Johanni 6 - O Debleskro Lab 2024 (Sinte-Manouche)

O Yezous della panč zerya morshen te rhal

¹ Pal i tsiro djas o Yezous ap i vavar rig o baro panyestar Galilea. Ko pani kharella ninna Tiberias.

² Boud boud menshe djan leske palla. Yon dikan, havo baro koova yob an o Debleskri zoor kras ap i nasslende.

³ Khetne peskre malentsa djas o Yezous ap i berga, oun beshas pes lentsa tele.

⁴ His i tikno tsiro glan i biboldengre bare divessa, kay kharenna Passa.

⁵ Har o Yezous dikas, kay boud boud menshe leske palla djan, poučas lo o Filipestar: “Kay nay ginah mer yaake boud mare, te vell i tsele menshen rhapaske?”

⁶ Yob kamas te dikell, har leskro patsepen hi. Doleske poučas yob lestar kova. O Yezous djinas kokres, hoy yob kamas te krell.

⁷ O Filipo penas: “Ninna te vals men douy-sheel roupene beme, vals kova gar doha, te lell hakeno i tikno kotar maro.”

⁸ Yek leskre malendar, o Andreas, ko phraal o Simon Petrestar, penas ap o Yezouseste:

⁹ “Kate hi i čavo. Koles hi panč mare oun douy mače. Kova hi či yaake boud menshenge.”

¹⁰ O Yezous penas: “Penenn i menshenge, te beshenn pen le!” Koy his boud zenlepen. Oun yon beshan pen koy. Kolla his nay yaake panč zerya (5.000) morsha.

¹¹ Oun o Yezous las kol mare, parkras pes pash o Debleste oun das len i menshende. Kova kras lo ninna kol mačentsa. Oun hakeno las yaake boud, har yob kamas.

¹² Har yon halauter čalo his, penas yob ap peskre malende: “Čivenn i tsele kotya khetne, hoy pral ačan, te djal kova gar nashedo!”

¹³ Koy čivan leskre mala halauter khetne, hoy pral ačas kol marendar. Koy van deesh-te-douy marengre gone pherdo kol panč marendar.

¹⁴ Har kol menshe dikan, hoy o Yezous kras an o Debleskri zoor, penan le: “Kova hi čačepah ko Debleskro rakepaskro, kolestar penlo vas, kay vell lo ap kay phoub.”

¹⁵ O Yezous hayvas, kay kaman yon les te taprell, te krenn le les lengro baro ray. Doleske djas yob doureder pral ap koy berga, te vell lo peske kokres.

O Yezous djal ap o pani

¹⁶ Har i rat vas, djan leskre mala tele pash o pani,

¹⁷ djan an i bero, oun ouleran vergel o pani, te venn le an o foro Kapernaum. His rati, oun o Yezous his gar pash lende.

¹⁸ Koy phourdas i baro zorelo dourho pral o pani. Oun o pani vas divyo.

¹⁹ Har leskre mala panč, shob kilometarya vin ap o baro pani his, dikan le o Yezouses: Yob djas ap o pani, oun vas pash o bero. Oun yon lan traash.

²⁰ Yob penas: “Me hom! Ma darenn!”

²¹ Koy kaman yon les an o bero te lell. Ap yek kopo his le ap i vavar panyeskri rig, kote, kay yon kaman te djal.

O Yezous hi o maro, hoy della o djipen

²² O vavar dives poučan pendar kol menshe, kay ačan ap i vavar panyeskri rig, kay o Yezous hi. Yon dikan, kay taysar yek bero čiddo his pash o pani, oun kay leskre mala djan penge. Yon djinan, o Yezous his gar pash lende.

²³ Koy van vavar bere dran o foro Tiberias, oun čivan pen kote, kay rhans le ko maro, koleske o Yezous parkras pes pash o Debleste.

