Johanni 7 - O Debleskro Lab 2024 (Sinte-Manouche)

O Yezous oun leskre phrala

¹ Pal kova djas o Yezous an o them Galilea trouyel. Yob kamas gar an o them Youdea te djal. I pralstoune bibolde kote kaman les te marell.

^2-3 I tikno tsiro glan kol biboldengre bare divessa, hoy kharenna Soukot, penan leskre phrala ap leste: “Ma ač an o them Galilea! Dja an o them Youdea, te dikenn ninna tire mala, havo baro koova tou kreh!

⁴ Kek mensho khatrell pes, te kamell lo i menshen te sikrell, hoy yob nay krella. Te kreh tou savo baro koova, palle mouk kova i tsele menshen te dikell!”

⁵ Leskre phrala patsan gar ap leste. Doleske rakran yon yaake.

⁶ Koy penas o Yezous ap lende: “O tsiro hi mange kanna gar kay, te djap kote. T'mer nay djan hako tsiro koy.

⁷ I menshe hi gar čilačo ap t'mende. Ap mande hi le čilačo. Me penom lenge, kay kova, hoy yon krenna, čilačo hi.

⁸ Djan t'mer ap o festo! Me djau gar peha. O tsiro hi mange kanna gar kay.”

⁹ Kova penas yob, oun ačas an o them Galilea.

O Yezouseskre laba venna o Deblestar

¹⁰ Har leskre phrala ap o festo his, djas yob ninna čorrhanes koy.

¹¹ Koy rodan les kol pralstoune bibolde mashkral kolende, kay van ap o festo, oun poučan hakenestar: “Kay hi ko morsh?”

¹² Ninna kol boud menshe, kay van koy, rakran pral leste. His menshe mashkral lende, kay penan: “Yob hi i lačo morsh.” Vavar penan: “Na-a, yob rhorhella i menshen.”

¹³ I daryatar i pralstoune biboldendar rakran le halauter čorrhanes pral leste.

¹⁴ Har ko festo paash trouyel his, djas o Yezous an o Debleskro baro kheer, oun penas i menshenge o Debleskro lab.

¹⁵ Koy kran i pralstoune bibolde bare yaka, oun penan: “Har nay djinell yob yaake boud? Kek anas leske kova pashel.”

¹⁶ Penas o Yezous lenge: “Hoy me t'menge penau vell gar mandar. Kova vell kolestar, kay bičras man.

¹⁷ Koon kova krella, hoy o Devel kamella, kova hayvella, kay mire laba o Deblestar venna, oun gar mandar.

¹⁸ Koon pral peste mishto rakrella, kova kamella, te vell yob sharedo. Koon kamella, te vell kova sharedo, kay bičras les, kova hi čačo. Oun an leste hi kek čilačepen.

¹⁹ O Mose das t'men i lila, kay činlo hi, har t'mer hounte djivenna. Kek t'mendar djivell yaake. Hoske kamenn t'mer man te marell?”

²⁰ “An toute hi i beng”, penan kol tsele menshe. “Koon kamell tout te marell?”

²¹ Penas o Yezous: “Yek baro koova krom me pash t'mende an o foro Yerusalem. Oun t'mer han rhoyedo pral kova.

²² Te hi t'mare morsh čave orhta divessa phouro, činenn t'mer len ap o mass, ninna ap o Debleskro Dives. O Mose penas t'menge, te krenn kova. Oun o Mose his gar kokres, kay penas t'menge kova. Ninna t'mare phoure, kay djivan glan leste, penan kova oun rikran pen koy pre.

²³ T'mer činenn t'mare čaven ap o mass ap o Debleskro dives, te vell rikedo, hoy o Mose činas an peskre lila. Hoske han t'mer yaake rhoyedo ap mande, kay krom i tselo menshes sasto ap o Debleskro dives?

²⁴ T'mer te penenn, kay i mensho i doosh ap peste anas, palle djan pal o čačepen oun gar pal kova, hoy dikenn t'mare yakentsa!”

²⁵ Koy penan kolla, kay hi dran o foro Yerusalem: “Hi kova gar ko morsh, kay kaman le les te marell?

²⁶ Kanna rakrell lo glan hakeneste. Oun kek dell les trad. Dikan mare pralstoune kanna dren, kay yob ko baro ray hi, kolestar o Devel penas, te vell yob?

