merell bouder gar.

⁵³ Hal tou boudeder har maro dad Abraham, kay meras? Oun kol Debleskre rakepangre meran ninna. Hal tou feteder har yon?”

⁵⁴ Penas o Yezous: “Te sharoms me man, vals kova či moldo. Miro dad hi kova, kay sharell man. Kolestar penenn t'mer: Yob hi maro Devel.

⁵⁵ T'mer prindjrenn les gar. Me prindjrau les. Te penaus me, kay prindjrau les gar, voms i rhorheno har t'mer. Me prindjrau les oun krau, hoy yob penella.

⁵⁶ O Abraham, t'maro dad, his barhtelo, har yob dikas, kay me vau. Yob dikas kava dives, oun his barhtelo.”

⁵⁷ Penan kol bibolde ap leste: “Tou hal kek panč-desha bersha phouro oun peneh, kay dikal o Abrahames.”

⁵⁸ Penas o Yezous ap lende: “Čačepah, me penau t'menge: O Abraham his gomme gar boldo, koy homs me koy.”

⁵⁹ Koy hadan yon barra pre, te vitsrenn le kolla ap leste. Oun yob khatras pes, oun djas dran o Debleskro baro kheer vin.