Johanni 19 - O Debleskro Lab 2024 (Sinte-Manouche)

O Pilato dell o Yezouses an i biboldengre vasta

¹ Koy las o Pilato o Yezouses, oun moukas les i čoupniyah te dell.

² I lourde pandan soubyengre kashta khetne oun čivan len leske ap o shero yaake, har i baro ray hidjrell shereskro sonakay ap peskro shero. Oun yon čivan leske i loli rayeskri plaashka trouyel.

³ Oun van glan leste oun penan: “Sharedo vess tou, baro ray pral i biboldende!” Oun yon dan les an o mouy.

⁴ Oun pale djas o Pilato pash i biboldende vin, oun penas ap lende: “Me anau les pash t'mende vin, te dikenn t'mer, kay hatsau kek doosh ap leste.”

⁵ Oun o Yezous vas vin. Oun ap leskro shero his i pandle soubyengre kashta, oun koy loli kouč plaashka his ap leste. Oun o Pilato penas ap lende: “Dikenn, havo mensho hi lo!”

⁶ Har kol bare rashaya oun kol kliste o Yezouses dikan, dan yon gole: “De les ap o troushel! De les ap o troushel!” “Lenn t'mer les,” penas o Pilato, “oun denn les ap o troushel! Me hatsau kek doosh ap leste.”

⁷ “Pal maro biboldengro čačepen hounte vell lo moulo dino,” penan i bibolde ap o Pilato. “Yob penas, kay hi lo o Debleskro čavo.”

⁸ Har o Pilato kova shounas, vas i bari daar ap leste.

⁹ Yob djas pale an peskro kheer oun poučas o Yezousestar: “Kay veh tou?” O Yezous penas či koy pre.

¹⁰ Koy poučas o Pilato lestar: “Rakreh tou mantsa gar? Djineh tou gar, kay kova an mire vasta hi, te moukap tout te djal. Oun te dap tout ap o troushel, hi ninna an mire vasta?”

¹¹ Penas o Yezous: “Tout vals kek zoor pral mande, te dals tout o Devel koya gar. Doleske hi koles, kay das man an tire vasta, bareder doosh har tout.”

¹² Koy kamas o Pilato o Yezouses moukell te djal. Kol bibolde dan gole: “Te moukeh tou koles te djal, hal tou kek maal o baro rayestar an o foro Rom! Hakeno, koon krell pes har te vell yob i baro ray, kova hadell pes pral leste.”

¹³ Har o Pilato kol laba shounas, anas yob o Yezouses vin oun beshas pes ap ko čačepaskro beshepaskro, hoy kharella Barrengri Phoub. Ap o biboldengro rakepen kharella kova Gabbata.

¹⁴ His yaake deesh-te-douyenge, yek dives glan kol bare divessa, kay kharenna Passa. Oun o Pilato penas ap kol biboldende: “Dikenn, kova hi t'maro baro ray!”

¹⁵ Yon dan gole: “Mare les! Mare les, oun de les ap o troushel!” Koy poučas o Pilato lendar: “Kamenn t'mer te dap t'maro baro rayes ap o troushel?” “Men hi kek vavar ray har o baro ray an o foro Rom kokres,” penan kol bare rashaya.

¹⁶ Kanna das yob o Yezouses an lengre vasta, te denn le les ap o troushel. Oun o Yezous vas krik anlo.

O Yezous merella ap o troushel

¹⁷ Oun yob hidjras peskro troushel, oun djas dran ko foro vin ap ko kotar them, hoy kharella mouleskro shero. Kova kharella ap o biboldengro rakepen Golgata.

¹⁸ Kote dan le les ap o troushel, oun douy vavar morsha ninna. Ko yekeskro troushel his čačes lestar, ko vavareskro troushel his serves lestar. Oun o Yezous his mank lende.

¹⁹ O Pilato činas ap i kotar kasht: O Yezous dran Nazaret, o baro ray pral i biboldende. Ko kotar kasht vas pral ap o troushel dino.

²⁰ Kova, hoy koy pre činlo hi, draveran boud bibolde. Ko kotar them, kay dan le o Yezouses ap o troushel, his gar dour o forestar čiddo. Oun kol laba his činlo ap hebretikes, latayntikes, oun grichtikes.

²¹ Koy penan kol bare rashaya ap o Pilateste: “Ma čin: O baro ray pral i biboldende! Čin, kay yob penas: Me hom o baro ray pral i biboldende!”

