Joel 4 - O Debleskro Lab 2024 (Sinte-Manouche)

O Debleskri rholi vell pral i menshende dran vavar themma

¹ An kol divessa, an ko emligo tsiro, kay dau me nevo djipen an o them Youda oun an o foro Yerusalem,

² anau i menshen dran vavar themma khetne, oun anau len tele an i tala Yosafat. Oun kote anau lengri doosh ap lende: yon tradan mire menshen, i Israelitaryen, kolen me mange vin rodom, dran lengro them vin oun anan len an vavar themma. Oun o themestar Israel lan le penge hakeno i kotar.

³ Oun yon khelan vin, koon have mire menshendar lella; oun bikran yek morsh čaves te playsrenn le i rati i loubyah; oun bikran i čay, te ginenn le mool, hoy vas pilo oun či ačas latar.

⁴ Oun t'mer menshe dran i forya Tirus oun Sidon oun dran o tselo them Filistia, t'mer kamenn ap mande te djal? Kamenn mange pale te dell, hoy t'menge krom? Mishto! Palle avenn! Yaake moukau sik t'maro čilačepen ap t'maro shero pale te vell.

⁵ Miro roup oun miro sonakay lan t'menge, oun miro shoukar kouč koova anan an i khera t'mare deblendar.

⁶ I terne morshen dran Youda oun Yerusalem bikran t'mer ap i grichtikre menshende, te venn le dour lengro themestar krik anlo.

⁷ Shounenn, me dau len pale gole kotar, kay t'mer len bikran. Oun moukau t'maro čilačo koova ap t'mare sherya pale te vell,

⁸ oun dau t'mare čaven oun čen an i vasta kol menshendar dran Youda; oun kolla bikrenn len ap i menshende an Saba, kay djivenn an i them, hoy dour krik hi. Me, o baro Devel, penom kova.

⁹ Denn vin gole mank i menshende an i vavar themma: Avenn an o kourepen! Lenn t'mare zorele morshen khetne! Bičrenn t'mare tsele lourden pre!

¹⁰ Krenn rhare dran t'mare harhetikre koola, kolentsa boudran an i phoub! Krenn vitsepangre čourya dran t'mare čourya, kolentsa činan o khass! Kova, koles kek zoor hi, te penell: Me hom zorelo.

¹¹ Avenn, t'mer lauter dran i themma, kay hi troul o Israel! Avenn sik lauter khetne an koy tala! Palle biče tou, baro Devel, tire kourepangre kote tele!

¹² O baro Devel penell: “I lourde dran i vavar themma hounte krenn pen ap o drom, te venn le an i tala Yosafat. Kote hom me beshdo, oun moukau miri rholi te vell pral i menshende an i themma koy trouyel.

¹³ Lenn koy čouri an o vast, kolah o djob činenn! Činenn len tele, har te vans le djob! Avenn oun stakrenn len khetne, har te vans le drake, kolengri mool an i bari piri nashell. Koy piri hi pherdo oun nashell pral. Yaake baro hi lengro čilačepen.”

¹⁴ Serya oun zerya menshe venn an i tala, kay o čačepen vin kerdo vell. O dives o baro Deblestar vella sik.

¹⁵ O kham oun o čon venn kalo, oun o bolepangre momlia rhačrenn bouder gar.

¹⁶ O baro Devel dell bari gole pral tele i berga Sion. Oun dran o foro Yerusalem moukell lo peskri gole yaake te shounell, te trissell o bolepen oun i phoub. Peskre menshenge Israel hi lo har i zorelo kheer, kay len kek bibarht taprell.

O them Youda oun o foro Yerusalem venn rayles kerdo

¹⁷ Palle dikenn t'mer Israelitarya, te hom me o baro Devel oun t'maro Devel. Me djivau ap i berga Sion, hoy mange hi. Palle hi Yerusalem i Debleskro foro. Oun lourde dran vavar themma venn bouder gar dren.

¹⁸ An ko tsiro vell boud goudli mool bares ap i berge. Oun i groumya oun bakre ap o pralstouno them denn yaake boud thoud, te hi boudeder har doha koy. Oun boud naashede panya hi an o them Youda. Oun dran o baro Debleskro kheer nashell i pani vin, oun nashell tele an o telstouno them, hoy kharell Shittim.

¹⁹ An o them Egiptia djivenna bouder kek menshe. Oun o them Edom vell i divyo moulo them. Yon maran i menshen dran Youda, kay lenge či kran. Doleske djal lenge kanna yaake.

²⁰ An o them Youda oun an o foro Yerusalem djivenn menshe hako tsireske.

²¹ Lengri rateskri doosh vell krik lino. Oun me, o baro Devel, djivau ap i berga Sion.