Johanni 1 - O Debleskro Lab 2024 (Sinte-Manouche)

O Yezous hi o Lab, hoy vas o Deblestar

¹ Har o bolepen oun i phoub gar koy his, his o Lab koy. Kova, kay hi o Lab, his pash o Debleste. Oun yob his o Devel.

² Yob his pash o Debleste, har o bolepen oun i phoub gar koy his.

³ Khetne leha kras o Devel o bolepen oun i phoub. Či hi koy, hoy gar leha kerdo vas.

⁴ An leste his o djipen. Oun ko djipen his i bari momeli i menshenge.

⁵ Koy momeli rhačella an i rat. Oun i rat nay kras koy momeli gar vin.

⁶ Koy vas i morsh, ko vas o Deblestar bičedo. Leskro lab his Yohanni.

⁷ Yob vas, te penell lo hakeneske, koon koy bari momeli hi, te patsenn halauter ap koy momeli.

⁸ Yob his gar koy momeli. Yob vas, te penell lo, koon koy momeli hi.

⁹ Koy čači momeli vas ap i phoub, te rhačell li hakeneske.

¹⁰ Kova, kay hi o Lab, his ap i phoub, oun i phoub vas leha kerdo. Oun i menshe ap i phoub prindjran les gar.

¹¹ Yob vas an peskro them, oun leskre menshe lan les gar pre.

¹² Halauter kolla, kay lan les pre oun ap leste patsan, kolen das yob i zoor, te venn yon o Debleskre čave.

¹³ Kova van le gar, har yon boldo van. O nevo djipen vas gar dran o menshengro kamlepen. Na-a, o nevo djipen lan le kokres o Deblestar.

¹⁴ Ko lab vas i mensho, oun djivas pash mende. Oun mer dikam leskro raylepen oun leskri zoor, kay o Devel peskro čaves das. Kova his pherdo lačepen oun čačepen.

¹⁵ O Yohanni rakras lestar, oun das gole: “Yob hi kova, kolestar penom: Kova, kay pal mande vella, hi pral mande. Yob his glan mande koy.”

¹⁶ Mer halauter lam pale oun pale boud lačepen lestar, kay les yaake boud hi.

¹⁷ O Mose das men kol laba, kay penenna, har mer djivas. O Yezous Kristo anas menge o Debleskro lačepen oun čačepen.

¹⁸ Kek mensho dikas o Debles. O Debleskro čavo kokres sikras men, koon o Devel hi. Yob hi yek o Debleha.

^19-20 Har bičran i pralstoune bibolde dran o foro Yerusalem i rashayen oun i Levitaryen pash o Yohanneste, te poučenn le lestar: “Koon hal tou?” penas yob glan i tsele menshende, kay kote tardo hi: “Čačepah, me hom gar o Kristo.”

²¹ “Koon hal tou?” kaman yon te djinell. “Hal tou o Eliya?” poučan le lestar. “Na-a,” penas lo, “kova hom me gar!” “Hal tou o Debleskro rakepaskro, kolestar penlo vas, te vell yob? poučan le lestar.” “Na-a,” penas yob.

²² Yon penan ap leste: “Pen menge, koon tou hal, te penas mer kova kolenge, kay bičran men. Hoy peneh tou čačepah, koon tou hal?”

²³ Yob penas: “Me hom kova, kay dell gole an o moulo them: Lenn halauter krik, hoy o Debleske an o drom čiddo hi. Yaake penas kova o Debleskro rakepaskro, o Yesaya, glan i rah tsiro.”

²⁴ Kolla, kay van pash o Yohanneste, his i Farisarendar bičedo.

²⁵ Yon poučan lestar: “Te hal tou gar o Kristo, vitar gar o Eliya, oun vitar gar ko Debleskro rakepaskro, kolestar penlo vas, te vell yob, hoske taufreh tou i menshen?”

²⁶ Penas o Yohanni lenge: “Me taufrau len an o pani. Mashkral t'mende hi yek, koles prindjrenn t'mer gar.

²⁷ Kova vell pal mande. Me hom gar mishto doha, te krap leskre kirrha pre.”

²⁸ Har o Yohanni kova rakras, his yob an o foro Betani ap i vavar rig o panyestar Yordan, kote, kay taufras lo i menshen.

