Johanni 14 - O Debleskro Lab 2024 (Sinte-Manouche)

Me hom o drom, oun o čačepen oun o djipen

¹ “T'maro dji hounte trashell gar. Patsenn ap o Debleste oun patsenn ap mande!

² An miro dadeskro kheer hi boud iseme. Te vals kova gar yaake, penoms me kova gar. Me djau koy oun dikau, te venn kol iseme t'menge kerdo.

³ Oun te krom halauter yaake, te nay tserdenn dren, vau me pale, oun lau t'men pash mande, te venn t'mer kote, kay me hom.

⁴ T'mer djinenn ko drom, kay me djaua.”

⁵ “Ray,” penas o Thomas ap leste, “mer djinah gar, kay tou djah. Har nay djinah ko drom?”

⁶ “Me hom o drom, oun o čačepen oun o djipen,” penas o Yezous. “Dell kek vavar drom pash o dadeste, har man.

⁷ Te prindjrans man, prindjrans ninna miro dades. Oun kanna prindjrenn les t'mer oun dikan les.”

⁸ “Ray,” penas o Filipo ap leste, “sike mende o dades! Kova hi menge doha.”

⁹ “Yaake rah hom pash t'mende oun tou prindjreh man gar, Filipo?” penas o Yezous. “Koon man dikella, kova dikell o dades. Har nay peneh tou: Sike mende o dades?

¹⁰ Patseh tou gar, kay me an o dadeste hom oun o dad an mande hi? Hoy me t'menge penau, kova vell gar mandar. Na-a! O dad, kay an mande hi, krell kova halauter.

¹¹ Patsenn man, kay me an o dadeste hom, oun kay o dad an mande hi. Te patsenn t'mer kova gar, palle patsenn ap kova, hoy me krau!

¹² Čačepah, me penau t'menge: Koon ap mande patsella, krell ninna kova, hoy me krau. Oun yob krell bareder koova har me, kanna, kay djau me pash o dadeste.

¹³ Oun hoy t'mer an miro lab mangenna, kova kamau me te krell t'menge. Kova, hoy o čavo krella, sikrell i menshende o Debleskro raylepen oun leskri zoor.

¹⁴ Kova, hoy t'mer mangenn an miro lab, kamau me t'menge te krell.”

Me bičrau t'menge o Debleskro Dourho

¹⁵ “Te kamenn t'mer man o djiyestar, krenn t'mer, hoy me t'menge penom.

¹⁶ Oun me mangau o dadestar, te bičrell yob t'menge i rakepaskres, kay vell ap t'mari rig. Yob djal bouder gar krik t'mendar.

¹⁷ Kova hi o Debleskro Dourho, kay penell i menshenge o čačepen pral o Debleste. Kolla, kay patsenn gar ap o Debleste, nay lenn les gar. Yon dikenn les gar oun prindjrenn les gar. T'mer prindjrenn les. Yob ačell pash t'mende, oun hi an t'mende.

¹⁸ Me moukau t'men gar kokres, har te vell t'men kek dad. Me vau pash t'mende.

¹⁹ An i tikno tsiro dikenn man i menshe ap kay phoub bouder gar. T'mer dikenn man. Me djivau. Doleske djivenn t'mer ninna.

²⁰ Ko dives vella, kay t'mer djinenna, kay me an miro dadeste hom, oun t'mer an mande han, oun me an t'mende hom.

²¹ Koon mire laba shounella oun krell, hoy me penau, kova kamell man čačepah o djiyestar. Oun koon man kamella, koles kamell miro dad. Oun me kamau les ninna o djiyestar oun me sikrau leste, koon me hom.”

²² “Ray, hoske kameh tou mende te sikrell, koon tou hal, oun gar i vavar menshende?” poučas lestar o Youdas, kova, kay his gar o Youdas Iskariot.

²³ Koy penas o Yezous ap leste: “Te kamell man yek o djiyestar, kova krell, hoy me penau. Koles kamell miro dad. Oun mer vah pash leste oun ačah pash leste.

²⁴ Koon man gar kamella, kova krell vitar gar, hoy me penau. Oun hoy me penau, vell gar mandar. Kova vell miro dadestar, kay bičras man.

²⁵ Kava koova penom me t'menge, yaake rah har me pash t'mende homs.

²⁶ Me te hom bouder gar pash t'mende, bičrell o dad t'menge o rakepaskres, kay vell ap t'mari rig. Kova hi o Debleskro Dourho. Oun yob penell t'menge halauter yaake, te nay hayvenn kova mishto. Oun yob moukell t'menge halauter an o shero te vell, hoy me t'menge penom.

²⁷ Ninna te hom me gar pash t'mende, ačell koy barht, hoy me dom t'men, an t'mare djia. Me dau t'men miri barht. Koy barht nay denn t'men gar i menshe ap kay phoub. Ma trashenn! Ma avenn dareno!

²⁸ T'mer shounan, hoy me penom: Me djau mange oun vau pale pash t'mende. Te kamans man o djiyestar, vans t'mer barhtelo, kay me pash o dadeste djau. Miro dad hi bareder har me.

²⁹ Me penau t'menge kava kanna, te patsenn t'mer ap ko tsiro, kay kova vella, kay kova čačo hi, hoy me t'menge penom.

³⁰ Man hi bouder gar boud tsiro, te rakrap t'mentsa. O beng, kay hi o ray pral kay phoub, vella. Les hi kek zoor pral mande.

³¹ Me krau, hoy miro dad mange penas, te dikenn i menshe ap kay phoub, kay kamau les o djiyestar. Stenn pre, te djas menge!”