Johanni 16 - O Debleskro Lab 2024 (Sinte-Manouche)

O Debleskro Dourho oun leskri boudi

¹ “Kova halauter penom me ap t'mende, te denn t'mer gar t'maro patsepen ap mande pre.

² Yon krenn t'men pale-čiddo. Oun ko tsiro vella, kay denn yon t'men moulo oun penenn: O Devel kamas kova yaake.

³ Yon prindjrenn o dades gar oun man vitar gar. Doleske krenn yon kova.

⁴ Te vell ko tsiro, hounte djinenn t'mer, kay kova yaake vella, har me les t'menge penom. Me penom t'menge kova gar, har homs pash t'mende. Kanna penau t'menge kova.

⁵ Kanna djau me pash koleste, kay bičras man. Oun kek t'mendar poučell mandar: Kay djah tou?

⁶ Kova, hoy t'menge penom, doukell t'men an o dji.

⁷ Patsenn man: Hi mishto t'menge, te djap mange. Te djau me gar, nay vell ko rakepaskro gar pash t'mende, kay vella ap t'mari rig. Me te djau mange, bičrau les pash t'mende.

⁸ Yob te vella, palle krell yob i menshenge i yaka pre pral lengri doosh, pral o Debleskro čačepen oun pral o Debleskri rholi, hoy vella pral kay phoub.

⁹ Lengri doosh hi, kay patsenn le gar ap mande.

¹⁰ O Debleskro čačepen dikenn le ap kova, kay me djau pash o dadeste, oun t'mer dikenn man bouder gar.

¹¹ Kay o Debleskri rholi pral kay phoub vella, dikenn le ap kova, kay i phagi pral o rayeste pral kay phoub vi-rakedo hi.

¹² Me kamoms t'menge yaake boud te penell. T'mer hayvenn nay kova kanna gar.

¹³ Te vell o Debleskro Dourho, kay o čačepen an leste hi, sikrell lo t'mende o tselo čačepen. Yob rakrell gar dran peste. Hoy yob shounella, kova rakrell yob. Oun hoy vella, penell yob t'menge glan-vi.

¹⁴ Yob sharell man. Halauter, hoy yob penell t'menge, vell mandar.

¹⁵ Halauter, hoy o dades hi, hi ninna miro. Doleske nay penau me: Lauter, hoy yob penell t'menge, vell mandar.

¹⁶ Pal i tikno tsiro dikenn man bouder gar. Oun pale pal i tikno tsiro dikenn man t'mer pale.”

¹⁷ “Hoy penell lo,” poučan leskre mala yek o vavarestar, “te penell lo ap mende: Pal i tikno tsiro dikenn man bouder gar; oun pale pal i tikno tsiro dikenn man t'mer pale; oun me djau pash o dadeste?

¹⁸ Hoy hi kova, te penell lo: I tikno tsiro? Mer djinah gar, hoy yob rakrella.”

¹⁹ O Yezous hayvas lendar, kay kaman le lestar kova te poučell, oun yob penas ap lende: “Kamenn t'mer te djinell, hoy kova hi, kay penom: Pal i tikno tsiro dikenn man bouder gar; oun pale pal i tikno tsiro dikenn man t'mer?

²⁰ Čačepah, me penau t'menge: Vell i tsiro, kay t'mer rovenna, oun denn i vasta pral o shero khetne. Oun i menshe, kay gar ap mande patsenna, hi barhtelo. Ninna te rovell t'maro dji ap ko dives, djinenn: T'maro ropen vell t'mendar krik lino, oun t'mer venna barhtelo.

²¹ I djouvel, kay lell i ternepen, kolat hi douka. Te hi ko ternepen koy, bistrell li kol douka. Yaake bari hi lakri barht, kay yoy las i ternepen.

²² Kanna rovell t'maro dji. Oun me penau t'menge kanna: Me vau pale pash t'mende. Oun t'mer venn barhtelo. Oun koy barht nay lell t'mendar kek krik.

²³ Ap ko dives, poučenn t'mer mandar či. Čačepah, me penau t'menge: Te mangenn t'mer miro dadestar čomone an miro lab, kova dell yob t'men.

²⁴ Bis kanna mangan t'mer či an miro lab. Mangenn oun yob dell t'men, te vell t'mari barht yaake bari, bareder djal gar!

²⁵ Kova penom me t'menge gar an o mouy. O dives vella, kay me rikrau bouder či pale. Palle rakrau t'mentsa miro dadestar yaake, kay hayvenna halauter.

²⁶ Ap ko dives mangenn t'mer o dades an miro lab. Me penau gar, kay me mangau miro dades t'menge.

²⁷ Miro dad kamell t'men ninna yaake har me kamau t'men. T'mer kamenn man o djiyestar oun patsenna, kay me o Deblestar vom. Doleske kamell t'men miro dad ninna o djiyestar.

²⁸ Me vom o dadestar, oun vom ap kay phoub. Oun me moukau pale kay phoub, oun djau pash miro dadeste.”

²⁹ Koy penan leskre mala ap leste: “Kanna rakreh tou yaake, kay hayvah kova. Tou rikreh bouder či pale.

³⁰ Kanna djinah mer, kay tou halauter djineh. Tou djineh glan-vi, hoy i menshe kamenn toutar te poučell. Doleske patsah mer, kay tou o Deblestar veh.”

³¹ “Kanna patsenn t'mer?” penas o Yezous.

³² “Dikenn, ko tsiro vella oun hi koy, kay nashenn t'mer halauter mandar. Hakeno djal pale khere. Oun man moukenn t'mer kokres. Ninna te moukenn man, hom me gar kokres. O dad hi pash mande.

³³ Kova lauter penom t'menge, te vell t'men i bari barht an o dji pral kova, kay han mire. Kate ap kay phoub hi t'men daar. Ma darenn! Me hom zorleder har halauter ap kay phoub.”