²⁹ Ap o vavar dives dikas o Yohanni, kay o Yezous pash leste vella. Oun o Yohanni penas: “Dikenn, kava hi o Debleskro bakro, kay lell i menshengri doosh ap peste.

³⁰ Kava hi ko morsh, kay penom lestar: Pal mande vella i morsh, ko his pral mande. Yob his koy, har me gar koy homs.

³¹ Me djinom gar, koon kova hi. Me vom, te taufrap i menshen an Israel an o pani, te sikrap nay len, koon yob hi.”

³² Oun o Yohanni penas: “Čačepah, me dikom o Debleskro Dourho har i parno čirklo, kay vas dran o bolepen pral tele, oun ačas ap leste.

³³ Oun me prindjrom les gar. Kova, kay bičras man, te taufrap i menshen an o pani, kova penas ap mande: Tou dikeh, har vell o Debleskro Dourho ap i morsheste oun ačell ap leste. Kova hi ko morsh, kay dell i menshen o Debleskro Dourho.

³⁴ Me dikom kova halauter. Doleske nay penau me ninna: Kava morsh hi o Debleskro čavo.”

O Yezouseskre mala

³⁵ O vavar dives his o Yohanni pale koy tardo. Douy leskre malendar his pash leste.

³⁶ Oun har yob dikas, kay o Yezous koy djal, penas lo: “Dikenn, kava hi o Debleskro bakro!”

³⁷ Har kol douy kova shounan, djan le o Yezouseske palla.

³⁸ Oun o Yezous rissras pes trouyel, oun dikas len. Oun yob poučas lendar: “Hoy rodenn t'mer?” Penan yon: “Sikepaskro, kay rhah oun soveh tou?”

³⁹ “Avenn oun dikenn!” penas yob. Koy djan kol douy leha, oun dikan, kay yob rhala oun sovella. His deshenge. Oun yon ačan ko dives pash leste.

⁴⁰ Yek kol douyendar, kay shounan, hoy o Yohanni penas, oun o Yezouseha djan, his o Andreas. Leskro phraal his o Simon Petro.

⁴¹ Kova hatsas peskro phrales Simon, oun penas ap leste: “Mer hatsam ko baro rayes, kolestar o Devel penas, te vell yob.” Kova kharella ap grichtikes Kristo.

⁴² Oun o Andreas anas peskro phrales pash o Yezouseste. Har o Yezous koles dikas, penas lo: “Tou hal o Simon, ko Yohanneskro čavo. Tou khareh kanna Kefas.” Ko kharella baro bar.

⁴³ O vavar dives kamas o Yezous an o them Galilea te djal. Ap o drom tapras lo o Filipo, oun penas ap leste: “Dja mantsa!”

⁴⁴ O Filipo his dran o foro Betsayda. Ninna o Andreas oun o Petro his dran ko foro.

⁴⁵ O Filipo hatsas o Natanael oun penas ap leste: “Mer hatsam koles, pral koleste o Mose an peskre lila činas. Ninna o Debleskre rakepangre činan pral leste. Yob kharella Yezous oun hi dran o foro Nazaret. Leskro dad hi o Yosef.”

⁴⁶ Oun o Natanael penas ap leste: “Dran Nazaret nay vell či, hoy mishto hi.” “Am oun dik!” penas o Filipo.

⁴⁷ Har o Yezous dikas, kay o Natanael vas, penas yob: “Dikenn, koy vell i čačo Israelitari. Oun kek rhorhepen hi an leste.”

⁴⁸ “Har nay djineh tou, koon me hom?” poučas o Natanael lestar. Penas o Yezous: “Har tou tel o faygetikro rouk hals, dikom me tout, glan ko tsiro, kay o Filipo das tout gole.”

⁴⁹ “Sikepaskro,” penas o Natanael, “tou hal o Debleskro čavo. Tou hal o baro ray pral Israel.”

⁵⁰ Penas o Yezous ap leste: “Me penom touke: Me dikom tout tel ko rouk. Doleske patseh tou. Tou dikeh bareder koova, har kava.

⁵¹ Kova hi čačo, hoy me t'menge penau: T'mer dikenn har o bolepen pre djala. Oun o Debleskre bolepangre djan pral oun venn pale tele ap o Menshengro Čaveste.”