²² “Kova ačell yaake, har me kova činom!” penas o Pilato.

²³ Kol lourde, kay o Yezouses ap o troushel dan, lan leskre ripya, oun kran dran lende star kotya. Oun hakeno las i kotar. Ko telstouno ripen his gar khetne sido. Kova his an yek kotar.

²⁴ Koy penan yon yek ap o vavareste: “Mer moukah ko ripen yaake, har kova hi. Mer khelah, koon les lella.” Yaake vas kova čačo, hoy an o Debleskro lab činlo hi: Hakeno las i kotar mire ripyendar. Oun koon miro telstouno ripen lella, khelan yon vin. Yaake kran i lourde.

²⁵ Tel ko troushel, kay o Yezous pre dino his, his leskri day oun kolakri pheen tardo. Ninna i Maria, kolakro rom o Kleopas hi, oun i Maria Magdalena his koy tardo.

²⁶ Har o Yezous peskri dat dikas oun pash late peskro males, koles, kay yob o djiyestar kamas, penas lo ap peskri date: “Romniya, dik, kova hi kanna tiro čavo!”

²⁷ Ap peskro maleste penas lo: “Dik, koya hi kanna tiri day!” Koy las ko maal lat pash peste an peskro kheer.

²⁸ Pal kova, har o Yezous djinas, kay yob halauter kras, penas lo: “Man hi troush!” Kova penas yob, te vell kova čačo, hoy an o Debleskro lab glan-vi penlo vas.

²⁹ Koy his i khoro tardo. Kova his pherdo shoutli mool. Oun yon lan čomone har i kotar than, kran les pherdo shoutli mool, čivan kova ap i baro kasht, hoy kharella Hysop, oun rikran leske kova glan o mouy.

³⁰ Har piyas o Yezous koy shoutli mool, penas lo: “Me krom lauter, hoy hounte krom.” Oun yob čivas peskro shero glan tele, oun meras.

³¹ His o dives glan o Debleskro dives. Ko Debleskro dives his i baro dives. Doleske kaman i pralstoune bibolde gar, te ačenn i moule ap ko Debleskro dives ap o troushel. Oun yon mangan o Pilatestar, te venn i herya kolendar phagedo, kay ap o troushel dino van, te merenn le sikeder. I bibolde kaman, te lenn le len sik tele.

³² Koy van i lourde oun phagan i herya kol douy vavarendar, kay kote ap i troushel dino van.

³³ Har yon pash o Yezouseste van oun dikan, kay yob moulo hi, phagan yon leskre herya gar.

³⁴ Yek kol lourdendar das les peskro rhareha an i rig čourye. Koy vas pani oun rat vin.

³⁵ Oun kova, kay dikas kova halauter, penas i vavarenge, hoy yob dikas. Oun kova, hoy yob penas, hi čačo. Oun yob djinella, kay yob o čačepen penella, te patsenn t'mer ninna.

³⁶ Kova vas halauter yaake, har an o Debleskro lab glan-vi penlo vas: Kek kokalo vas leske phagedo,

³⁷ oun ninna: Yon dikenn koles, kay dan le an i rig čourye.

O Yezous vella paskedo

³⁸ Pal kova djas o Yosef, kova, kay dran o foro Arimatia his, pash o Pilateste, oun mangas lestar, te dell yob les o moulo Yezouses. O Yosef patsas ap o Yezouseste čorrhanes i daryatar i pralstoune biboldendar. Oun o Pilato penas, kay yob o Yezouses o troushelestar nay tele lella. Oun yaake djas yob pash o troushel, oun las les tele.

³⁹ Ninna o Nikodemus, kova, kay vas yek kopo rati pash o Yezouseste, vas kote oun anas yaake triyanda kilo kouč djet, kerdo dran myrrhe oun dran Aloe.

⁴⁰ Oun yon lan o moulo Yezouses oun pandan les an layntikre kotya, kay čivan le ko kouč djet dren, hoy soungella mishto, yaake har i bibolde kova krenna.

⁴¹ Kote, kay o Yezous ap o troushel dino vas, his i baar. An koy baar his i nevo moulengro kheer. Koy his kek mensho dren čiddo.

⁴² Oun har dikan le, kay ko moulengro kheer gar dour hi, čivan le kote o Yezouses sik dren. Len his kek tsiro. O Debleskro dives vals sik.