Joel 1 - O Debleskro Lab 2024 (Sinte-Manouche)

Stepangre oun i bari bok venna pral o them Youda

¹ Kava hi i lab o baro Deblestar, hoy penas lo ap o Yoel, koleskro dad o Petouel hi.

² Shounenn, t'mer phoure, oun denn yak t'mer halauter, kay djivenn an kava them! Penenn mange, das savo koova yaake rah har t'mer djivenn? Das savo koova an t'mare phourengro tsiro?

³ Penenn kova t'mare čavenge, te penenn yon les doureder lengre čavenge, oun kolla lengre čavenge:

⁴ Boud boud stepangre van pral o them oun beshan pen ap o djob. Hoy moukan kolla pral, rhan kolla, kay pal lende van. Hoy kolla pral moukan, rhan kolla, kay pal kolende van. Hoy palle pral ačas, rhan kolla, kay pal kolende van.

⁵ Stenn pre, t'mer mate, oun rovenn! Denn gole, t'mer pipangre! Rovenn troul i molyake, hoy vas krik lino t'mare mouyendar.

⁶ Boud boud stepangre peran an maro them dren. Len hi danda har leven hi.

⁷ Či hi bouder ap mare drakengre rouka, kek patria hi bouder ap mare faygetikre rouka. Ninna lengro kasht hi nango oun parno, lauter hoy ap lende his, rhan le tele.

⁸ Rob har i terni čay, kay nashras lakro pirno, oun rivell pes an i gono.

⁹ Djob oun mool hi bouder gar koy, hoy nay vals dino o baro Debleste an leskro kheer. I rashayenge hi ropaske. Len hi bouder či, te anenn le o baro Debleske.

¹⁰ O harhetikri phoub hi pherde barra, oun či vell bouder baro koy pre. O djob hi paash, i molengre drake oun i djetengre drake meran tele.

¹¹ I harhenge hi ropaske. Dell kek gib, oun dell kek djob. Lauter hi nashedo.

¹² I drakengre rouka hi trouk. i faygetikre rouken hi bouder kek patria. Ninna ap i phabyengre rouka oun palmtikre rouka, har ap i tsele divye rouka hi bouder kek patria. Oun dran o barhtelo tsiro vas i menshenge i bibarhtelo tsiro.

¹³ T'mer rashaya, kay han tardo pash o Debleskri rhačepaskri, rivenn t'men an gone, oun denn gole i bibarhtyatar! Ninna ratsyake rivenn ko gono gar vin, t'mer, kay boudrenn miro Debleske! Hi kek djob koy oun kek mool, hoy nay anans t'maro Debleske an leskro kheer.

¹⁴ Denn i menshen khetne gole! Penenn, te rhan le či, te sikrenn le, kay lengri doosh len khaytell. Moukenn i phoureden oun i tsele menshen an kava them pash o baro Debleskro kheer te vell! Yob hi t'maro Devel. Denn ap leste gole!

¹⁵ Havo bibarhtelo tsiro! O dives, kay o baro Debleskri rholi vell, hi bouder gar dour. Ap ko dives anell o zorelo Devel bari bibarht pral mende.

¹⁶ Mare yakentsa dikam, har maro rhapen krik lino vas, oun gipen oun khelepen dran maro Debleskro kheer.

¹⁷ O djob an i phoub meras tele, kek rhapen hi bouder an i djobengre khera, o djob vas djoungelo, oun i djobengre khera phagenn khetne.

¹⁸ I groumya denn gole i bokatar, oun nashenn trouyel oun hatsenn kek khass. Ninna i bakre bokenna.

¹⁹ Baro Devel, ap toute dau gole! I yag rhačras o khass an o divyo them, oun i tsele rouka an o veesh.

²⁰ Ninna i divye firhe denn gole ap toute. Kek pani nashell oun vell dran i phoub, oun i yag rhačras o khass an o divyo them.