²⁴ Har kol menshe hayvan, kay o Yezous bouder gar koy hi, vitar gar leskre mala, beshan pen yon an kol bere, ouleran vergel o baro pani, oun van an o foro Kapernaum, te rodenn les le.

²⁵ Kote hatsan le les, oun poučan lestar: “Sikepaskro, kaana val tou kate?”

²⁶ Penas o Yezous: “Čačepah, me penau t'menge: T'mer rodan man gar doleske, kay dikan i baro koova, hoy krom an o Debleskri zoor. T'mer rhan ko maro, oun van čalo. Doleske rodenn t'mer man.

²⁷ Ma djivenn o rhapaske, hoy paash djala! Djivenn yaake, te lenn ko djipen, hoy gar pre-herella! O Mensheskro Čavo kokres nay dell t'men kova. Yaake sikras o Devel, kay kova leskro čavo hi.”

²⁸ Koy poučan yon lestar: “Hoy hounte kras mer? Hoy kamell o Devel mendar?”

²⁹ Penas o Yezous ap lende: “O Devel kamella, te patsenn ap koleste, kay yob bičras.”

³⁰ Penan yon: “Kre menge i baro koova an o Debleskri zoor, te patsas mer ap toute! Sike men, hoy tou hayveh!

³¹ De men hako dives maro te rhal, yaake har mare phoure menshe rhan o Debleskro maro an o moulo them! Kova hi činlo an o Debleskro lab: Yob das len maro dran o bolepen rhapaske.”

³² Penas o Yezous: “Čačepah, me penau t'menge: Hi gar o Mose, kay das t'men o maro dran o bolepen. Kova hi miro dad, kay dell t'men ko čačo maro dran o bolepen.

³³ O Debleskro maro hi kova, kay vas dran o bolepen, oun dell i menshen o djipen.”

³⁴ “Ray,” penan yon, “de men ko maro hako tsiro!”

³⁵ O Yezous penas lenge: “Me hom ko maro, kay della ko djipen. Koon pash mande vella, koles vell bouder kek bok. Oun koon ap mande patsella, koles vell bouder kek troush.

³⁶ Hi yaake har me t'menge penom: T'mer dikan man, oun kamenn gar ap mande te patsell.

³⁷ Halauter kolla, kay dell man o dad, venn pash mande. Oun halauter kolla, kay venn pash mande, kolen vitsrau me gar vin.

³⁸ Me vom gar dran o bolepen te krap kova, hoy me kamau. Me vom te krap, hoy kova kamella, kay bičras man.

³⁹ Oun o Devel kamella, te nashrap me kekes kolendar, kay yob man das. Yob kamella, te krap len i moulendar djido ap o palstouno dives.

⁴⁰ Kova kamell miro dad: Hakeno, koon o čaves dikella, oun ap leste patsella, lell o djipen, hoy gar pre-herella. Oun me krau les i moulendar djido ap o palstouno dives.”

⁴¹ I bibolde his rhoyemen pral kova, kay yob penas: Me hom ko maro, hoy dran o bolepen tele vas.

⁴² “Hi kova gar o Yezous, ko Yosefeskro čavo?” penan yon. “Mer prindjrah leskro dades oun leskri da. Har nay penell lo: Me vom dran o bolepen?”

⁴³ Koy penas o Yezous ap lende: “Ma rhoyrenn t'men pral kova, hoy me t'menge penom!

⁴⁴ Kek nay vell pestar pash mande. O dad, kay bičras man, hounte anell les pash mande. Oun koon pash mande vella, koles krau me i moulendar djido ap o palstouno dives.

⁴⁵ An o Debleskro lab činan kol Debleskre rakepangre: O Devel hi o sikepaskro halauterenge. Hakeno, koon ap o dadeste shounella oun krell, hoy yob kamella, vell pash mande.

⁴⁶ Kek dikas o dades. Kova kokres, kay vas o Deblestar, dikas les.

⁴⁷ Čačepah, me penau t'menge: Koon ap mande patsella, koles hi o djipen, hoy gar pre-herella.

