Jesaja 9 - O Debleskro Lab 2024 (Sinte-Manouche)

O baro ray, kay vella

¹ Kol menshe, kay djivenn an i kali rat, dikenn i bari momeli. Kolenge, kay djivenn an i tamlo them, djal o kham pre.

² Baro Devel, tou kral, te venn i menshe boud, kral, te vell lengri barht bares. Glan toute stenn oun sanenn le i barhtyatar, yaake har an ko tsiro, kay lenn le o djob dren, oun yaake har lourde barhtelo hi, te lenn le pengro kotar kolestar, hoy randedo vas an o kourepen.

³ Tou kral, te hi le bouder gar pandle boudepangre, oun phagal ko kasht, koleha yon ap i boudi tradedo van, yaake har ap ko dives, kay lal i menshen vin dran i vasta kol Midianendar.

⁴ I lourdengre kirrha, kolentsa i lourde phares pre stakran oun lengre baya, kay rat ap lende hi, venn an i yag vitsedo oun rhačrenn pre.

⁵ I ternepen vas menge boldo, i morsh čavo vas men dino. Kova vell i baro ray, oun kharell: lačo rakepaskro, zorelo Devel, dad-hako-tsireske, ray-kay-lell-o-kourepen-krik.

⁶ I rayeskri zoor, hoy les hi, vell baro oun bareder. Oun an kek tsiro dell čingepen. Yob vell beshdo ap o Davideskri beshepaskri, oun hi i ray, kay krell o čačepen yaake vin, har o Devel kamell oun mishto hi kanna oun hako tsireske. O baro Devel, ko ray pral o bolepen oun i phoub, krell kova lauter. Yaake las lo pes kova zoreles glan.

O Devel hadell peskro vast, te dell lo i phagi

⁷ O baro Devel rakras o čačepen vin pral o kheer Yakob. Oun leskri rholi peras ap i Israelende.

⁸ Oun i tsele menshe an Efrayim oun an Samaria hayvan kova. Oun yon ačan pre-phourde oun sharan pen oun penan:

⁹ “Kol barra dran rhačedi čik peran, – kova krell či. Mer čivah mare khera zorele barrentsa pale pre. I faygetikre rouka van tele dino. Kote čivah cedertikre rouka an i phoub.”

¹⁰ O baro Devel kras kolen zoreles, kay kamenn i Israelenge čilačepen te krell, o Rezin oun kol vavaren, te djan le ap lende pre:

¹¹ I Syrarya venna foun glan oun i Filistarya foun pal, te rhan le o Israel pre har i divyo firho, hoy peskro mouy dour pre krell. Oun pral kova lauter moukell o Debleskri bari rholi gar tele, oun leskro vast ačell pre hadedo, te dell lo len i phagi.

¹² Oun i menshe dran Israel van gar pale pash koleste, kay len kol dava dell, oun rodan gar o baro Debles, ko rayes pral o bolepen oun i phoub.

^13-14 Ap yek dives las o baro Devel lendar i pralstunen krik, ninna kol rhorhene rakepangren, kay penan, kay lengre laba o Deblestar van. Kova hi, har te činals yek i mačestar o shero oun o pori tele, oun i roukestar i patria oun i telstouno kotar. I phourende oun i an-dikle hi o shero. Kol rhorhene, kay penenn, lengre laba vans o Deblestar, hi o pori.

¹⁵ I pralstoune pral i menshende anenn i menshen ap bange dromma oun krenn te djinenn yon bouder gar, hoy čačo hi.

¹⁶ Doleske nay vell o Devel gar barhtelo pral lengre terne morshende, oun les nay hi kek dji kol čavenge, kolen kek dad bouder hi, ninna kol djouvyenge, kolengre romma meran. Yon halauter peran o Debleskro dromestar tele, kran čilačo koova, oun rakrenn pen dinlepen khetne. Pral kova lauter moukell o Debleskri rholi lendar gar tele, oun leskro vast ačell pre hadedo, te dell lo len i phagi.

¹⁷ O menshengro čilačepen hi har i yag, hoy rhal troul peste, oun rhačrell soubyengre bourra oun soubyengro zenlepen, oun ninna o tselo veesh. Oun pesso kalo yagakro dourho djal kote pre.

¹⁸ I rholi o baro Deblestar, ko rayestar pral o bolepen oun i phoub, hi har i yag: O them rhačell, oun i menshe rhačrenn ninna. Oun kek rovas o vavareske, oun hakeno dikas kokres ap peste.

¹⁹ Oun lengri bok hi yaake baro, te taprenn le pal rhapen ap hake rigya, oun rhan hako tikno kotar, oun venn gar čalo. Hakeno krell o djipen o vavarestar paash.

²⁰ I menshe dran o kheer Manasse perenn ap kolende dran o kheer Efrayim, oun kolla dran Efrayim ap kolende dran Manasse. Oun kol douy khetne djan ap i menshende dran Youda. Oun pral kova lauter moukell o Debleskri rholi lendar gar tele, oun leskro vast ačell pre hadedo, te dell lo len i phagi.