²⁷ Mer djinah, dran havo foro ko morsh vella. Te vell ko baro ray, kolestar o Devel penas, te vell yob, djinell kek dran havo foro yob vella.”

²⁸ O Yezous, kay an o Debleskro baro kheer i menshenge o Debleskro lab penas, shounas kova, oun das gole: “Har nay prindjrenn t'mer man, oun djinenna, kay vom? Me vom gar mandar kokres! Čačepah, koles, kay bičras man, prindjrenn t'mer gar!

²⁹ Me prindjrau les! Me vom lestar! Oun yob bičras man!”

³⁰ Koy kaman yon les te taprell. Oun kek nay hadas o vast ap leste. O tsiro his leske kanna gar koy, kay vell yob tapedo.

³¹ Boud kol menshendar patsan ap leste oun penan: “Te vell o baro ray, kolestar o Devel penas, te vell yob, nay krell kova bareder koova, har kava morsh Yezous?”

³² I Farisarya shounan, hoy kol menshe pral o Yezouseste rakran. Oun i Farisarya oun i bare rashaya bičran klisten, te taprenn le o Yezouses.

³³ Koy penas o Yezous: “Me hom bouder gar rah pash t'mende. Me djau pash koleste, kay bičras man.

³⁴ T'mer rodenn man, oun hatsenn man gar. Kote, kay me palle hom, nay venn t'mer gar.”

³⁵ “Kay kamell yob te djal, kay hatsah mer les gar?” poučas yek i vavarestar. “Kamell yob pash kol biboldende te djal, kay djivenn an o grichtikro them, te penell lo kote i menshenge o Debleskro lab?

³⁶ Har hayvas mer leskro rakepen: T'mer rodenn man, oun hatsenn man gar oun kote, kay me palle hom, koy nay venn t'mer gar?”

O Yezous hi o pani, hoy o djipen della

³⁷ Ap ko pralstouno oun shoukeder dives, vas o Yezous pale glan kol tsele menshende, oun das gole: “Kones troush hi, kova te vell pash mande oun piyella!

³⁸ Koon ap mande patsella, har o Debleskro lab penella, dran koleste vell ko pani, kay dell o djipen.”

³⁹ Yob penas kova pral o Debleskro Dourho, hoy kolla lenna, kay ap leste patsenna. O Debleskro Dourho his gomme gar koy. Ap ko tsiro his o Yezous gomme gar pash o Debleste an o bolepen, te bičras lo les ap lende.

⁴⁰ Mashkral kolende, kay shounan ko rakepen, his menshe, kay penan: “Kava morsh hi čačepah ko Debleskro rakepaskro, kolestar penlo vas, te vell yob.”

⁴¹ Vavar penan: “Kova hi ko baro ray, kay vell o Deblestar.” Oun vavar penan: “Vell ko baro ray dran o them Galilea? Na-a!

⁴² O Debleskro lab penella, ko baro ray, kay vell o Deblestar, kova hi o Davideskre menshendar, oun vell an o foro Betlehem boldo har o David.”

⁴³ Kanna djinan i menshe gar, hoy čačo hi. Ko yek penas kava, ko vavar penas kova.

⁴⁴ Mashkral lende his ninna save, kay kaman les te taprell. Oun kek hadas peskro vast pal leste.

⁴⁵ Har i kliste pale pash i bare rashaya oun i Farisarya van, poučan kolla lendar: “Hoske anenn les t'mer gar peha?”

⁴⁶ “Har kava morsh rakras, shounam mer maro tselo djipen gar!” penan i kliste ap lende.

⁴⁷ “Rhorhas lo t'men ninna?” poučan kol Farisarya.

⁴⁸ “Patsell yek i pralstunendar oun i Farisarendar ap leste? Na-a!

⁴⁹ Kol boud menshe djinenn gar, hoy an o Moseskre lila činlo hi. Yon hi praasedo!”

⁵⁰ O Nikodemus, kay his ninna i Farisari, kova kay vas yek rati pash o Yezouseste, penas ap lende:

⁵¹ “Pal maro čačepen nay dah kekes i phagi, te shounam gar lestar, hoy yob rakrell pral kova vin. Mer dah ninna kekes i phagi, te djinah gar, hoy yob kras.”

⁵² “Hal tou ninna dran o them Galilea?” poučan le lestar. “Tou te dravereh mishto an o Debleskre lila, palle dikeh, kay kek Debleskro rakepaskro vella dran o them Galilea.”

⁵³ Oun hakeno djas khere.