⁴⁸ Me hom ko maro, hoy dell t'men ko djipen.

⁴⁹ T'mare phoure rhan ko maro, hoy o Devel len das an o moulo them, oun yon meran.

⁵⁰ Me hom ko čačo maro, hoy dran o bolepen vella. Koon kova rhala, kova merell gar.

⁵¹ Me hom ko maro, hoy dell o djipen, oun hoy vas dran o bolepen. Hakeno, koon rhala kava maro, lell o djipen, hoy gar pre-herella. Oun ko maro hi miro mass. Me dau les i menshenge, te lenn le ko djipen.”

⁵² Kanna čingran pen kol bibolde, oun penan: “Har nay dell men ko morsh peskro mass te rhal?”

⁵³ Koy penas o Yezous ap lende: “Čačepah, me penau t'menge: Te rhan t'mer gar o Menshengro Čaveskro mass, oun piyenn gar leskro rat, hi t'men gar o djipen, hoy gar pre-herella.

⁵⁴ Koon rhala miro mass, oun piyell miro rat, lell o djipen, hoy gar pre-herella. Oun me krau les i moulendar djido ap o palstouno dives.

⁵⁵ Miro mass hi o čačo rhapen, oun miro rat o čačo pipen.

⁵⁶ Koon rhala miro mass, oun piyell miro rat, kova ačella an mande, oun me ačau an leste.

⁵⁷ Yaake har o dad, kay bičras man, hi djido, oun das man o djipen, yaake dau me o djipen kolende, kay rhan miro mass.

⁵⁸ Kava hi ko maro, hoy vas dran o bolepen. Koon kava maro rhala, lell o djipen, hoy gar pre-herella. Kava hi i vavar maro har kova, hoy t'mare phoure rhan.”

⁵⁹ Kova penas yob an i biboldengri kangri, har yob an ko foro Kapernaum lenge o Debleskro lab penas.

⁶⁰ Har kolla, kay leha djan, kova shounan, penan boud lendar: “Kova hi kek shoukar koova, hoy yob koy penella. Koon shounell kova nay?”

Boud menshe djan bouder gar o Yezouseha

⁶¹ Har o Yezous lendar hayvas, kay yon pen pral leste rhoyrenna, penas lo ap lende: “Rhoyrell t'men kova?

⁶² Hoy krans t'mer, te dikans t'mer, te djal o Mensheskro Čavo pale an o bolepen?

⁶³ O Debleskro Dourho hi kova, kay dell o djipen. O mensheskri zoor nay krell kova gar. Mire laba, hoy me t'menge penom, van dran o Debleskro Dourho. Doleske anenn le t'menge ko djipen.

⁶⁴ Mashkral t'mende hi menshe, kay patsenn gar.” O Yezous djinas, koon kolla his, kay patsenn gar. Ninna djinas lo, koon ap leste phoukrella.

⁶⁵ Oun yob penas doureder: “Doleske penom me t'menge, kay kek nay vell pestar pash mande. O dad kokres nay anell les pash mande.”

⁶⁶ Ap ko tsiro tserdan pen boud kolendar pale, kay leske palla djan, oun djan bouder gar leha.

⁶⁷ Koy poučas o Yezous kol deesh-te-douyendar: “Kamenn t'mer man ninna te moukell?”

⁶⁸ “Ray, pash koneste djas mer?” penas o Simon Petro. “Tout hi laba, kay denn men o djipen, hoy gar pre-herella.

⁶⁹ Mer patsah oun djinah, tou veh o Deblestar. O Devel bičras tout.”

⁷⁰ O Yezous penas lenge: “Me rodom t'men deesh-te-douyen vin. Oun an yekeste t'mendar hi o beng.”

⁷¹ Yob rakras o Youdasestar, leskro dad hi o Simon Iskariot. O Youdas his yek kol deesh-te-douyendar, kova kay phoukrella ap leste.