Johanni 18 - O Debleskro Lab 2024 (Sinte-Manouche)

I lourde taprenn o Yezouses

¹ Har o Yezous kova penas, djas yob peskre malentsa vin. Oun yon djan vergel ko pani, hoy kharella Kidron. Koy his i baar. Koy dren djas o Yezous peskre malentsa.

² Kote his lo boud kope peskre malentsa. Doleske prindjras ninna o Youdas, ko phoukepaskro, koy baar.

³ Oun o Youdas djas kote. Leha van kol lourde oun kliste, kolen i bare rashaya oun i Farisarya bičran. Len his rhare oun kashta oun hidjran momlia oun yag.

⁴ O Yezous djinas halauter, hoy ap leste vella oun djas vin pash lende oun poučas lendar: “Kones rodenn t'mer?”

⁵ “O Yezouses dran Nazaret,” penan yon ap leste. “Me hom kova!” penas o Yezous. O Youdas, ko phoukepaskro, his pash lende tardo.

⁶ Har o Yezous ap lende penas “Me hom kova,” djan yon i kotar pale oun peran ap i phoub.

⁷ Pale poučas o Yezous lendar: “Kones rodenn t'mer?” “O Yezouses dran Nazaret,” penan yon.

⁸ “Me penom t'menge, kay me kova hom,” penas o Yezous. “Te hom me kova, koles t'mer rodenna, palle moukenn kol vavaren te djal.”

⁹ Kova penas o Yezous, te vell čačo, hoy yob glan-vi penas: “Tata, me nashrom kekes kolendar, kay tou man dal.”

¹⁰ O Simon Petro, koles his i rharo pash peste. Yob las peskro rharo, oun das yek klisteske o čačo kand tele. Kova kharas Malko oun his i klisto, kay boudras o baro rashayeske.

¹¹ Koy penas o Yezous ap o Petreste: “Čip tiro rharo pale! Djap me gar ko drom, kay miro dad kamell, te djap les, ninna te venn kote bare douka ap mande?”

¹² Oun i lourde pengro pralstuneha oun i biboldengre kliste tapran o Yezouses oun pandan les.

¹³ Oun anan les pash o Hannas. Kova his o dad o Kayafeskri romyatar. O Kayafas his an kava bersh baro rashay.

¹⁴ Yob his kova, kay penas i biboldenge: “Vals feteder menge, te merals yek i tsele menshenge.”

O Petro dell o Yezouses bourhoste

¹⁵ O Petro oun i vavar o Yezouseskre malendar djan o Yezouseske palla, har yob an o kheer o baro rashayestar anlo vas. O baro rashay prindjras ko vavar males. Doleske djas nay yob o Yezouseha an ko kheer.

¹⁶ O Petro ačas vin glan o voudar tardo. Koy vas ko vavar pale, kova, kay his o baro rashayestar prindjedo, oun rakras koy djouvyah, kay das garda glan o voudar, oun las o Petres dren.

¹⁷ Koy djouvel, kay das glan o voudar garda, poučas o Petrestar: “Hal tou gar yek kol malendar ko morshestar koy?” “Na-a, me gar!” penas yob.

¹⁸ Koy his boudepangre oun kliste tardo, kay kran i yag. Lenge his shila oun yon tatsran pen. O Petro his ninna pash lende tardo, te tatsrell lo pes.

¹⁹ Kanna poučas o baro rashay o Yezouses vin pral leskre malende oun pral kova, hoy yob i menshenge penas.

²⁰ O Yezous penas ap leste: “Me rakrom glan i tsele menshende yaake, kay hakeno kova nay shounas. Hako tsiro rakrom an i biboldengri kangri oun an o Debleskro baro kheer, kay i tsele bibolde khetne van. Me penom či čorrhanes.

²¹ Hoske poučeh tou mandar? Pouč kolendar, kay shounan man. Yon djinenna, hoy me penom!”

²² Har yob kova penas, das yek kol biboldengro klistendar, kay koy pashel tardo his, o Yezouses an o mouy oun penas: “Har nay rakreh tou yaake o baro rashayeha?”

²³ Koy penas o Yezous ap leste: “Nay peneh tou, kay me čilačo koova rakrom? Te penom me lauter, hoy čačo hi, hoske dal tou man?”

²⁴ O Hannas anas les pandlo pash ko baro rashayeste Kayafas.

²⁵ O Petro his koy tardo oun tatsras pes. Koy penan le ap leste: “Hal tou gar yek leskre malendar?” Yob das bourhoste oun penas: “Me hom kova gar.”

²⁶ “Dikom me tout gar an i baar pash leste?” penas yek klisto, kay boudrell ko baro rashayeske. Kava klisto his yek koleskre menshendar, koleske o Petro o kand tele das.

²⁷ Pale das o Petro bourhoste, oun penas: “Me homs gar pash leste.” Kanna das o bashno gole.

O Yezous vell glan o Pilateste anlo

²⁸ Kanna anan le o Yezouses dran o Kayafeskro kheer vin, oun anan les an o baro kheer o themeskro rayestar, kay i Remari his. His taysarlake. I bibolde djan gar leha an ko baro kheer dren, te venn le gar pale-čiddo. Yon kaman te nay rhan le ko rhapen ap ko baro dives, kay kharella Passa.

²⁹ O themeskro ray, – leskro lab his Pilato – djas pash lende vin oun poučas lendar: “Havo čilačo koova kras yob?”

³⁰ Yon penan ap leste: “Te vals kava morsh gar čilačo, anams les gar pash toute.”

³¹ “Ake, lenn les oun denn les t'mer i phagi pal o biboldengro čačepen!” penas o Pilato ap lende. “Mer nay marah kekes pal o Remaryengro čačepen,” penan kol bibolde.

³² Yaake vas kova čačo, hoy o Yezous pral peskro merepen glan-vi penas.

³³ O Pilato djas pale an peskro kheer, oun moukas o Yezouses dren te anell, oun poučas lestar: “Hal tou o baro ray pral i biboldende?”

³⁴ “Peneh tou kova dran toute vin? Penan kova touke vavar mandar?” poučas o Yezous.

³⁵ “Hom me i biboldo?” penas o Pilato. “Tire menshe oun i bare rashaya dan tout an mire vasta. Hoy kral tou?”

³⁶ Koy penas o Yezous: “Miro them oun i menshe, kolengro ray me hom hi gar kay phoubyatar. Te vals miro them kay phoubyatar, oun ninna i menshe, kolengro ray me hom, palle kourans pen mire boudepangre i biboldentsa, te perap me gar an kolengre vasta. Me penau touke: Miro them oun mire menshe, kolengro ray me hom, hi gar kay phoubyatar.”

³⁷ Poučas o Pilato lestar: “Hal tou čačepah i baro ray?” Penas o Yezous: “Ava, hi yaake har tou penal. Me hom i baro ray. Me vom boldo ap kay phoub, te penap o čačepen. Koon an o čačepen tardo hi, kova shounell ap mande.”

³⁸ “Hoy hi o čačepen?” poučas o Pilato lestar. Oun har yob kova penas, djas lo pale vin pash i biboldende oun penas ap lende: “Me hatsau kek doosh ap leste.

³⁹ Shounenn, pash t'mende vell hako bersh ap kol bare divessa, kay kharenna Passa, i stildo dran o stilepen mouklo. Kamenn t'mer, te moukap o baro rayes pral i biboldende te djal?”

⁴⁰ Yon dan pale gole: “Gar koles! Mer kamah, te moukess o Barabes dran o stilepen vin!” Kova his i marepaskro.